Īmbōmbo Sya Batumịgwa 5

Ubusyobị bwa Ananịja na Sapila

1Lolị umụ̄ndu jumo uju ali jo Ananịja īngamụ, pamopēne nunkasị Sapila, balinkūlisya ikị̄su kyabo. 2Umwene alinkutapulapo īndalama, jope nunkasị āsịmēnye; po papo ikijabo kimo alinkukitwala, alinkukibīka mmalūndi ga batumịgwa. 3Po papo Petelị alinkunndālūsya alinkuti: Ananịja fịkị ukuti Setano ị̄sulege mụndụmbụla jako, ukuti unsyobēge Mbepo Mwịkemo, apa utapwịlepo īndalama sya kị̄su iki gūlị̄sye? 4Apa gwali nakyo po kikāli kyako? Kangi bo kyulisị̄gwe, kikāli mmaka gāko? Syo usịbīkịle syakị sịsịsị mụndụmbụla jako? Ungātigi ubasyobịle abāndu, himma, lolị unsyobịle Kyala. 5Umwene Ananịja bo agapilị̄ke amasyu gagaga, alinkugwa pāsi, alinkufwa. Po papo ulutēnde ulukulūmba lulinkubāga abāndu bōsa aba bāpilikaga. 6Po papo abalumyana balinkusụmụka, balinkunniembetelela mmyenda, balinkusōka nagwe, balinkwakunsyila.

7Lelo bo tukīndịle utubalilo tutatu, po papo jope unkasị alinkwịngila kisịtakumanya isị syabonị̄ke. 8Po papo Petelị alinkunndālūsya alinkuti: Mbūla linga mo mụmo mwalyulikị̄sye ikị̄su kyinụ? Umwene alinkwamụla alinkuti: Ena, mo mụmo. 9Po papo Petelị alinkummbūla alinkuti: Fịkị mwịtikēne ukunngela Mbepo gwa NTWA? Kēta amalūndi ga aba bāli pakunsyila unndumego gali pakifịgo, bịkuja pakukupīmba nanụngwe. 10Nakalīnga ịtolo Sapila alinkugwila mmalundi gāke alinkufwa; lelo bo bịkwịngila abalumyana balinkwaga afwịle. Po papo balinkumpimba balinkwakunsyila pamopēne nu nndume. 11Po papo ulutēnde lulwịngị lulinkukyaga ikipānga kyosa, na kubāndu bōsa aba bāsịpilikaga sịsịsị.

Abatumịgwa bịkubōmba ifị̄ka nifị̄swigu fịfị̄ngị

12Po papo abatumịgwa balinkubōmba ifị̄ka nifị̄swigu fịfị̄ngị mbāndu. Abị̄tikị balinkukomāna pamopēne mwịbalasa lya Solomonị. 13Umụ̄ndu gwesa uju akāli mwịtikị, akālipo najumo ugwa kukịba ukuti ajege pamopēne nabo lolị abāndu balinkubīmịka fị̄jo. 14Abēne aba bammwịtikaga UNTWA, ifịlūndilo fya banyāmbala nifya bakị̄kulu fịlinkōngelapo ukukīnda. 15Po apa abāndu balinkubapīmbila ababịne mmịpūlo, balinkubalambalika pafịtala na pāndato, ukuti bo Petelị ịkukīnda, nalīnga nsyungūlu gwake, gubāgege bamo. 16Po papo balinkubūngāna bope na bāndu abị̄ngị aba ntwaja utu tunsyungūtị̄le Jelụsalemụ. Balinkubatwala ababịne naba bākubilwaga niīmbepo īnyalị, bōsa ịtolo balinkubūmbulusịgwa.

Abatumịgwa bịkukubilwa

17Po papo alinkusụmụka umpụ̄tị unkulūmba pamopēne na bōsa aba bāli nagwe aba nkipānga kya Basatukaị, kalinkubāga akabịnị kubatumịgwa, 18balinkubakola balinkubị̄galila nnyụ̄mba ja bannyololo. 19Loli ugwandumị gwa NTWA alinkwịgula īnyị̄gị sya nyụ̄mba ja bannyololo pakilo, alinkubasōsya pānja, alinkubabūla alinkuti: 20Amụbūkege mụkīmege nukubabūla abāndu nnyụ̄mba ja NTWA amasyu gōsa agā bumị ubupya bububu. 21Abēne bo bapilị̄ke sịsịsị, balinkubūka nnyụ̄mba ja NTWA bo bukị̄le nulubūnju fị̄jo balinkumanyịsya.

