JOHAN 19
19
1Pilat in, Jesuh cu kai tulin ngalkapte vattik hi. 2Ngalkap ten lingkung tuah phanmi lukhuh khutikin, puansan silhtik haw hi. 3A lakah hawhin, “Judah Kumpipa cu a nunkhua sau tahen,” tin ti in, bengvawk haw hi.
4Pilat cu tul lehin mipi tei lakah, “Ngai hem un! A humah thah tuk takin sualnak mu mang tih langtiknakin nangmu lakah hunpih tung,” ti hi. 5Ling lukhuh khu in le puansan silhin, Jesuh cu tul hi. Pilat in amuh tei lakah, “Zo hem un! Hilai hah na mihing pa uh cu um hi!” tin ti hi.
6Thiampi upate le biakinn cingtu palik ten amuh haw ten, “Thinglamteh humah thatin hi! Thinglamteh humah thatin hi,” tin au haw hi. Pilat in amu lakah, “Nangmuh in pui unna, thinglamteh humah thatta un! Kei in, a humah thihnak tham tianin, a sualnak mu mang,” ti hi.
7Mipi ten, “Daan a neihsa uh bangin a thih kul hi. Itahim titale Pathian Capa ing hi tin ti si,” tin don haw hi.
8Pilat in mah thu a zak ten lau deuh hi. 9A inn sungah tumlehin Jesuh cu, “Ilai lam pen hung kam?” tin dong hi.
Mahnaven Jesuh in don ma hi. 10Pilat in, “Don tukma cim? Nangmah hah theihnak le thah theihnak thu ka neihlam hi thei ma cim?” tin ti hi.
11Jesuh in, “Ka hum a thu na neih theihnak cu Pathian in, a piak hangin hi. Mah hangin nang sangin nangma khutah a hengtiktu khi sual saw,” ti hi.
12Pilat in mah thu a zak ten Jesuh i luat theihnak tuk lampi zei hi. Mahnaven mipi ten, “Hi pa na hah tale Rom kumpipa i ngualcam hi ma ci. A kuakua hei hihen kumpi ing, a tiduntu cu Rom kumpipa i ngal hi!” tin au tawtok haw hi.
13Mah awnkam cu Pilat in, a zak ten Jesuh cu pualamah tulpihin, “Suangphah inntual,” tihmi thukhentu i khunnakah khung hi. Mahlai mun cu Hebru awnin “Gabbatha” ti haw hi. 14Kaltan Puainak tuk ni khat bek sap ni hi in, mah sun hawng ten Pilat in mipite cu “Na kumpipa uh hi maw thinglamteh humah ka thah tuk?” tin dong hi.
15Amuh ten, “That in! That in! Thinglamteh humah thatin hi,” tin au tawtok haw hi.
Pilat in, “Na kumpipa uh hi maw thinglamteh humah ka thah tuk?” tin dong lehleu hi.
Thiampi upa ten, “Kohten Rom Kumpi bek nei ung,” tin ti haw hi.
16Mahten Pilat in Jesuh cu thah tukin amu khut sungah pia hi.
Thinglamteh Humah Jesuh Khai Haw
(Mt 27:32-44; Mk 15:21-32; Lk 23:26-43)
17Jesuh cu a thinglamteh pua thahin tulpih haw a, “Lu-nguh mun,” a tih haw mi Hebru awnin, “Golgotha,” ah hawhpih haw hi. 18Mahlai pen Jesuh cu thinglamteh humah khen haw hi. Adangmi pa nihte vang khen bok haw in, a laklawhah Jesuh cu tak haw hi. 19Pilat in laitak tuk nganin, thinglamteh humah taktik hi. Mah a laingatmi cu, “Nazareth mi Jesuh, Judah kumpipa,” tin ngan hi. 20Jesuh a taknak haw mun cu khuapi pen a khawla ngawl hangin mi tampi ten mah laingat cu sial haw hi. 21Thiampi upa ten Pilat cu, “‘Judah kumpi pa,’ tih hi ngawlin, ‘Judah kumpipa ing a titu, tin nganin hi,’ tin ti haw hi.”
22Pilat in, “Ngan zo ing, ka ngatsa bangin um poh hen,” ti hi.
