Marku 15
15
Pilat e ra-ha mu yang le sak-se haw kaw e
1Hau nap-gyaw la lang, hkin-jawng a-gi pe, a-gi su wun pe, mau-sau ka e sara pe e hau su-wun hpung ban-shaw gë, bawng nyaw bakaw lwi, Yesu le twi lwi, Yang le she law lwi, Pilat jang ap bi kaw e.
2Hau hkun Pilat gë, “Nang Yuda byu pe e hkaw-hkam ngut le lu?” ga lwi, Yang le mi e. Yang gë, “Nang tai e ra jung za ngut taw le,” ga lwi, tu e.
3Hkin-jawng a-gi pe jau gë, mura myaw myaw Yang le hun kaw e.
4Hau mu lwi, Pilat gë, “Nang hai le a tu lu? Yang maw Nang le mura hun e hkyaw hka myaw wa myaw ni e le, wu wu a!” ga lwi, Yang le mi e.
5Yesu jau gë, hai dang ra hkun a tu ngut lwi, Pilat gë, ru mau ni ra.
Baraba nang-kat bi lwi Yesu le jen pyam e
6Hau poi gyaw ma yang maw dung ni le e ra jung za htawng-lang e byu ra yu yu le yang yang maw e ma-tu kat kat shang ga e.
7Hau hkun, gum lau kabyawng le e, byu le sat pyam e gum lau pe e ra-ha twi lawm e Baraba ga su ra yu baw taw le.
8Hau hkun shiwa byu pe daw law lwi, htung li e ra jung za, yang maw le kut ra, dung kaw e.
9Pilat jau gë, “Yuda pe hkaw-hkam le kat kat ra, nung maw aw akaw lu?” ga lwi, yang maw le tu e.
10Hka-su-mu-ga-le, ma-nawn-ma-sham yan-mai hkin-jawng a-gi pe Yang le ap pyam kaw e le yang se ni le.
11Hkin-jawng a-gi pe jau gë, yang maw e ma-tu Baraba le kat kat shang ga, ga lwi, shiwa byu pe le i-mit law taw bi taw akaw.
12Pilat jau gë, yang maw le dum tu lwi, “Hau ngut le gë, Yuda pe hkaw-hkam nung maw ga e su le, ngaw hka-su-kut ra hta?” ga tai e.
13Yang maw gë, “Ngadang ma jen taw a!” ga lwi, dum puk ga ru kaw e.
14Pilat gë, “Yang a hkyu e hai ung wa zang kut be hta?” ga lwi, mi e. Yang maw jau gë, “Ngadang ma Yang le jen taw ke!” ga lwi, je puk ga ru kaw e.
15Pilat gë, shiwa byu pe le i-mit law ngawn bi nau le e, yang maw e ma-tu Baraba le nang kat bi lwi, Yesu le nu-bat lwi, ngadang ma jen taw hwi shang ga ap pyam bi kat e.
Yesu la ja-hpoi e
16Hau hkun gye-zaw pe gë, tara dara yum wang-hkau shut Yesu le shwi law lwi, gye-wap gawm le ji taw kaw e.
17Yang maw gë, me-bu ne Yang le hut lwi, nik e zu-mu Yang le hut bi mu.
18“Yuda pe hkaw-hkam e, Nang a, a-rawng waw shang ga aw,” ga lwi, Yang le shi-kyam kat kaw e.
19Yang maw gë, hpung-hkat e Yang e u-lum ma nu lwi, Yang le saw-kan-bye gyun le, hki-hput-htu u-jang, Yang le pai kaw e.
20Yang le a-gawn kut yau jang, me-bu ne le yang maw hkyut pyam lwi, Yang e me-bu le dum hut kaw e, hau hkun nga-dang ma Yang le jen taw ra ma-tu shwi htaw e-law lwi.
Yesu le ngadang ma jen taw e
21Yang ngadang le wa bi shang ga, yaw-saw dum mai law lwi lai lam law e Alesandru e Ru-hpu yang-wa Simun ga e, Kureni mung byu ra yu le jun nang kaw e.
22Ahkwi Go-la-ga-hta ga e jaw-waw shut yang maw Yang le shwi htaw e kaw e. Golagahta dang lajum ge, “u-lum shaw-wi jaw-waw,” ga e ngut le.
23Hau hkun yang maw gë, mu-ra e nyaw e tsë-bi wung le Yang le bi kaw-lang, Yang a kam shu law.
