LUKA 10

Jesuh In Sawm Salih le Pa Nih Tiik

1Mah nungten Topa in, a dang sawm salih le pa nih tengin, ama hawhnak tuk khua hempoh ah pa nih kop khat tekin hawh hamtik hi. 2Amuh tei lakah, “An cop tuk tampi naven a cawmtu tukmi demno bek um hi. Mah hangin an cawmtu mihing tam sesem a hah theihnak tukin lo neitu lakah thungen un hi.#Mt 9:37-38; 3Hawh unna, cingne honpi lak a, tuno hah bangin nohte hah ing.#Mt 10:16; 4Na hawh uhten tangka bawm, tawngphu, kedamte hei keng pahsuh un. Lampi ah na hawh uhten mi otpih tuk hei in ding hih pahsuh un hi. 5Inn pa kha khat sung na tum uhten a masabelin, ‘Hi inn sungah lungdaihnak um tahen,’ tin ti un hi. 6Lungnopnak a deihtu ahi tale lungnopnak na humah um zal tahen na tih uhmi awnkam cu amu humah um tahen. Mahti ahimata lungnopnak tihmi na awnkam uh cu nangmu lakah kikleh tahen. 7Mahlai innah um unna, a piak haw mi pawpoh khi na ei-ta un hi. Itahim titale nadektu in, a nadeh man khi a eih kul hi. Inn pa khat pen a dang inn pa khatah thawn kawkawi lita pahsun hi.#1Kor 9:14; 1Tim 5:18; 8Khua pa khat na hen uhten zintunnak a hon haw tale a piak haw mi pawpoh ei-ta un hi. 9Mahlai khuasung a, tina cu damtik unna, mah khua mite cu, ‘Vancung Uknak nai zo toh hi,’ tin hilh un hi. 10Mahnaven khua pa khat na hen uhten zintunnak na mu uh ma tale khuasung lampi ah hawhta unna,#Nung 13:51; 11‘Ka ke uh a, kopmi na khua sung uh a, leivul vang thingvawk kawng ung hi. Mahnaven Pathian uknak cu nangmu lakah heng zo hi tih thei un,’ tin tita un hi. 12Thungai in hilh ing. Thukhennak ni a hen ten mahti bang khua sangin Sodom khua tei lakah Pathian in hehpihnak nei saw tuk!” ti hi.#Pian 19:24-28; Mt 11:24; 10:15;

Umngawltu Khuate

(Mt 11:20-24)

13“Maw Khorazin khua, bawngsiazet hi uh ci. Maw Bethsaida khua, nang ca in lauhuaizet hi. Na sung a, thasiahhuai na ka deh hi, Taiar khua le Sidon khua ah ka dekta ahin mahlai khua sungmi ten a sihkik haw laklehnakin thangkhau puan silhin, vut a bualcih dunnak haw ngeipi zo tuk toh hi.#Isa 23:1-18; Ezk 26:1-28:26; Joel 3:4-8; Amos 1:9-10; Zek 9:2-4; 14Thukhennak ni a hen ten nang sangin Taiar le Sidon khua tei humah hehpihnak nei saw tuk hi. 15Nang, Kapernaum khua! van khong tianin polhtoh tuk maw na nuam? Hell khuk sungah vawkin um tuk hi ci,” ti hi.#Isa 14:13-15;

16Nungzuitu tei lakah, “Nangmu thu a ngaitu cu ka thu ngaitu hi haw in, a nialtu cu keimah nialtu haw hi. Keimah a nialtu cu keimahtiktu pa nial hi haw,” ti hi.#Mt 10:40; Mk 9:37; Lk 9:48; Jn 13:20;

Sawm Salih le Pa Nihte Kikleh

17Sawm salih le pa nihte cu lungdam zetin kikleh haw a, “Topa na minin dawi ngilo ka hawlvawk uhten ka thu uh ngai haw hi,” tin ti haw hi.

18Jesuh in, “Khuaphelep bangin vanhum pen Satan caksuk mu ing. 19Ngai un hi! Thuneihnak noh pia ing, ngul humah le aikam humah hawh thei tuk uh ci. Ngal na neh theihnak tukin huham vang pia ing. Mah hangin imah in siatsuah thei tukma hi.#Saam 91:13; 20Mahnaven dawi ngilo ten na thu uh a ngaih haw hangin na lung uh dam pahsuh un. Mah sangin vanhumah na min uh nganin, a ummi hi na lungdam saw un,” ti hi.

