Īmbōmbo Sya Batumịgwa 4

Petelị na Johanị ndukomāno

1Petelị na Johanị bo bali pakujoba nabāndu, po papo balinkwịsa kumyabo abapụ̄tị, nunndindilila nyụ̄mba ja NTWA na Basatukaị; 2bo bakalēle papo bāmanyịsyaga abāndu nukufụmụsya mụngamụ ja Jesụ isya kusyuka kwake mbafwe. 3Po papo balinkubakola, balinkubị̄galila nnyụ̄mba ja bannyololo ukufịka nulubūnju, papo gāli majolo, 4Lolị bị̄ngị mụli aba bapilị̄ke ilịsyu balinkwịtika; abanyāmbala bāli baelufụ bahāno (5,000) ubwịngị.

5Po papo nulubūnju balinkubūngāna mụ Jelụsalemụ abalagilị, amafụmụ na bamanyandagilo. 6Balinkukomāna pamopēne na Hanasị umpụ̄tị unkulūmba, na Kajafa na Johanị na Alịkịsanda, bōsa na bakamụ bampụtị unkulūmba. 7Lelo bo bababīkịle pakāti, po papo balinkubalālūsya balinkuti: Isị mụkubōmba, mụkubōmbela mmaka makị, na mụngamụ nngị?

8Po papo Petelị bo ị̄swile Mbepo Mwịkemo, alinkubabūla alikunti: Mwe balagilị ba bāndu na mwe mafụmụ, 9linga tụkulālūsịgwa umụ̄syugu panōngwa ja mbōmbo īnụnụ iji abōmbelị̄gwe umụ̄ndu ummbịne uju, ukuti abūmbulwịke bulebule, 10syo mụ̄manyege mwesa na bāndu bōsa abany'Ịsịlaelị ukuti, mụ mmaka ga ngamụ jake Jesụ Kilisịtị ugwa mụ Nasaletị, uju umwe mwalịnkomị̄le pakikohekano, uju Kyala ālisyusị̄sye mbafwe, mụli jujuju mo mụmo umụ̄ndu uju īmịle nkyenị mmyinụ unkafụ ịtolo. 11Jesụ Kilisịtị jujuju, jo ịbwe ili lyasyokelị̄gwe nanụmwe mwe bajēnga nyụ̄mba, lyo lị̄pelịle ukuja ịbwe ịkulūmba lya pāngụto. 12Bukajamo nabumo ubupokị mmụ̄ndu ujūngi; namanga jikajako najimo īngamụ ijīngi nkị̄su kyosa, iji tubagị̄le ukubwagilamo ubupokịgwa uswe.

13Lelo bo babubwene ubukịfụ bwa Petelị na Johanị, bo basyagēnịe ukuti bakamanya kalata, kangi bakaja bamang'anyị, balinkunswịganịka, balinkusyaganịa ukuti bo aba bali nagwe Jesụ.

14Lolị bo bammbwene umụ̄ndu uju ābūmbulusị̄gwe īmịle pamopēne nabo, balinkusịta nukuja nalyo nalịmo ilya kwamụla. 15Lelo bo babalagị̄le ukuti basōke pānja ndukomāno, balinkulālūsanịa bābo batupu bo bị̄jēkị̄le, 16balinkuti: Tubōmbe fịkị nabo abāndu aba? Namanga sịli pabwelụ kubāndu bōsa aba bali mụ Jelụsalemụ isya kuti, abāndu aba babōmbịle ikị̄ka ikikulūmba, tukabagila nukukāna. 17Lolị ukuti sịsịsị sịngakīndililaga ukubalanịla mbāndu, ịsaga tubatetemesye, ukuti bāngāndisyaga ukujoba numụ̄ndu najumo īngamụ ja Jesụ. 18Lelo bo babalekịle, balinkubakānịsya fị̄jo ukuti bangafụmụsyaga nukumanyịkisya mụngamụ ja Jesụ. 19Lolị Petelị na Johanị balinkubāmụla balinkuti: Linga kunụnụ nkyenị mwa Kyala ukubapilika umwe, ukukīnda ukumpilika Kyala, syo mụtụmụlege jujumwe. 20Namanga uswe tukabagila ukuleka ukusịjoba isị tusịbwene naisị tusịpilị̄ke. 21Abēne bo bōngị̄lepo ukubatetemesya, po balinkwenda nukubābula, papo bakājagịle injila ja kubafụndilamo, panōngwa ja bāndu; namanga abāndu bōsa bammwimịkaga Kyala pali isị syabonị̄ke. 22Namanga umụ̄ndu uju kyapelị̄gwemo ikīswigu kikīki, ifyinja fyake fyakīndịle pamalōngo mana (40).

