Лука 4

Иблисас Ӏиса рекъуьас адихьас кканхьуная

1Аллагьдин РуьхӀ архьуна, ушуная Ӏиса Иордандин къирагъарихъас. РуьхӀди файдиная Ге къумариди. 2Къумариъ, ягъцӀур ягъди Ӏисайихъ Иблис хъуруцай хьуная, Ге тӀулаас адихьас кканди. Гьеге ягъцӀур ягъди фера ӀуьтӀунара адава Ӏисайи. ЯгъцӀур ягъ ккеттушугуна, гаш хьуная Гис.

3Иблиса пуная Ӏисайис:

– Вун – Аллагьдин КӀиркӀ идехаб, гьеме гъвандикес гуни верегъилди акье.

4Ӏисайи джуваб йиная гис:

– Гирами китабариъ ликӀиная: «Са гунилди дава инсан ешемиш веяф».

5Хаб, Иблиса файшуна Ӏиса гьава мукьуйилди, агвар акьуная Гис гьеге сеӀетти кӀилди дуьнйайин паччагьвелар. 6Иблиса пуная Ӏисайис:

– КӀилди ге паччагьвелар, гебурин кьудратара, девлетара хъай Вас есе зун. Гебур зас йинаттаре, дехӀела зафас гьинас кканчира ес вея гебур. 7Магьа, Вун зе удигь кьвакьварилди гъузуна, Вун зе юлайиъ архьухаб, джалла гебур Веттар хьасе.

8Ӏисайи джуваб йина пуная:

– ЛикӀиная: «Са Аллагь ТегӀелайин удигь дала кьвакьварилди магъурзана, са Лин юлайиъ ухь».

9Хаб Иблиса файдина Ӏиса Ерусалимдиди, алихьуная Ге Аллагьдин хулан ке гьава кӀукӀал. Иблиса пуная Гис:

– Вун Аллагьдин КӀиркӀ идехаб, алайш гьемисалас ахтт. 10ЛикӀина аду:

«Аллагьди Учин малайикарис буюрмиш акьасе Вас гъил гьучихьас,

11гебури Вун гъиларил алгъикӀуна гъасе, Ве лек гъвандигь гьучидирхӀас».

12Ӏисайи джуваб йина, пуная гис:

– ЛикӀиная: «Азмурар маркьа Аллагь ТегӀелайикес».

13Сара фи пуна тӀулаас адихьайчира дагӀай, са вахттунисттегьен сакинди атуная Иблиса Ӏиса.

Сагелай Ӏиса Назаретиъ дуьгӀебур хура хулаъ аягуна

14РуьхӀдин кьуват ай адиная Ӏиса Галилея дерейиди. КӀилди ге дерейин багулив фая мукьариъ ад архьуная Ӏисайихъас. 15Гисаъ дуьгӀебур хура хулариъ Ӏисайи ягӀар аркьай хьуная инсанарис Аллагьдин гаф. Джаллабури тегӀриф аркьай хьуная Гин.

16Ӏиса адиная Назаретиди, Уч хӀа хье хӀуриди. Гьемишан суман, адиная Ге киш ягъа дуьгӀебур хура хулади. Ӏиса гъайшиная гирами китабариъ ликӀинаттар хурас. 17Гилди йиная пайгъамбар Ишаяйин китаб. Дахъуна китаб, джикӀиная Ӏисайи ме гафар ликӀина мукь:

18«Аллагьдин РуьхӀ алдея Заал,

Зун Аллагьди гӀаттивунаф идехӀела гӀеджизарис идже хабар акьас.

Ли гьикунафе Зун, фацунаттарис азадвел хьасе пас, сукъурарис Ӏекв агвасе пас.

Ли гьикунафе Зун, азиятикк ккеяттар фатас,

19Аллагьдин иджвелин вахтт хъучадиная пас».

20Алакьуна китабра, йина гисаъ кар аркьаттилди, Ӏиса экьуная. ДуьгӀебур хура хулаъ адегьенттарин улар гил алхьуная. 21Ӏисайи пуная:

– ЯгӀа, те чун юркӀв алийина вахттуни, аларкьуная гирами китабиъ ликӀина гафар.

22Джаллабури тегӀриф аркьай хьуная Гин, Гебур муьхӀтал вей Ги агъа иджвелин гафарил, хабар гъуланди ахьуная: «Юсуфан кӀиркӀду Ге?» – агъай.

