LUKA 11

Jesuh In Thunget Dan Tuk Hilh

(Mt 6:9-13; 7:7-11)

1Ni khatin, Jesuh cu mun pa khatah thungen hi. A celh ten a nungzuitu tei sung pen pa khatin, “Topa, Johan in, a nungzuite thunget dan a hilh bangin hilh bokin,” ti hi.

2Jesuh in, “Thu na nget uhten hi bangin ngen un hi.

‘Kohtei Pa, Na min thiangtho cu

upat hi tahen;

Na uknak heng tahen.

3Nisial nunnak an pia in,

4Ka hum uh sualnak a bawltu

ka ngaihthiam uh bangin

kohtei sualnak ngaithiamin hi.

Sualsohnak haksapi

hengtik pahsun

tin ti un hi,’ tin hilh hi.”

5Jesuh in, a nungzuitu tei lakah, “Sontehnakin nangmu sungah pa khatin, a ngualcam pa i innah zan laihtakah hawhin,” Ngualcam pa aw cangho pa thum leicawi hihin, 6“Ka ngualcampa pa khat a khualzinnak pen ka innah heng hi. An piak tuk nei viang mang,” ti hi. 7Mahten a innsung pen a ngualcam pa in, “Kei noksak kha pahsun hi, kongkhak zo toh ing a, ka cate tuah hihbu zo toh ung hi, thil pia tukin tho nap lehma toh ing,” tin a tibang ahin, 8iti bangin bawl tuk cim? Thungai in hilh ing: a ngualcam na hihnak bangin tho in, na ngetmi cu a pia paih ngawl hei in, zakca ngawlin na ngen leleng tale na ngetmi hempoh cu tho in pia tuk poh hi.

9“Mah hangin hi bangin nohte hilh ing hi: ngen unna, ngah tuk uh ci, zei unna, mu tuk uh ci a, kiu unna, hotin um tuk hi. 10Itahim titale a ngentu hempoh ten ngah haw tuk hi. A zeitu hempoh ten mu haw tuk a, a kingtu hempoh cu honsakin um tuk hi. 11Noh papite na ca uhten ngasa a nget haw late akua in ngul pia tuk him? 12Aktui a nget haw ten akua in aikamcep pia tuk him? 13Nangmuh misual poh nangawnin thilpha piak tuk na thei uh tale van a um na pa uhin, a ngentu cu Hawvang Thiangtho pia ngawlin i um tuk him?” tin ti hi.

Jesuh le Beelzabul

(Mt 12:22-30; Mk 3:20-27)

14Jesuh in, a awn thei ngawlpa i lak pen khawhuai pa khat hawlvawk hi. Khawhuai i taitul ceng ten mahpa cu awn thei paih hangin mipi ten lamdangsa mahtak haw hi. 15Mahnaven mi khenkhat ten, “Hite hawlvawk theihnak tuk hi pa i humah huham a piatu cu dawi ngilo tei lupibel Beelzabul hi,” tin ti haw hi.#Mt 9:34; 10:25;

16Midang ten Jesuh thang a siah nuam haw hangin Pathian i tenmi hi le hi ngawl theihnak tukin thasiahhuai nalamdang pa khat bawlin tin ngen haw hi.#Mt 12:38; 16:1; Mk 8:11; 17Mahnaven a ngaihsutnak haw khi Jesuh in, a theih ten amu lakah, “Ngam pa khat cu khen tampi ah khen khekin, khenkhat le khenkhat a dodun limi ngam cu ngeiphat tukma hi. A lemdun ngawlmi innkua cu khenkhek keh khawng hi. 18Mahti bang leng bokin Satan uknak sung hei ah tampi umin pawl khat le pawl khat a dodun li haw tale Satan uknak cu ita bangin ngei kho thei tuk him? Beelzabul in huham a piak hangin dawi ngilo hawlvawk thei ci ti uh ci. 19Mahti bangkekin dawi ngilote ka hawlvawk thei ngai bang ahimata nangmuh zuitu ten akua hangin dawi ngilo hawlvawk thei haw him? Nangmuh zuitu hihimin, na khelhnak uh langtik haw hi. 20Beelzabul hu le thawm tuah dawi ngilo hawlvawk thei hi kha mang hi. Pathian hu le thawm tuah hawlvawk hi saw ing. Mah hangin Pathian Uknak cu nohtei lakah heng zo tih langtik hi.

