Īmbōmbo Sya Batumịgwa 6
6
Abatūlị ba batumịgwa bahāno na babili
1Lelo mmasịku gāgo, bo abafụ̄ndịgwa bịkōngelapo ukubāla, kwalịpo ukwịbụnēsya mbaJụ̄ta bakiGịlịkị kuBahịbuli. Balinkwịbụnēsya ukuti bịkubị̄bwa ukubajabịla abakị̄kulu bābo abafwile amasịku gōsa. 2Po papo abīlongo na babili bala balinkukibilikila ikilūndilo kya bafụ̄ndịgwa, balinkubabūla balinkuti: Kukaja kunụnụ uswe ukuti tulekege ukulūmbilila ilịsyu lya Kyala panōngwa ja kujabanịa ifị̄ndu. 3Lilino lelo mwe bāmyitu, amụsalege mmyinụ abāndu bahāno na babili, aba bafụmwịke ubunụnụ, aba bị̄swile Mbepo na mahala, ukuti bo tubabīkege pambōmbo jijiji. 4Lolị uswe tụkulūmililaga ulwịpụ̄to, nukulūmbilila ilịsyu.
5Ilịsyu lilīli lilinkubakyela bōsa abā nkilūndilo, po papo balinkubasala ba Sịtefanị, umụ̄ndu uju āliswịle ulwịtiko na Mbepo mwịkemo, na Fịlịpụ na Pulokolị na Nịkanolị na Tịmonị na Palịmena na Nịkolai uju apīndukị̄le Mbujụ̄ta ugwa mwa Antyokịja. 6Bo balinkubabīka nkyenị mbatumịgwa. Lelo bo bịpụ̄tịle, balinkubabīkapo amaboko.
7Po papo ilịsyu lya Kyala lilinkubāla, nubwịngị bwa bafụ̄ndịgwa bulinkōngelapo ukubāla fị̄jo mụ Jelụsalemụ; kyope ikilūndilo ikikulūmba ikya bapụ̄tị kilinkulwambilila ulwịtiko lula.
Ukukolịgwa kwa Sịtefanị
8Umwene Sịtefanị, uju āliswịle ilị̄pyana na maka, jo alinkupela ifị̄ka nifị̄swigu ifịkulūmba mbāndu. 9Lolị abāndu bamo balinkusokoka ukuti bakānịkanege na Sịtefanị. Abāndu bababo, bamo bāli ba nnyụ̄mba ja kwịpụ̄tilamo iji bạ̄tigi: Nyụ̄mba ja kwịpụ̄tilamo ja bāndu abābuke bo bāfụmịle mụ Kịlene na mụ Alịkịsandalịja, nāba mụ Kịlịkịja, nāba mwa Asịja. 10Lolị bakālintolịle kunōngwa ja mahala gāke na kunōngwa ja Mbepo Mwịkemo uju anndōngosyaga bo ali pakujoba. 11Po papo balinkubapāla abāndu ukuti bakātigi: Tumpilị̄ke umụ̄ndu uju bo ịkujoba amasyu agā kunhēlụla Mose na Kyala. 12Balinkubasāmbulanịa abāndu, na mafụmụ na nabamanyandagilo, bo balinkummotokela balinkunkola, balinkuntwala nkyenị ndukomāno. 13Balinkubīmịka abakētị ba batūngulu aba bạ̄tigi: Umụ̄ndu uju atịkuleka ukujoba amasyu ga kupahēlụla pabujo ubwịkemo ubu, nululagilo lwa Mose. 14Namanga twalimpilị̄ke bo ịkujoba ịkuti: Jesụ gwa mụ Nasaletị uju, ịsakupōnāngaga pabujo ubu lōsa nukusyandula īnyị̄ho isị ātupēle Mose. 15Lelo bo banndulalị̄le Sịtefanị bōsa aba bāli ndukomāno, balinkwaga ikyenị kyake kili bo ikyenị kya gwandumị.
Zur Zeit ausgewählt:
Īmbōmbo Sya Batumịgwa 6: NYB96
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Nyakyusa Bible © Bible Society of Tanzania, 1996.
