Genesis 9
9
Dios tsi' yʌq'ue i t'an Noé
1Dios tsi' yʌq'ue i yutslel i t'an Noé yic'ot i yalobilob. Tsi' subeyob: Yom tilic cabʌl la' p'olbal. Yom mi la' p'ojlel. But'ula jini pañimil. 2Mi caj i bʌc'ñañetla pejtel bʌte'el ti pañimil yic'ot pejtel mut, yic'ot pejtel jʌlʌcña bʌ mi' majlel ti lum, yic'ot chʌy. Ti pejtelel mi cʌq'ueñetla ti la' wenta. 3I bʌlʌch la' ñʌc' pejtel cuxul tac bʌ mu' bʌ ti xʌmbal. Che' bajche' tsa cʌq'ueyetla pimel yic'ot yambʌ i wut lum, mi cʌq'ueñetla pejtel chuqui tac an. 4Pero mach la' c'ux yic'ot i ch'ich'el come tic'bil. Jiñʌch i cuxtilel. 5Mi caj j q'uextʌben i jontolil jini mu' bʌ i cha'len tsʌnsa mi bʌte'el o mi winic. Joñon mi caj j q'uextʌben i mul. 6Majqui jach mi' bec'ben i ch'ich'el winic, mi caj i tsʌnsʌntel ja'el, come Dios tsi' mele winic ti' yejtal. 7Yom mi la' p'ojlel jatetla. La' p'ojlic la' walobilob. La' bujt'ic pañimil ti winicob, che'en.
8Dios tsi' sube Noé yic'ot i yalobilob: 9-11Awilan, mi cʌq'ueñetla xuc'ul* bʌ c t'an ti la' tojlel yic'ot ti' tojlel jini talto bʌ la' p'olbal. Mi cʌq'uen trato bʌ c t'an ja'el jini mut yic'ot alʌc'ʌl yic'ot bʌte'el che' bajche' jaycojt tsa' loq'ui ti barco. Ma'anix mi caj c chʌn jisan pejtel pañimil ti but'ja'. 12Q'uelela i yejtal xuc'ul bʌ c t'an mu' bʌ c wa'chocon yic'otetla yic'ot pejtel cuxul tac bʌ am bʌ la' wic'ot, yic'ot pejtel cuxulo' bʌ mu' bʌ caj i tilelob. 13Mi cʌc' t'oxja' ti tocal. I yejtalʌch jini xuc'ul bʌ c t'an mu' bʌ cʌq'ueñob jini año' bʌ ti pañimil. 14Che' mic pʌy tilel tocal ti pañimil, mux i q'uejlel t'oxja' ti tocal. 15Mi caj c ña'tan xuc'ul bʌ c t'an tsa' bʌ cʌq'ueyetla, tsa' bʌ cʌq'ueyob pejtel cuxul tac bʌ ti jujunchajp. Mach chʌn talix but'ja' cha'an mi' jisan pejtel cuxul tac bʌ ti pañimil. 16Mi caj i tilel t'oxja' ti tocal. Mi caj j q'uel joñon cha'an mic ña'tan xuc'ul bʌ c t'an tsa' bʌ cʌq'ueyob pejtelel cuxul tac bʌ am bʌ ti pañimil, che'en Dios. 17Dios tsi' sube Noé: Jiñʌch i yejtal xuc'ul bʌ c t'an tsa' bʌ cʌq'ueyob winicob yic'ot pejtel cuxul tac bʌ ti pañimil, che'en.
Yʌc jini Noé
18I yalobilob Noé tsa' bʌ loq'uiyob ti barco jiñobʌch Sem yic'ot Cam yic'ot Jafet. Cam jiñʌch i tat Canaán. 19Jiñobʌch i yalobilob Noé. Uxtiquil winicob. I ñojte'elobʌch pejtel winicob x'ixicob ti pañimil.
20Noé tsa' caji' top' lum. Tsi' pʌc'ʌ ts'usubil. 21Tsi' japʌ vino. Tsa' yʌc'a. Pits'il Noé ti' mal pisil bʌ i yotot. 22Cam, i tat Canaán, tsi' q'uele pits'il i tat. Tsa' loq'ui majlel i subeñob i yʌscun yic'ot i yijts'in año' bʌ ti jumpat. 23Sem yic'ot Jafet tsi' ch'ʌmʌyob pisil. Tsi' lic q'uecheyob tilel pisil ti' quejlab ti cha'ticlel. Wʌlʌcpat tsa' ochiyob. Tsi' mosoyob i tat che' pits'il. Tsi' mʌyʌyob i wut. Ma'anic tsi' q'ueleyob i tat che' pits'il. 24Che' bʌ c'ajalix i yo Noé tsi' ña'ta chuqui tsi' cha'le jini ijts'iñʌl bʌ i yalobil. 25-27Tsi' yʌlʌ:
Chojquemix Canaán. Mux i yochel ti majtan e'tel ti' tojlel i yʌscuñob. La' aq'uentic Sem i yutslel i t'an lac Yum Dios. La' ochic Canaán ti x'e'tel i cha'an Sem. Dios mi caj i yʌq'uen i ñuclel Jafet. Mi' caj ti chumtʌl ti pisil bʌ i yotot tac Sem. Mux i yochel Canaán ti x'e'tel i cha'an. Che' tsi' yʌlʌ Noé.
28Che' bʌ lajmenix but'ja cuxul to Noé jo'lujunc'al yic'ot lujump'ejl i yuxc'al (350) jab. 29Anix cha'bajc' yic'ot lujump'ejl i waxʌcc'al (950) i jabilel Noé ti pejtelel. Tsa' chʌmi.
Zur Zeit ausgewählt:
Genesis 9: CTU77
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Chol de Tumbalá Bible © Bible Society of Mexico, 1977. Active Translation in Process