24Ahkwi, yang maw ngadang ma Yang le jen taw lwi, Yang e me-bu le gam gam taw le e, ra yu e ra yu yu-jaw ra ma tu hpai bat kaw e.
25Ngadang ma Yang le jen taw e gë, sum yam ngut taw le.
26Hau mai gaw-tu, Yuda pe hkaw-hkam, ga lwi, Yang e mura le shit e mau-sau ka tap taw kaw e.
27Yang e ra-ha da-mya i yu le le, Yang e law-yaw shut ra yu, law-pai shut ra yu, yang maw jen taw kaw e.
29Hkyaw ma lai e-law bang le Yang le lu-mu lwi, yum-sing u-lum le ngat ngat u-jang, “A-ha, naw-ku jawng le hpyaw pyam lwi, sum ni gyaw ma dum waw sai su e,
30Nang e gang le Nang hki-yu lwi, ngadang mai Nang gyaw law a,” ga kaw e.
31Hkin-jawng a-gi pe le, mau-sau ka sara pe le, hau e ra jung za a-gawn kut u-jang, “Byu gaw-tu le Yang waw hki-yu le, yum-sing gung le gë, a waw hki-yu nung li?
32Nga maw myang le, waw lum shang ga, Israela hkaw-hkam Hkristu gë, hau ngadang mai ahkwi gyaw law shang ga,” ga lwi, shi-da-da tai kaw e. Yang e ra-ha ngadang ma jen taw su nik le, Yang le roi roi ga kaw e.
Yesu shi e
33Ahkwi hkyu yam je jang, hau mai gau yam je shaw, mung gawm ma mau-chut mak dut byu e.
34Gau yam ma Yesu gë, hte maw e, “Elo-i, Elo-i, lama sabak htani,” ga lwi, puk e. Hau dang lajum gë, “Nga e Karai wa e, hai yan-mai Nang Ngaw le pyam taw le lu?” ga e, ngut le.
35Hau nam ma yap taw bang ra wam gë, hau le waw gyaw jang, “Wu ke! Yang Elia le wut ni ra,” ga kaw e.
36Hau hkun byu ra yu din e lwi, i-lang ma bau gaw e jin-ze kat bing lwi, hpung-hkat ma tap mu, Yang le bi kaw le, “Ni ni shang ga, Elia Yang le le hkyaw yu ra lu? i-nung wu wu shang,” ga kaw e.
37Yesu jau gë, hte maw e puk u-jang, saw htum byu law e.
38Hau hkun naw-ku jawng ma e me-gaw, a-htaw mai mi-gung je shaw, gung gung byang mu gaw byu e.
39Yesu gë, hau su saw htum byu e le, Yang hë ma yap ni e gye-zaw ra shaw up e gye-zau myang jang, “Ge ge wa shi yu gë, Karai Kasang Yang-zaw nan ngut taw ra,” ga e.
40We we mai wu ni e mi-we-zaw pe le ni kaw e, yang maw jang ma Galile mau ma Yang ni a-shi hkun Yang jang chang lwi, Yang le sai-tsaw-sai hu su, Mag-da-la Mari, Yaku ti nik Yose yang-nu Mari e Salome pe lawm kaw e.
41Yerusalem wa shut Yang e ra-ha daw law e mi-we-zaw gaw-tu le myaw myaw le wu lawm kaw e.
Yesu le myup e
42Ahkwi mau-chut lwi, hau yu-ban bwi ni e hë ni ngu e, shi-jip taw e bwi-ni ngut e yan-mai, a-rawng waw lwi, rung-a-ya waw le e, Karai Kasang e mung-dan le mit byu ni e, A-ra-ma-hti wa ma Yosep gë, je le lwi,
43Pilat jang ma wam wang lwi, Yesu e gung-sawm le dung e.
44Yang han za shi byu e le Pilat mau lwi, gye ra shaw up e gye-zau le wut yu lwi, “Yang shi e gë, hka myang be lu?” ga mi e.
45Gye zau yang le shit gyaw jang, hau mang-sawm gë, Yosep le ap bi kaw e.
46Yang gë, ji-me pan wi yu lwi, hau mang le hkyaw yu mu, pan e htup yup lwi, lu-gawk e tawk taw e lup ma kat taw e, hau lup dawng ma yang lu-gawk king ngawp taw e.
47Magdala Mari e Yose yang-nu Mari nik gë, hau taw taw e jaw-waw le myang kaw e.
Zur Zeit ausgewählt:
Marku 15: ATB1951
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© British and Foreign Bible Society 1951
