LUKA 3

Tuiphum Johan i Thuhilhnak

(Mt 3:1-12; Mk 1:1-8; Jn 1:19-28)

1Rom kumpi Tiberius i uknak kum sawm le kum nga a kim kumin, Pontius Pilat cu Judea ngamuktu mangki dekin Herod cu Galilee ngamuktu hi. A nau Filip in Iturea le Trachonitis ngam ukin, Lysanias cu Abilene ngamuktu hi. 2Annas le Kaiafas cu Thiampi Sang dek haw laih takin phillawn lak a umtu Zekhariah capa Johan i lakah Pathian awnkam heng hi. 3Mah hangin Johan cu Jordan ngun elkim hempoh ah zin kawkawi in, “Na sualnak uh sikkikin, tuiphumnak na lak uh tale Pathian in, na sualnak uh ngaithiam tuk hi,” tin phuang pepel hi.

4Profet Isaiah in, a laibu sungah,

“Mi pa khat cu phillawn lak pen au in,

‘Topa i lampi lem unna,

a hawhnak tuk lampi sialin,

camtik un.

5A niamnak hempoh dip unna,

mualsang mualniam hempoh

lawntik khawng un.

Lam kiukawite

na camtik unna,

a bingbo hempoh mamtik un.

6Miphun hempoh ten Pathian

nunpatnak mu haw tuk hi,’

tin ti hi.”#Isa 40:3-5;

7Mi honpi cu tuiphum tukin Johan lakah a hun haw ten Johan in, “Noh ngul ngilote! A heng tukmi Pathian thinuknak pen luat thei tuk uh ci tin, akua in hilh him?#Mt 12:34; 23:33; 8Na sualnak na sik ngai uh tale na deh le bawlnak uh pen langtik un hi. Abraham khi ka pu uh hi tin tili toh pahsuh tin ciang zetin hilh ing. Pathian in hi suangpi hei hi Abraham casuante cangtik thei hi#Jn 8:33; 9Thingkungte a bulah heipi koih ham zo hi. Ngah pha a ngah ngawl thingkungte cu phukin, mei alh pi sungah vawkin um tuk hi,” tin ti hi.#Mt 7:19;

10Mi honpi ten, “Mah ahi tale iti bangin um tuk kam ung?” tin dong haw hi.

11Johan in, “Angki silh nih a nei ten silh khat cu angki nei ngawl pia haw tahen, an a nei ten nei ngawlte hoi bok haw tahen,” tin ti hi.

12Siahkhontu khenkhatte tuiphum tuk hung haw in, “Sazapa, kohte aw, i bawl tuk kam ung?” tin dong haw hi.#Lk 7:29;

13Johan in, “Na khon tuk uh zah sang tam saw in, na khonta pahsuh un,” tin ti hi.

14Ngalkap khenkhatte hei in, “Kohte ikaw ka bawl tuk uh?” tin dong haw hi.

Amuh tei lakah, “Kuamah i lak pen tangka la tutun pahsuh un hi. Thuman ngawlpi in kuamah sual na nawnta pahsuh un. Na thaman ngah uh zat humah na lungkimta un,” tin ti hi.

15Mi hempoh ten muansannak nei sesem haw in, Johan cu Khrih poh hi nanti maw tin lamdangsa in ngaisung tek haw hi. 16Mah hangin Johan in, “Kei in tui tuah tuiphumnak pia ing. Mahnaven kei sangin a ngeng saw mi pa khat hung tuk hi. Kei cu a kedam khau duktu tuk hei tak mang hi. Amah in Hawvang le mei tuah hinthaknak pia tuk hi. 17A cangkhepnak lawhphek cawi in, cangte khep tuk hi. A cang pha cu beem sungah khumin, a sii cu a mit awng ngawlmi meipi sungah haal khawng tuk,” ti hi.