Jesuh A Lungdam

(Mt 11:25-27; 13:16-17)

21Jesuh cu Hawvang Thiangtho in lungdamnak tuah dimtikin, “Maw ka pa lei le van i Topa, micip le mithiam tei lak pen na selmi cu cihnak le thiamnak a nei ngawl tei lakah langtik zo toh na hih hangin na min thangphat ing. Hizuh hi, Ka pa, himi hi nangma deihzawng hi.”

22“Ka pa in, ihempoh ka lakah pia zo toh hi. Capa hi akua him tih cu Pa sialngawl kuamah in thei haw ma hi. Mahti bang bokin, Pa hi akua him tihvang Pa le Capa i phuan mitei lakah sial ngawl kuamah in thei zo haw ma,” ti hi.#Jn 3:35; 10:15;

23Jesuh cu nungzuitu tei lam hekin, amu zak khopno in, “Na muh uhmi thil hempoh na muh uh hangin na mit uh bawngphazet hi. 24Nohtei lakah hilh ing. Na thil muh uhte hi profet le kumpi ten mu nuamzet haw naven mu ngah haw ma hi. Na zak uhmi thu za nuamzet haw naven za ngah haw ma hi,” tin hilh hi.

Samaria Mipha Tehkipnak

25Daan zilhtu pa khat cu Jesuh sual zei tuk hungin, “Sazapa kumkhua nunnak ka ngah theihnak tukin i bawl kam nang,” tin dong hi.

26Jesuh in, “Lai Thiangtho in itin ti kaw? Iti bangin ngaisung cim?” tin dong kik hi.

27Mahpa in, “Topa na Pathian cu na thinlung hempoh, na nunnak hempoh tuah it inna, nangmah na ih bangin, na inn nelpa hei it in, tin um hi,” tin don hi.#Daan 6:5; Thiam 19:18;

28Jesuh in, “Na tihmi cu thungai hi. Hitih bangin bawl inna, nung tuk ci,” tin don hi.#Thiam 18:5;

29Mahnaven Daan zilhpa in, amah le mah khi sualnak nei ngawl bangkekin bawldun cawmnak lungmu tuah “Ka innnel cu akua him,” tin dong hi.

30Jesuh in, “Vei khat laihin, mi pa khat cu Jerusalem pen Jerikho ah a hawh laihtakin lampi ah damiah ten suam haw hi. A van hempoh lonsak khawngin, thi awndiakin vatnek zam haw hi. 31Mahlai takin thiampi pa khat cu mah lampi na tawn ngelcel hi. Mahnaven mahpa cu amuh ten langlam lamah tidenno in hawh tumsialta hi. 32Mahti bang bok lengin Levi mi pa khat heng kha bok hi. Tina pa cu amuh ten langlam mawk pen pial santa hi. 33Mahnaven Samaria mi pa khat cu mahlai lampi ah khualzin bokin, hi tina pa i el a hen ten tina pa cu mu in, hehpih mahtak hi.#2Khang 28:15; 34Tina pa cu zuanin, a meima cu situi le sabittui noihin phano bawlsakin, a kenmi nganhing humah khungtik a, khualbukah hawhpih hi. Mahlai pen phazet tuamlawm hi. 35A zingten ngun tangka cang nih suahin khualbuk ngaktu pa cu pia hi. Khualbuk ngaktu pa i lakah, ‘Hi pa hi phano in tuamlawm inna, ka kihleh ten hi pa na zohnak hangin na bomi hempoh keimah in lohsak khawng tung,’ ti hi.”

36Mah nungten Jesuh in, “Hi pa thum sung pen damiah tei suammi pa i innnel cu akua khi hi tukin ngaisung cim?” tin dong hi.

37Daan zilhtu in, “Amah a hehpihtu pa khi hi,” tin don hi. Jesuh in, “Hawh inna, mahti bangin bawlbokin,” ti hi.

Mary le Martha Lakah Jesuh Hawh

38Jesuh le a nungzuitute cu khualzin pepelin khua pa khatah heng haw hi. Martha a tih haw mi numei nu in Jesuh cu a innah camtik hi. 39Martha i nau cu Mary hi a, Mary cu Jesuh i thuhilh ngai in, a ke bulah khung hi.#Jn 11:1; 40Martha cu nadeh tampi nei in, a cawl ten Jesuh lakah, “Topa, ka nau nu in nadeh hempoh keimah a zam khawng hi kinmawh ma cim? Hilh inna, keimah bawm bok hen,” ti hi.

41Jesuh in, “Martha! Martha! Nang cu thil tampi sehelhin, lauthawng le lungkhamzet ci. 42Mahnaven a kul ngangai mi cu pa khat bek um hi. Mary in thil dik teng ngah zo tohin, kuamah in lonsakleh thei haw tukma toh,” ti hi.

Zur Zeit ausgewählt:

LUKA 10: NBF1

Markierung

Kopieren