Лука 3
3
Пайгъамбар ЯхӀъя ушуная ягӀар аркьай, инсанарис хьеттигӀ гӀучӀуна гӀайчӀва гӀедат акье агъай
1Тиберия агъа паччагь Римдин паччагьвелди ай цӀегӀифудпе ис хьегуна, Ягьудея дерейин хӀавелдиъ ахьуная Понтий Пилат агъаф. Ирод хьуная Галилея дерейин хӀаф, гин чу Филип – Итурея дерейинна Трахания дерейин хӀаф. Лисаний хьуная Абилена дерейин хӀаф. 2Кайяфана Ханан агъаттар хьуная хӀа маллабур. Гьете иса, къумариъ ая Захарияйин кӀиркӀас, ЯхӀъяйис, Аллагьди гьикуная хабар. 3ЯхӀъя ушуная Иордан агъа нецӀун къирагъарихъ хъая джиларилди. Ги инсанарис агъай хьуная хьеттигӀ гӀучӀуна гӀайчӀва гӀедат акье агъай, чве гунагьар чве гардандиъ гъушен агъай, чве гунагьарилас гъил гъушанас. 4Пайгъамбар Ишаяйин китабиъ ликӀина суман:
«Къумариъ унихьая сес:
ХӀезур акье Аллагьдис рекъ, майдан акье Ги лек иша мукьар
5АчӀар гьава хьурай
гунтӀарна сувар хьеба хьурай,
рекъер майдан хьурай
уркӀар шергве хьурай;
6Хуппай джалла инсанарис агвасе, Аллагьди чаб ухӀаяф».
7ЯхӀъяйилди вей хьуная ппара инсанар хьеттигӀ гӀучӀуна гӀайчӀва гӀедат акьас. ЯхӀъяйи гебурис агъай хьуная:
– Иланарис хуруттар! Гьина э чвас пеф чвафас Аллагьдин дивандиккес ккейчӀвас хьасе пуна? 8Иджвелин курарилди агваракье чве гунагьар чун чве гардандиъ гъушунаеф! Чун имикӀа юркӀураъ: Че дад – Ибригьим э пуна! Зун чвас агъая, Аллагьдифас гьеме гъванарикес акьас хьасе Ибригьимас шиникквар. 9ЯкӀв хъихьуная кӀурарин мерӀерихъ, идже емиш алгъадеве кӀур, атӀуна гӀихьая цӀигӀ.
10– Айчин, фикьуна кканде чин? – пуна хабар гъуланди ахьуная гифас халкьди.
11ЯхӀъяйи пуная:
– Ӏу берхӀем хъаятти, са берхӀем йирай садра хъадаваттис, Ӏелеф аяттира гьегиштти акьурай.
12Налукар завал аркьаттара адиная хьеттигӀ гӀучӀуна гӀайчӀва гӀедат акьас. Гебури хабар гъушуная:
– Е мегӀелим, фикьуна кканде чин?
13ЯхӀъяйи гебурис пуная:
– Фаша магъа инсанарис алттухъинф, чвас дарукьаф.
14Хаб са Ӏу аскерари хабар гъушуная гифас:
– Чин фикьуна кканде?
ЯхӀъяйи гебурис пуная:
– Фаттмадива инсанарифас гуджунилдина гучӀар гьихьай пулар. Сайикра дава тахсир кимикӀа. Рази ухь чве ваджибил.
15Халкь ппара Ӏайи гъузуна ахьуная Месигьахъ. Джаллабури фикир аркьай хьуная Месигь эгьан ЯхӀъя, агъай. 16ЯхӀъяйи гебурис пуная:
– Зун мертт аркьая чун хьеттилди, амма адесе Те, заалас кьудрат хъаяф. Зун Гин лекаригӀ гӀайа ччеӀер гӀатасра кехӀей хӀисаби ккея инсан дава. Ги чун мертт аркьай ахьасе Аллагьдин РуьхӀуьлдина цӀилди. 17Гин кьур мертт аркьа кӀетӀа, сумар гӀадархъай, Гин гъилив фая. Кьур Ги завал акьасе тахаъ, сумар угасе кеттдеве цигӀ. 18Гьегишттира хъара джуьре гафарилдира ягӀар аркьай, ЯхӀъяйи гъай хьуная халкьдис идже хабар.
19Тегуна хӀавелдиъ ая Ирода ацӀуна дава курар акьуна ахьуная. Ги хьирди акьуна ахьуная Ирадиада агъа учин ччуччун хьир, ппара Ӏайвелара акьуна ахьуная инсанарис. ЯхӀъяйи агъай хьуная ги акьунадегьен дава курарихъас. 20Гьегихъас Ирода ачикуная ЯхӀъя дусттагъиъ, хъучихьуна джалла учин Ӏайвеларихъди сад сара.
Ӏисара ушуная ЯхӀъяйилди Учис хьеттигӀ гӀучӀуна гӀайчӀва гӀедат акьас
21КӀилди халкьдис хьеттигӀ гӀучӀуна гӀайчӀва гӀедат аркьагуна, Ӏисара адиная Учис гьеге гӀедат акьас ЯхӀъяйилди. ХьеттигӀас гӀайчӀуна Ӏисайи дуьгӀе аркьагуна, дахъуная завар. 22Гилди аладиная луфуран ухшарар кея Аллагьдин РуьхӀ. Завариас унихьуная сес:
– Вун Зе ппара ккане КӀиркӀ. Вун Зе мурадар бегьем аркьаф э!
Ӏисайин тухум
23Инсанаригьди Аллагьдин гаф фай айчӀугуна, Ӏисайин вей хьуная хьибцӀур ис.
24Инсанари фикир аркьа суман, Ӏиса хьуная Юсуфан кӀиркӀ. Юсуф – Ӏелин кӀиркӀ. Джуьре Гин дадар хьуная:
Матат, Леви, Малки, Янай, Юсуф,
25Матитай, АмуцӀ, Наум, Хесли, Нагъай,
26Махат, Матитай, Шими, Ясих, Яуда,
27Юханан, Риса, Зарубавил, Салафиэл, Нери,
28Малки, Ади, Хъусам, Элмадам, Эр,
29Яшуа, Ӏелизар, Ярим, Матат, Леви,
30Симеон, Юда, Юсуф, Янам, Элаким,
31Мали, Мина, Матата, Натан, Давуд,
32Ишай, Авид, Буаз, Сала, Нахшун,
33Аминадав, Админ, Арни, Гьесрум, Перец, Яуда,
34Якьуб, ИсхӀекь, Ибригьим, Терах, Нахур,
35Серух, Реу, Фалек, Эвер, Шалах,
36Каинан, Арпахшад, Сим, НухӀ, Ламех,
37Мафусал, Энух, Иред, Магьалай, Каинан,
38Энус, Сиф, Адам – Аллагь.
Zur Zeit ausgewählt:
Лука 3: AGU
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© Библия тарджума аркьа институт, Москва, 2005