23Ӏисайи гебурис пуная:

– Агьал чун Зас мишттин мисала пасе: «Е духттур, вун сагелай вун сагъ акье!» «Фидегьен унихьуная час Вун Кафернагьум агъа шагьурдиъ акьуна Ӏеламатарихъас. Мисара акье, Ве ватандил». 24Зун чвас дузди агъая, – пуная Ӏисайи, – са пайгъамбара адава, учин ватандил кьабул акьунаф. 25Ӏизраилдиъ ппара ашкӀинар ахьуная пайгъамбар Илйайин вахттуни. Гьете вахттуни, хьибу исна сура угъвалар дугъай, кӀилди хӀуькуматтиъ ппара Ӏайи гашра ахьуная. 26Амма Ӏизраилдин ашкӀинарилди сайилдира гьидикуна, пайгъамбар Илйа гьикуна ахьуная сасра милатин са ашкӀин хьиралди, Сидун дерейин багулив фая Сарепта агъа шагьурдиди. 27Ӏизраилдиъ ппара кабкар кеяттар ахьуная пайгъамбар Элисеян вахттуни, амма гебурикес садра сагъ хьуна адава, са Нааман дала, Сирия агъа хӀуькуматтиас.

28Ге гафар унихьугуна, джалла дуьгӀебур аркьа хулаъ аяттарис хъел адиная. 29Гъагьахъуна, хъучӀирхӀай файшуная гебури Ӏиса хӀуригӀас багулив фая дагьарин кӀукӀуйилди, тисалас ахтт алайхьас. 30Ӏиса, гӀадишина гебуригӀас, ушуная.

Кафернагьумдиъ Ӏисайи сагъ акьуная гӀанаъ шейтӀан ая инсан

31Ӏиса адиная Галилея дерейиди, Кафернагьум агъа шагьурдиди. Киш ягъари халкьдис ягӀар аркьай хьуная Ги. 32Джалла муьхӀтал вей хьуная Ӏисайи ягӀар аркьагъилди, Ге дагучӀай, хӀаф суман, гъургъахӀела. 33ДуьгӀебур хура хулаъ са инсан ахьуная, гӀанаъ шейтӀан аяф. Садпуна ги гьараяр акьуна пуная:

34– Эй, Назаретарин Ӏиса, фи э Вас чакес ккандеяф? Вун чин пуч акьас адинаф эв? Зас ягӀая Вун фуш ичин. Вун Аллагьдин Гирами э.

35Ӏисайи, гъургъас адатуна, пуная гис:

– БуӀ! АйчӀв лиас!

ШейтӀанди алгъадаркас акьуна ге инсан дуьгӀебур хура хулан яӀаниъ, айчӀуная гиас, гис зарар дакьуна. 36Джаллабурис гучӀ хьуная. Чаб чиппигӀди агъай хьуная гебури:

– Фи Ӏеламатар э гебур? Гив гьегишттин хӀавелна кьуват фая, шейтӀанарисра кехӀей буюрмиш акьуна, шейтӀанар айчӀвая!

37КӀилди дерейиъ ад архьуная Ӏисайихъас.

Ӏисайи сагъ акьуная Симонан хьеджарбабра джуьре итта инсанара

38ДуьгӀебур хура хулаас ушуная Ӏиса Симонан хулади. Симонан хьеджарбаб иттай ахьуная, куче цӀа ай джандиъ. Ӏисайис тӀалаб акьуная гис кумак акьас. 39АгьукӀуна гилди, Ӏисайи сакин акьуная иттал. Иттал айчӀуная гиас. Дишагьли гьеге сеӀетти гъайшина, агьийиная суфра. 40Рагъ учӀухаб, инсанар вей хьуная Ӏисайилди чиппин иттаттар хъай. Гьерттил алихьай гъилар, сагъ аркьай хьуная гебур Ӏисайи. 41АцӀунаттариас шейтӀанар айчӀвай хьуная гьараяр аркьай: «Вун – Аллагьдин КӀиркӀ э!» – агъай.

Ӏисайи буӀас аркьай хьуная шейтӀанар, пас адартай, гебурис ягӀай ахьунахӀела Уч Месигь идеф.

Ӏисайи Аллагьдин гаф ягӀар аркьай хьуная инсанарис Ягьудеяйиъ

42Багамин гагь хьегуна, Ӏиса ушуная хӀуриас садра адава сакин мукьуйиди. Инсанар руцай хьуная Гихъас. Ге джикӀигуна, инсанар алучӀуная Гил мева, чиппихъай гисаъ экьве агъай. 43Ӏисайи пуная гебурис:

– Зун джуьре мукьариъра идже хабар акьуна ккандея, Аллагьдин Паччагьвел хьасе пуна. Зун гьеге пас гьикунафе.

44Ягьудея дерейин дуьгӀебур хура хулариъ ягӀар аркьай хьуная Ӏисайи инсанарис Аллагьдин гаф.

Zur Zeit ausgewählt:

Лука 4: AGU

Markierung

Kopieren