18Johan in Thuthangpha cu mipi lakah a phunkim phuangin le a nuncan ziaza haw kheel tukin sosuah pepel hi. 19Mahnaven ngamuktu Herod in, a naupa i zi Herodias huai in, thilpha ngawl dang tampi a bawl hangin Johan in liat hi.#Mt 14:3-4; Mk 6:17-18; 20Herod cu a thinukin, Johan khi thawnginnah khumin, thilpha ngawl bawl thuah nawnawm hi.

Jesuh Tuiphumnak

(Mt 3:13-17; Mk 1:9-11)

21Mi hempoh tui a phumn celh haw ten Jesuh hei tuiphum bok hi. A thunget laih takin van kong hongin, Hawvang Thiangtho cu khulo bangin a humah kumsuk hi. 22Mahten van pen aw ngingin, “Nang cu ka ihmi ka capa hi ci, na humah ka lungdamzet ing.”#Pian 22:2; Saam 2:7; Isa 42:1; Mt 3:17; Mk 1:11; Lk 9:35;

Jesuh i Puzungte

(Mt 1:1-17)

23Jesuh cu nadeh a pat ten kum sawm thum hawng khi hi. Mipi ten Josef capa hi tin ngaisung haw hi. 24Josef cu Heli capa hi. Heli cu Matthat capa hi. Matthat cu Levi capa hi. Levi cu Melkhi capa hi. Melkhi cu Jannai capa hi. Jannai cu Josef capa hi. 25Josef cu Matthatias capa hi, Matthatias cu Amos capa hi. Amos cu Nahum capa hi. Nahum cu Esli capa hi. Esli cu Naggai capa hi. 26Naggai cu Maath capa hi. Maath cu Mathathias capa hi, Mathathias cu Semein capa hi. Semein cu Josek capa hi. Josek cu Joda capa hi. Joda cu Joanan capa hi. 27Joanan cu Rhesa capa hi. Rhesa cu Jerubabel capa hi. Jerubabel cu Shealtial capa hi. Shealtial cu Neri capa hi. 28Neri cu Melkhi capa hi. Melkhi cu Addi capa hi. Addi cu Cosam capa hi. Cosam cu Elmadam capa hi. Elmadam cu Er capa hi. 29Er cu Joshua capa hi. Joshua cu Eliezer capa hi. Eliezer cu Jorim capa hi. Jorim cu Matthat capa hi. Matthat cu Levi capa hi. 30Levi cu Simeon capa hi. Simeon cu Judah capa hi. Judah cu Josef capa hi. Josef cu Jonam capa hi. Jonam cu Eliakim capa hi. 31Eliakim cu Melea capa hi. Melea cu Menna capa hi. Menna cu Mattatha capa hi in, Mattatha cu Nathan capa hi in, Nathan cu David capa hi. 32David cu Jesse capa hi. Jesse cu Obed capa hi. Obed cu Boaz capa hi. Boaz cu Salmon capa hi. Salmon cu Nahshon capa hi. 33Nahshon cu Amminadab capa hi. Amminadab cu Admin capa hi. Admin cu Arni capa hi. Arni cu Hezron capa hi. Hezron cu Perez capa hi. 34Perez cu Judah capa hi. Judah cu Jakob capa hi. Jakob cu Isaak capa hi. Isaak cu Abraham capa hi. Abraham cu Terah capa hi. Terah cu Nahor capa hi. 35Nahor cu Serug capa hi. Serug cu Reu capa hi. Reu cu Peleg capa hi. Peleg cu Eber capa hi. Eber cu Shelah capa hi. 36Shelah cu Kainan i capa hi. Kainan cu Arphaxad capa hi. Arphaxad cu Shem capa hi. Shem cu Noah capa hi. Noah cu Lamek capa hi. 37Lamek cu Methuselah capa hi. Methuselah cu Enok capa hi. Enok cu Jared capa hi. Jared cu Mahalalel capa hi. Mahalalel cu Kenan capa hi. 38Kenan cu Enok capa hi. Enok cu Seth capa hi. Seth cu Adam capa hi. Adam cu Pathian Capa hi.

Zur Zeit ausgewählt:

LUKA 3: NBF1

Markierung

Kopieren