LUKA 1
1
1Ka ihmi Theofilas aw:
Mi tampi ten ohtei lakah a piangmi thute cu a pha theibel tukin ngan haw hi. 2Hi thu a ngat haw ten a piangmi thu cu a pat pepan mit tuah a mutute le mah thu a hilhtu tei hilhnak bangkekin, a ngat haw mi hi. 3Mah hangin kei hei in, hi thu a pat pepan ka dot cangcian nungten nangma ca tukin pa khat nung pa khat ka ngan ahin, pha tuk hi tin ngaisung ing. 4A hilh haw mi le a zilh haw mi thute cangkimno in, na theihciang theihnak tukin hi laikuat ing.#1Sam 1:11;
Tuiphum Petu Johan Suahnak
5Herod cu Judea#1:5 Hilai a, Judea ngam tihmi hi Palestine ngam hempoh a tihnak hi. ngam kumpi bawi a deh laihin, Abijah thiampi phun sung pen thiampi Zekhariah tih na um hi. A zi cu Aaron casuan Elizabeth hi.#1Khang 24:10; 6A pa nih haw in, Pathian mai ah nuncan pha in, a nungmi haw hi. Topa i piakmi daan le thupiak hempoh cu phano in zui haw hi. 7Elizabeth cu micing a hihnak hangin nau nei thei ngawlin a nupa haw in tekzet zo haw hi.
8Ni khatin, Zekhariah cu nisial a nadeh huncan a kim ten Biakinn sungah thiampi dek hi. 9Thiampi tei zuimi daan bangin biaklandawh humah pak namtui haltu tuk hun a kim bang bokin Topa i Biakinn sungah tum hi. 10Pak namtui haal hun ten Biakinn pawleu lam umte cu thungen haw hi. 11Vancungmi pa khat cu a lakah langin, pak namtui halnak taklamah ding hi. 12Zekhariah in, amuh ten a thinsu in lau hi. 13Mahnaven vancungmi in, “Zekhariah aw, lau pahsun! Pathian in, na thungetnak za zo toh hi. Na zi Elizabeth in capa hing tuk hi. A min cu Johan tin sa tuk ci. 14Na capa a suah ten lungdamzet tuk ci a, midang tampi vang lungdamzet bok haw tuk hi. 15Amah cu Topa i mai pen mi thawmngengzet pa khat hi tuk hi. Sabittui le a ngui thei zute in ngawlin, a nu i pum sung hihim pen Hawvang Thiangtho tuah dim tuk hi.#Mipum 6:3; 16Topa a Pathian haw i lakah Israel mi tampi a pui kikleh tuk hi. 17Topa i mai a hawh hamtu kamtai pa hi tuk a, profet Elijah bangin tha ngil le thil titheizet tuk hi. Pa le capate lemduntik lehin, thungai ngawlte cu midikcang tei ngaihsutnak lampi ah puileh tuk hi. Topa i mihingte cu Topa i ca in tuangtim mi mihing hi thei tukin bawl tuk,” ti hi.#Mal 4:5-6;
18Zekhariah in Vancungmi lakah, “Na hilh bangkekin cang loli tuk hi tih cu iti bangin thei tung kaw? Kei cu tekzet zo toh ing a, ka zi vang tekzet bok zo toh si,” tin don hi.
19Vancungmi in, “Kei cu Gabriel, Pathian mai a ding lelengtu ing a, Pathian in hi lungdamnak Thuthangpha nangmah hilhtik hi.#Dan 8:16; 9:21; 20Mahnaven ka thuhilhmi sang kha ma navecin a hunkim ten ka hilhmi thu cu kim tuk hi; na san zawh ngawl hangin na lak a ka thuhilhmi a hen kim laklawh cu awn thei tukma ci,” ti hi.
21Hi hun sung hempohin mi honpi ten Zekhariah cu ngakleng haw hi. Biakinn sungah ita tutian um leng nantim tin lamdangsa mahtak haw hi. 22Biakinn sung pen a tultu ten awn thei ngawlin um tih a zak haw ten Biakinn sungah muhnak nei hi tih thei haw hi. Awnkam khatno hei awn thei ngawlin khutpiahin thuson hi.