21Mi ngilzet pa khatin, hiamnam phunkim tuah a inn a cin leng sungzong cu a thil a kimin um hi. 22Mahnaven amah sang ngil saw pa khat hungin amah cu a neh celh ten a muan zetmi hiamnam lonsakin, a thil vang semkeh khawng hi.

23“Keima lamtang ngawltu cu keimah dotu hi. A hulawm bawm ngawltu cu a theh kehtik tu,” ti hi.#Mk 9:40;

Dawi ngilo Kik Leh

(Mt 12:43-45)

24“Dawi ngilo pa khat cu mi pa khat sung pen a taitul ten colhnak tuk mun zei in, ngamko lakah vak kawkawi hi. Colhnak mun a tawh ngawl ten, ‘Ka zamsan zomi ka innah kikleh tung hi,’ tin ngaisung hi. 25Hitih bangin a kihleh ngangai ten a inn cu ciangzet le umnak awh zetin mu hi. 26Mah nungten hawhin amah sang siasuak saw dawi ngilo salih zawmin, mahlai ah um haw hi. Mah hangin mahpa cu a dawltabel ten amasa sangin tampi sia saw in um,” ti hi.

Lungdamnak Tatak

27Jesuh in hi thu a hilh celh ten mipi sung pen numei nu pa khatin, “Nangmah hingtu le tuamlawmtu numei nu i humah thupha um hi,” tin au hi.

28Mahnaven Jesuh in, “Pathian thu zain, a zuitu tei humah thupha um saw,” ti hi.

Nalamdang Bawl Tukin Ngen Haw

(Mt 12:38-42)

29Mi tampi ten Jesuh zuan susuih haw a, Jesuh in, “Tulaih khangthak hi itizah takin sual haw him? Nalamdang bawl tukin ngen haw naven Jonah i thu sialngawl nalamdang dang bawlsak hi haw tukma hi.#Mt 16:4; Mk 8:12; 30Profet pa Jonah cu Nineveh mihing tei ca in melciknak hi. Mahti bang bokin mihing capa cu tulaih khang tei ca in melciknak nalamdang hi bok tuk hi.#Jn 3:4; 31Thukhennak ni ten Sheba kumpinu cu dingin, tulaih khangthakte cu sual nawn tuk hi. Itahim titale Sheba cu Solomon kumpipa i cihnak thungai tukin ngam khawlapi pen hung hi. Thungai in hilh ing. Solomon sangin ngeng saw hilai hah um hi.#1Kum 10:1-10; 2Khang 9:1-12; 32Thukhennak Ni a hen ten Nineveh khua mite ding haw tuk a, sual nawnleh haw tuk hi. Itahim titale Jonah in amuh tei lakah thu a hilh ten a sualnak haw sikleh haw hi. Thungai in hilh ing. Jonah sang ngeng saw hilai hah um hi.#Jn 3:5;

Pumpi Vaknak

(Mt 5:15; 6:22-23)

33“Mei inn vakin a seltu le kho khuhtu kuamah um awng haw ma hi. Mei inn vaknakah koihin, inn sung a tumtu ten khua mu haw hi.#Mt 5:15; Mk 4:21; Lk 8:16; 34Na mit uh cu na taksa pumpi uh i ca in mei inn bang hi, na mit uh a cip tale na ti pumpicing uhin vak tuk hi. Mahnaven na mit uh a pha ngawl tale na pumpicing uhin thim khawng tuk hi. 35Mah hangin nangmu sung a, vaknak cu khuathim a hih khak ngawlnak tukin ngalling un hi. 36A pumpi uh cu demno hei khuathim sungah um ngawlin a vak khawng tale mei inn in, a vaknak tuah na ti pumpicing uh a vaktik khawng bangin vak tatak tuk uh ci,” ti hi.