Abị̄tikị bịkunsūma Kyala ukuti abakasyege

23Lelo bo bababūlịle, po papo Petelị na Johanị balinkubūka kubị̄nābo, balinkubabūla syosa isị abapụ̄tị abakulūmba na mafụmụ bababūlịle. 24Abēne bo bapilị̄ke, balinkwịnula ilịsyu lyabo palikimokyene kwa Kyala balinkuti: Gwe NTWA gwe mwenenafyo fyosa, gwe gwapelịle ikya kumwanya nikya pāsị, ninyanja na fyosa ifị fịlịmo, 25gwe gwajobị̄le mwa Mbepo Mwịkemo nkanwa mwa Tāta Ndabitị, ummbōmbị gwako gwatị̄le:

Abāpānja bājwegaga fịkị?

Abāndu bịnogonaga syakị isya ịtolo?

26Abatwa ba nkị̄su bālịtendekịsye,

nabalagilị bakomēne pamopēne,

pakunsambukila UNTWA na ju Mesịja gwake.

27Namanga nalolị nkāja aka, ba Helotị, ba Pontị Pịlati,

abāpānja, na bany'Ịsịlaelị bammbūngānịle ummbōmbị gwako umwịkemo Jesụ, uju umpelịle ukuja jo Mēsịja. 28Ena, bābūngēne ukuti babōmbēge isị gwalịnogwịne nukubạ̄tika nganị liịjolo, namaka gāko nubwịgane bwako. 29Lilino lelo gwe NTWA ukētege ukutị̄lisya kwabo, utupege twe babōmbị bāko ukulilūmbilila ilịsyu lyako nubukịfụ bōsa. 30Golosya ikiboko kyako ubabumbulusyege abāndu. Ubōmbēge ifị̄ka nifị̄swigu mụngamụ ja Jesụ, ummbōmbị gwako umwịkemo.

31Lelo bo bị̄pụ̄tịle po papo pabujo apa bābūngēne palinkusenyendeka; bōsa balị̄swile Mbepo Mwịkemo, balinkulūmbilila ilịsyu lya Kyala nubukịfụ.

Ubulilanịsị bwa bị̄tikị

32Po papo ikilūndilo kya bị̄tikị kilinkuja nindụmbụla jimojēne, numōjo gumogwene, akālipo najumo ugwa kuti ifị ali nafyo fyake mwene, lolị balinkulilanịla fyosa ịtolo ifị bali nafyo. 33Po papo abatumịgwa balinkusịsịmikisya namaka amakulūmba isya kusyuka kwa NTWA Jesụ, umwene Kyala alinkubōnela ulusajo lu lwịngị. 34Namanga akālipo najumo unndōndo mmyabo, papo bōsa aba bali nifị̄su naba bali ninyụ̄mba balinkūlisya, 35balinkutwala īndalama sya ifị̄ būlisyaga, balinkusịbīka mmalūndi ga batumịgwa, balinkubajabila jumo jumo bo mụmo umụ̄ndu gwesa ālōndelaga. 36Bunobuno Josefụ uju abatumịgwa bālimpēle ija Balịnaba, (ko kuti Mụ̄ndu gwa lusūbisyo), unnya Lebị pakikolo, ugwa mụ Saịpụlasị, 37jo alinkūlisya unngūnda gwake, bo ūlị̄sye alinkutwala īndalama, alinkusịbīka mmalūndi ga batumịgwa.

Zur Zeit ausgewählt:

Īmbōmbo Sya Batumịgwa 4: NYB96

Markierung

Kopieren