23Biakinn sungah nadeh a celh ten Zekhariah cu innah pin hi. 24A nungten a zi Elizabeth cu a thacang ngawl toh hangin ha nga sung pikpek pualam tul ngawlin um hi. 25Elizabeth in, “A tawpnak ten Topa in kei bawmin, mipi mai ah ka zahcaknak selsak hi,” tin ti hi.
Jesuh Suahnak Tuk Tangau Ham
26Elizabeth i naupai a ha luknak ten Pathian in, vancungmi Gabriel cu Galilee peng Nazareth khua ah hawhtik hi. 27Kumpi David i cikhaih Josef tuah huaidun tukin thawlthan sa khanglainu i lakah thu pa khat hilhtik hi. Mah khanglainu i min cu Mary hi.#Mt 1:18; 28Vancungmi cu a lakah hungin, “Na humah lemdaihnak um tahen! Topa cu na lakah um hi. Thupha Muicu tampi pia zo,” ti hi.
29Vancungmi i thuhilh a zak ten Mary cu a thinkham mahtak hi. Itih nuamnak nantim tin lamdangsazet hi. 30Vancungmi in, “Mary, lau pahsun hi! Pathian in, na humah hehpihnak nei hi. 31Naupai tuk ci a, capa hing tuk ci. A min Jesuh sa tuk ci.#Mt 1:21; 32Amah cu mi thawmngeng hi tuk a, Cungnungbel Pathian Capa tin sammi hi tuk hi. Amah cu Pathian in, a cikhaihtu David bang bokin kumpi in bawl tuk hi.#2Sam 7:12, 13, 16; Isa 9:7; 33Jakob casuan tei humah kumkhua in kumpi hi tuk hi. A uknak cu bo awng tukma,” ti hi.
34Mary in vancungmi lakah, “Kei cu khanglai him ing. Hi bang thu cu itin hi thei tuk him?” tin ti hi.
35Vancungmi in, “Hawvang Thiangtho cu na nelah um tuk a, Pathian huham cu na humah heng tuk hi. Mah hangin a thiangthomi nau cu Pathian Capa tin sam hi tuk hi. 36Na nu ngual Elizabeth khi na phawklengin hi. Ca neileh thei ma toh tihmi mahnaven atu-in nau a pai sawng ha luk kim zo hi. 37Itahim titale Pathian i bawl theih ngawlmi umma hi,” ti hi.#Pian 18:14;
38Mary in, “Kei cu Topa i salnu ing hi, Na tihnak bangin piang tahen,” tin don hi. Mahceng ten Vancungmi cu hawhlehta hi.
Mary Cu Elizabeth Lak Leng
39Mah nung bek ten Mary cu tuangtimin, Judea ngam mualhum khua ah manlang zetin hawh hi. 40Mahlai a hen ten Zekhariah i innah tumin, Elizabeth cu nuksat hi. 41Elizabeth in Mary i aw a zak bek ten a pum sung a nauno cu phia hi. Elizabeth cu Hawvang Thiangtho tuah dim hi. 42Nging zetin, “Nang cu numei hempoh lak pen thupha muicu a co ngahbelmi hi ci. Na hin tukmi nau hei cu thupha muicu tuah dimmi nauno hi! 43Itahim ka Topa i nu tukin kei lak thongpoh ngen leen na nuam? 44Itahim titale na awn zain, na nuksat bek ten ka pum sung a, nauno cu lungdam zetin dawk hi. 45Topa i thu cu na humah a heng tukin na zakmi heng ngangai tuk hi, tin na muan ngam hi thupha co mi hi ci,” ti hi.
Mary i Pahcoihnak La
46Mary in, “Ka lungmu in,
Topa thangphat hi.
47Kei nunpantu Pathian sungah
ka Hawvang a lungdam hi;
48Itahim titale minauta a salnu
kei phawk leleng hi.
Tu pepan mi hempohin
thupha muicu cotu nu tin
sam haw tuk hi.#1Sam 1:11;
49Cungnungbel Pathian in
kei ca in
thil ngengpi bawl zo hi.
A min cu Thiangtho hi.
50Khang khat nung khang khat,
amah a upatin
maizahtu tei humah;
a hehpih itnak langtik hi.