23Ngalkap ten Jesuh cu thinglamteh humah a khet celh haw ten, a puan cu la in, pa khat tek co tukin khen li suah haw hi. Cet tuah khui hi ngawlin tahmi a angki cualpi hei cu la haw hi. 24Ngalkap ten, “Hi angki cualpi cu botkek tukma hung. Akua in co tuk tih theihnakin awngbali sawk saw tuk hung,” tin ti haw hi. Hiti bangin thil a piannak cu Lai Thiangtho sung a, “Ka puan cu sem haw in, ka angki cualpi cu awngbali sawk haw,” tih thu a kimnak tukin hi. Mahti bangkekin ngalkap ten bawl haw hi.#Saam 22:18;
25Jesuh i thinglamteh elah a nu, a nu i naunu le Klopas i zi Mary le Mary Magdalin ding leng haw hi. 26Jesuh in, a nu le a ihmi a nungzuitu pa cu mahlaiah a din leng haw mu in, a nu lakah, “Amah cu na capa hi,” ti hi.
27Mahten a nungzuitu tei lakah, “Amah cu na nu uh hi,” tin ti hi. Mah pepanin nungzuitu pa in, Jesuh nu cu a innah umtik hi.
Jesuh Thihnak
(Mt 27:45-56; Mk 15:33-41; Lk 23:44-49)
28Jesuh in ihempoh kim khawng zo hi tih khi thei hi. Lai Thiangtho sung a ummi kimtiknak tukin, “Ka dangdum,” tin ti hi.#Saam 69:21; 22:15;
29Mahlai ah sabittui-thuk beel khat um hi. Mah sabittui-thuk sungah puansia nim haw a, hyssop ngolhlekah kencihin Jesuh i kamah noihto haw hi. 30Jesuh in mah tuithuk cu cawpin, “Ceng khawng zo hi!” ti hi.
Mahten a lu kunin catsukta hi.
Jesuh Naak Sun Haw
31Judah thuneitute cu Pilat lakah hawhin, thinglamteh humah a thah haw mitei ke ektuah tukin le a luang la tukin ngen haw hi. Mah a nget haw ni cu tawngkai ni nga ni hi. Ita ngen haw him titale a thah haw mi miluang cu Sabbath ni-in thinglamteh humah zancam tuk khi deih haw ma hi. Mah Sabbath ni cu ni thiangtho cuang hangin hi. 32Mah hangin ngalkapte cu hawhin Jesuh tuah a thah haw mi masa saw pa khat pa i ke ektuah mahceng ten a dang pa khat pa i ke vang ektuah bok haw hi. 33Mahnaven Jesuh lakah a hen haw ten thi ciang zo tih khi amuh haw hangin amah cu a ke ektuah haw ma hi. 34Ngalkap pa khatin, Jesuh i naak pen a ceipi tuah sunto a, thakhatin thi le tui thiang luang tul hi. 35Mah thil a mutu amah loli i otmi hi na up theihnak tukin hi. A hilhmi cu a dikmi hi, amah vangin thutak son ing hi tih khi thei hi. 36Hitih bangin thil a piannak cu Lai Thiangtho sungah, “A nguh pa khatno hei ektuah haw tukma hi,” tin, a ummi khi a kimnak tukin hi.#Suah 12:46; Mipum 9:12; Saam 34:20; 37Lai Thiangtho mundangah, “A dawh haw mi khi miten zo haw tuk hi,” tihvangin um hi.#Zek 12:10; Mang 1:7;
Jesuh Vui Haw
(Mt 27:57-61; Mk 15:42-47; Lk 23:50-56)
38Mahnung ten Arithmathea khua mi Josef in, Jesuh luang la tukin Pilat lakah ngen hi. Josef cu Jesuh nungzuitu pa khat hi, mahnaven Judah hotu a lau hangin a kuhno in zui ngut hi. Pilat in Jesuh luang cu la thei ci, a tih ten Josef in la hi. 39Jesuh tawk tukin zanlamin, a hungtu Nikodemas vang Josef lakah telbokin, zimui pawng za khat hawng, mura zimui le cingnai cokhelmi cu keng hi.#Jn 3:1-2; 40A pa nih haw in Jesuh i luang cu la in, Judah mitei mithi vui daan bangin zimui noihin puan ngo nemno tuah cuun haw hi. 41Jesuh a thahnak haw munah huan pa khat umin, mah huan sungah kuamah vui awng ngawlnak khan thak pa khat um hi. 42Sabbath ni heng awndiak toh hangin mahlai ah vui haw hi.
Zur Zeit ausgewählt:
JOHAN 19: NBF1
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Ngawm Bible © Bible Society of Myanmar, 2014.