Jesuh In Farasi le Daan Zilhtute Siat

(Mt 23:1-36; Mk 12:38-40)

37Thu a hilh ceng ten Jesuh cu Farasi mi pa khatin an ei tukin samin, an ei tukin khung hi. 38Jesuh cu an a eih laih ngawlin a khut som ngawl khi Farasi mi pa khatin, amuh ten lamdangsa mahtak hi. 39Topa in, a lakah, “Noh Farasi ten na khuat uh le pakan a pualam bek som ciang uh ci. Mahnaven na sunglam uh cu hampumnak le phatngawlnak tuah dim hi. 40Misilte! A pualam a bawltu Pathian in, a sunglam hei bawl bokma maw? 41Mahnaven na khuat uh le na pakan sung a ummi cu mi ca-ngah pia unna, ihempoh cu noh ca in thiang tuk hi.

42Farasi mite nohtei ca in lauhuai mahtak hi. Lemmui le putinan cehte seh sawm seh khat pia nave uhcin, diknak tuah thukhennak, Pathian itnak tih bang thu ah zulzau uh ci. Adangte vang zulzau thong ngawlin hite hei hi na bawl tuk uhmi hi.#Thiam 27:30;

43“Farasi mite! Pumkhawm inn khunnak koihsa humah khung nuamzet na hih uh hangin ca uhin lauhuai mahtak hi. Sum zuaknak mun pen upat piak cu sunsak lalaih uh ci. 44Nohtei ca in izah takin lauhuai him? Noh cu melciknak hei umleh ngawl tohmi khankhuuk, kuamah in theihtupleh ngawltohin a cilpek lihmi khan bangkek hi uh ci,” ti hi.

45Daan zilhtu pa khatin, “Sazapa, hi bang cu na tih ten keimuh tian zawnsak ci,” ti hi.

46Jesuh in, “Daan zilhtu ten nangmu ca hei lauhuaizet hi. A puak zawh haw ngawlmi vanngit khi mitei nguum humah suanto zamin, puak bawm tukin khutlekno hei suah nap ma hi uh ci. 47Noh tei ca in itizah takin lauhuai him! Na pu le pa tei thahmi profet tei ca in khan phazet bawl uh ci. 48Na pu le pa tei thil tihdan cu lungkimpih uh ci tih khi langtik uh ci. Amuh ten profet that haw a, noh ten khan bawlsak uh ci. 49Mah hangin Pathian cihnakin, ‘A muh tei lakah profet le kamtai hawhtik tung. A khenkhat cu that haw tuk a, khenkhat cu dantat haw tuk hi,’ tin ti hi. 50Mah hangin tulaih mihingte cu lei pian pat pepan profet a thah haw hangin bawlsiat hi haw hi. 51Abel a thah haw pepan biaklandawh le Mun Thiangtho laklawhah a thah haw mi Zekhariah hangin dantatnak thuak haw tuk hi. Hizuh hi, ciang zetin hilh ing. Hite hangin tulaih khangthak ten bawlsiatnak thuak haw tuk hi.#Pian 4:8; 2Khang 24:20-21; 52Noh Daan zilhtu tei ca in lauhuai mahtak hi. Cihnak inn kongka tawh kem nave uhcin nangmuh le tum nuam si ngawlin a tum nuamte kham sisih uh ci,” ti hi.

53Jesuh cu mahlai mun pen hawhin Daan zilhtu le Farasi ten nase zetin sonsia in, thu tampi dong haw hi. 54Pa kha khat ot sualnak a nei tale ama awnkam lala in amah awkduncop tukin thu tampi a dotnak haw khi hi.

Zur Zeit ausgewählt:

LUKA 11: NBF1

Markierung

Kopieren