Po papo alinkwịsa umpụ̄tị unkulūmba naba bāli nagwe, balinkubilikila ulukomāno lwa mafụmụ ga bany'Ịsịlaelị, balinkubatuma abāndu kunyụ̄mba ja bannyololo, ukuti batwalịgwege. 22Abēne ababōmbị bo bājịlekufịka balinkusịta nukubāgamo nnyụ̄mba ja bannyololo, po papo balinkugomoka balinkwakubabūla balinkuti: 23Īnyụ̄mba ja bannyololo tujagịle nyị̄gale kanụnụ ịtolo, bope nabalindililị bīmịle pafịfịgo, lolị bo twịngị̄le tukammwagamo najumo nkāti. 24Umwene unndindilila nyụ̄mba ja NTWA na bapụ̄tị abakulūmba bo bapilị̄ke amasyu gagaga, balinkwalāngana ịtolo, ukuti syo sịkujaga bulebule sịsịsị. 25Po papo alinkwịsa umụ̄ndu jumo alinkubapāngila alinkuti: Kēta, abāndu aba mwabị̄galị̄le nnyụ̄mba ja bannyololo, bīmịle nnyụ̄mba ja NTWA bịkubamanyịsya abāndu. 26Po papo unkulūmba gwa balindililị alinkubūka na babōmbị alinkwakubēga, lolị komma kumaka, namanga bābatị̄laga abāndu ukuti bangịsakubatịkaga na mabwe.

27Lelo bo babatwele, balinkubīmịka nkyenị ndukomāno. 28Po papo umpụ̄tị unkulūmba alinkubalālūsya alinkuti: Tubakānịsye fị̄jo ukuti mụngamanyịsyaga mụ̄ngamụ ja mụ̄ndu jujuju, kēta lilino mụmmwị̄swisye Jelụsalemụ nulumanyịsyo lwinụ, mụkulōnda ukutupela nanụswe ukuti twalịmo nkōna ilịlopa lya mụ̄ndu uju. 29Po papo Petelị na batumịgwa abanịne balinkubāmụla balinkuti: Uswe tụkuntị̄laga Kyala po papo ukukīnda abāndu. 30Kyala gwa bị̄sukulu bītu, jo uju ālisyusị̄sye Jesụ, uju umwe mwalịnngogịle, pala mụntulikege pakipịkị. 31Umụ̄ndu uju, jo Kyala ammwimị̄ke nikiboko kyake ikị̄līlo, ukuja Nndōngosị, kangi Mpokị gwa kwịsakubapa abany'Ịsịlaelị ulupīnduko nubuswe bwa nōngwa. 32Lelo nanụswe twịpelịle ukuja bakētị ba nōngwa sịsịsị pamopēne na Mbepo Mwịkemo, uju Kyala abapēle aba bịkuntị̄la.

33Lelo bo bapilike sịsịsị, sịlinkubalasa mụ̄nda, balinkulōnda ukubagoga. 34Po papo jumo ugwa ndukomāno, Umfalịsaị, uju ali jo Gamalyelị īngamụ, ummanyịsyandagilo uju bammwimịkaga abāndu bōsa, alinkwima ndukomāno, alinkulagila ukuti abāndu aba basōsịgwe pānja kukabalilo akapị̄mba, 35po papo alinkubabūla alinkuti: Mwe banyāmbala ba Ịsịlaelị umwe, syo mwandege isị mụkuja pakubabōmbela abāndu aba; 36buno mmasịku aga gakīndịle, alinkusụmụka Toịta, alinkwịjoba mwene ukuja jo mụ̄ndu jumo unkulūmba, uju balinkunngoga abāndu aba bāli pābāmịa bāna (400), umwene bo agogị̄gwe, bōsa aba bammwịtikaga balinkunyāmbanịka; sịlinkwịpela ukuja sya ịtolo. 37Pānyụma pali uju alinkusụmụka Jụ̄ta ugwa mụ Galịlaị, mmasịku ga kubalị̄gwa abāndu, alinkubakwaba abāndu ikilūndilo ukuti bankōngege mụ̄nyụma; jope alinkugogịgwa, bōsa aba bammwịtikaga balinkunyāmbanịka. 38Po apa lilino nịkubabūla une nịkuti: Amụbēpukilege abāndu bababa, mụbalekege; namanga apa linga sịsịsị bị̄nogwịne bābo pamo linga isị bịkubōmba sịfụmịle mbāndu, po sịsakufụbaga. 39Lolị linga sịfụmịle kwa Kyala, po mụtịsakusịtolaga, ukuti mụngịsakwagịgwa ukuja balwa na Kyala.

Po papo abēne balinkummwịtika. 40Lelo bo babakolị̄le abatumịgwa, balinkubakoma nifịkotị, balinkubakānịsya ukuti bangamanyịkisyaga mụ̄ngamụ ja Jesụ; balinkubalekesya. 41Po papo balinkusōkamo ndukomāno nulusekelo, papo bālyagịle ukuti kubabagị̄le ukujwelụkila pāngamụ ja Jesụ. 42Bwịla ịtolo balinkusịta nukuleka ukumanyịsya nukufụmụsya īnōngwa nnyụ̄mba ja NTWA na nnyụ̄mba syabo, īnōngwa īnụnụ isya Jesụ Kilisịtị.

Zur Zeit ausgewählt:

Īmbōmbo Sya Batumịgwa 5: NYB96

Markierung

Kopieren