51A baantha ngil cu zakin,
mi pualthau tei a ngaihsut
tuptah haw, hempoh cu
lengkektik khawng hi.
52Kumpi thawmnei dedeuh khi,
a kumpi khunnak haw pen
khesukin, mi nautate khi
dangto hi.#Job 5:11, 12, 19;
53Ngilkialte thilpha tuah vakin,
mihau cu khut thacang tuah
kiktik hi.
54A pupa tei hum a thutiammi
kimtik hi.
A sal Israel bawm tukin
hung zo hi.
55Abraham le a casuan tei humah
hehpihnak langtik tukin
phawk ngil hihim ma,” ti hi.#1Sam 2:1-10; Pian 17:7;
56Mary cu Elizabeth lakah ha thum laih a um nungten innah pinleh hi.
Tuiphum Johan Suahnak
57Elizabeth cu nau a suah tuk hunkimin, capa hing hi. 58A innnel le unau ten izah takin Pathian a humah pha him tih thu a zak haw ten lungdampih tek haw hi.
59Nauno cu nipi khat a kim ten vunceptan tukin hung haw hi. Nau min cu a pa i min la in, Zekhariah sa tukin um haw hi.#Thiam 12:3; 60Mahnaven a nu in, “Hi ma hi, A min cu Johan hi tuk,” ti hi.
61“Nangmu unau sungah hi min a putu kuamah um cuang ma poh si uh si!” tin ti haw hi. 62A pa lakah nau min akua sa nuam nge cim tih khutpiahin dong haw hi.
63Zekhariah in lai ngatnak calung ngenin, “A min cu Johan hi,” tin a ngat ten mi hempoh lamdangsa haw hi. 64Mah celh bek ten Zekhariah cu awnleh thei in, Pathian pahcawi hi. 65A inn nelte thinsuzet haw in, hithu cu Judea ngam mualhum khua hempoh ah thang khawng hi. 66Hi thu a zatu hempohin, a lungmu sung tek hawah, “Hi nauno hi iti bang mihingin cang tuk laih nantim,” ti tek haw hi. Itahim titale Topa i huham cu nauno humah um hi tih cu ciang hi.
Zekhariah i Thusonmi
67Johan i pa Zekhariah cu Hawvang Thiangtho tuah dimin, hitih bangin Pathian thu phuang hi.
68Israel tei Topa Pathian cu
thangphat nung!
A mihingte bawm tukin le
luattik tukin hung zo hi.
69Ohtei ca in, a ngil zetmi
nunpantu suaktik zo hi,
Amah cu a salpa
David i casuan hi.
70Ni dang laih a, profet tei
thutiam zo toh hi.
71Eimuh huatu le a ngal tei
khut sung pen humhim tukin
72A pu le pa tei lakah,
“Hehpihnak nei tung a,
ka thutiam thiangtho
phawkngil tuk mang,” ti hi.
73-74A pu uh Abraham i lakah,
“Na ngal tei khut sung pen
pan tung.
Launak um ngawlin
ka nadek tuk hi uh ci.
75Na nuncak sung uh hempoh
ka mai ah midikcang
hi tuk uh ci,” tin
thutiamnak bawl hi.
76“Ka cano aw, nang cu a sangbel
Pathian i profet tin
sammi hi tuk ci.
Nang cu atu in
Topa i lampi
sialhamtu tukin
a mai ah hawhham tuk ci.#Mal 3:1;
77A mihing tei lakah
a sualnak haw
a ngaihthiamnak hangin
nunpatmi hi haw tuk
tih thu hilhtu tukin hi.
78A Pathian uh cu mi hehpih thei
nunnemmi hi.
Nunpatnak zing khuavak cu
ohtei lakah vaktik tuk hi.
79Thihnak lim nuai a um tei humah
vanhum pen vaknak
hengsuk tuk hi.
Lemnak lampi ah
hawhtik tuk,” ti hi.#Isa 9:2;
80Nauno cu a pumpi le a hawvang khangto in, ngilcang dedeuh hi. Israel tei lakah zapi theihin, a pua lak laih ngawl sung cu phillawnah um hi.
Zur Zeit ausgewählt:
LUKA 1: NBF1
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Ngawm Bible © Bible Society of Myanmar, 2014.
