JOHAN 20

Khaan Thacang

(Mt 28:1-8; Mk 16:1-8; Lk 24:1-12)

1Nipi ni zingtungno in, Mary Magdalin cu khanah hawh a, khan khahnak suangpekpi cu a thawnsa in mu hi. 2Simon Peter le Jesuh i ihmi nungzuitu a dang tei lakah tai in amu lakah, “Khan pen Topa thiak kuh zo haw, ilai koih haw him tih thei ma ung hi,” tin hilh hi.

3Mahten Peter le a dang nungzuitute cu khanah hawh haw hi. 4A pa nih tai vingveng haw in, a dang nungzuitu cu Peter sangin a tai cak sawdeuh taktohin khanah heng masa hi. 5Khan sung a zoh tum ten luangtuamnak puannemno cu mu hi. Mahnaven khansung cu tum ma hi. 6Ama nungten Simon Peter hengin khansungah tum hi. Luangtuamnak puannemno le Jesuh i lukennak cu mu hi. 7Mahnaven a lukennak puan cu luangtuamnak puan nemno lakah um kha ma hi. Mundangah zialtum denno in um hi. 8Mahten nungzuitu dang a heng masatu vang khansungah tum bokin, a muhbok tak sang bok hi. 9Thihnak pen tholeh tuk hi tin Lai Thiangtho i tihmi cu a sullam thei zo haw ma lai hi. 10Mahten a nungzuitute cu amu innah pinleh haw hi.

Mary Magdalin Lakah Jesuh Lang

(Mt 28:9-10; Mk 16:9-11)

11Mary cu khan pualamah dingin kap li hi. Mahten a kapthahin kun a, khansung cu zo tum hi. 12Vanmi pa nih puan ngo silh ten Jesuh i luang a koihnak hawah a lulamah pa khat, a ke lamah pa khat a khungleng khi mu hi. 13Vanmi ten, “Ita kap li cim?” tin Mary cu dong hi.

“Ka Topa akua nantim a latu, i lai ah koih haw nantim tih thei mang,” tin a kapthahin don hi.

14Mary cu hekkik lehin, mahlai ah Jesuh dingleng bang cu mu naven Jesuh a hihlam thei ma hi. 15Jesuh in, “Numei nu, ita kap li cim? Akua kaw na zei?” tin dong hi.

Mahtin a otpihtu cu huan cingtubel tuk tin ngaisungin Mary in, “Sazapa, nangmah in, na la ahi tale na koihnak cu hilh poh inna, hawhin la tung,” ti hi.

16Jesuh in, “Mary!” tin sam hi.

Mary in, Jesuh i lakah hekin, Hebru awnin, “Rabboni” tin ti hi. Rabboni tih cu “Sazapa” tihnak hi.

17Jesuh in Mary lakah, “Keimah zen hih pahsun! Itahim titale pa i lakah heng ma laih ing. Mahnaven ka unau tei lakah hilhta inna, a Pa haw ahi bokmi ka Pa, a Pathian haw ahi bokmi ka Pathian nelah hawh tung hi, tin hilhin,” ti hi.

18Mahten Mary Magdalin cu hawhin, Topa a muhnak thu le ama lakah a otmi hempoh cu nungzuitu tei lakah hilh hi.

Nungzuitu Tei Lakah Jesuh Lang

(Mt 28:16-20; Mk 16:14-18; Lk 24:36-49)

19Mah Nipi ni taklamin nungzuitute munkhatah tawkdun khawm haw hi. Judah thuneitute a lau haw hangin kongka hempoh khak khawng haw ten Jesuh cu langin amu lakah dingin, “Nohtei lakah lemdaihnak um tahen,” ti hi. 20Mahtin a ot celh ten a khut le a naak lak hi. Nungzuitute cu a Topa haw amuhleh haw ten lungdam mahtak haw hi. 21Jesuh in amuh tei nelah, “Nohtei lakah lemdaihnak um tahen! Ka Pa in, a tiik bangin nangmuh vang tiik bok ing,” ti hi. 22A hum hawah a haihawh cu hawl tulin, “Hawvang Thiangtho cota un! 23Mi sualnak na ngaidam uh tale ngaihdam hi haw tuk a, na ngaidam ma uh tale ngaihdam ngawl hi haw tuk,” ti hi.#Mt 16:19; 18:18;

Jesuh le Thomas

24Nungzuitu sawm le pa nih lak pen pa khat (Caphil tihmi) Thomas cu Jesuh a lang laihin amu lakah um kha ma hi. 25Mah hangin nungzuitu dang ten, “Topa mu ung hi,” tin hilh li haw naven Thomas in, “A khut thikin, a khetnak haw meima pawn mu in, ka khut tuah mah meima pawn zenin le a pang ka zen laih ngawl sung cu um thei tuk mang,” ti hi.

26A nung nipi khat lawi ten nungzuitute inndat sungah um haw a, Thomas vang um bok hi. Kongkalh haw naven Jesuh cu langin a laklawh hawah dingin, “Nohtei lakah lemdaihnak um tahen,” ti hi. 27Mahten Thomas i lakah, “Hilai ah na khutzung tuah zenin, ka khut zo inna, na khut tuah ka naak hi zenin hi. Umthei ngawlin um toh pahsun; um tohin,” ti hi.

28Thomas in, “Ka Topa le ka Pathian,” ti hi.

29Jesuh in, “Na muh hangin um poh sisi? Keimah mu ngawl napi in, a sangtute cu thupha ngahmi haw hi,” ti hi.

Hi Laibu i Tuptahmi

30A nungzuitu tei mitmuhah, Jesuh i nalamdang tampi a bawlmi cu laibu sungah ngat khak ngawl tampi um hi. 31Mahnaven hi zong hi ngan ing a, ka ngatnak sullam cu noh ten Jesuh cu Khrih, Pathian Capa hi tih umin amah na muannak uh i hangin nunnak na neihnak tukin hi.

Zur Zeit ausgewählt:

JOHAN 20: NBF1

Markierung

Kopieren