Jenesis 7
7
God i mekem we bigfala wota i draonem olgeta samting
1Nao God i talem long Noa se, “Noa. Naoia, yu wetem woman blong yu mo olgeta pikinini blong yu, yufala i mas go insaed long sip ya, from we mi mi luk finis we long olgeta man long wol ya, yu nomo yu stret man. 2Long evrikaen anamol we i klin long fes blong mi, yu mas tekem seven we i man mo seven we i woman. Mo yu mas tekem tutu long evrikaen anamol we i no klin long fes blong mi, wan we i man mo wan we i woman. 3Mo long evrikaen pijin tu, yu mas tekem seven we i man mo seven we i woman. Yu mas mekem olsem, blong biaen, taem wota ya i finis, bambae olgeta samting ya oli save gat pikinini blong olgeta bakegen. 4Naoia seven dei nomo i stap, nao bambae mi mekem bigfala ren i kam. Bambae i ren foti dei mo foti naet, mo bambae mi spolem olgeta samting we mi mi mekem we oli stap long wol ya, olgeta man wetem olgeta narafala samting we oli gat laef.” 5Nao Noa i mekem olgeta samting ya we God i talem long hem.
6Nao taem bigfala wota ya i kam draonem evri samting, Noa i gat sikis handred yia blong hem. 7#Mat 24.38,39; Luk 17.27Mo hem wetem woman blong hem, mo trifala pikinini blong hem, mo trifala woman blong trifala, oli go insaed long bigfala sip ya blong haed long wota ya. 8Mo ol anamol ya we oli klin long fes blong God, wetem olgeta we oli no klin long fes blong hem, mo ol pijin 9oli go insaed long sip ya tutu, wan we i man wetem wan we i woman, olsem we God i talem. 10Seven dei i pas, nao bigfala wota ya we i draonem olgeta samting i stat blong i ron bigwan i kam antap.
11 #
2 Pita 3.6
Nao long yia ya we Noa i gat sikis handred yia blong hem, long seken manis* blong hem, long namba seventin dei blong manis ya, ol hol blong wota insaed long graon oli kam open, mo wota i stap kamkamaot bigwan. Mo bigfala ren i kam we i ren we i ren. 12Mo ren ya i stap gogo kasem foti dei mo foti naet, we i no spel nating.
13Nao long sem dei ya nomo, Noa wetem woman blong hem mo trifala pikinini ya blong hem, Sem mo Ham mo Jafet, mo trifala woman blong trifala oli go insaed long sip ya. 14Mo evrikaen anamol long wol oli go insaed long sip wetem Noa olgeta. I gat evrikaen anamol blong vilej wetem evrikaen anamol blong bus, i stat long olgeta we oli bigbigfala, i go kasem olgeta we oli smosmol, mo evrikaen pijin tu oli go insaed. 15Evrikaen samting long wol ya we i gat laef oli go tutu, wan we i man wetem wan we i woman oli go insaed long sip ya wetem Noa, 16olsem we God i talem. Mo taem olgeta evriwan oli stap insaed finis, God i satem doa blong sip ya. 17Nao oltaem, wota ya i stap kam bigwan moa, i stap kavremap graon ya, gogo kasem foti dei. Mo taem wota ya i kam fulap long ples ya we sip i stap long hem, i leftemap sip ya, nao sip i stap flot i go. 18Nao wota ya i stap kam fulap moa long graon, be sip ya i stap flot gud nomo, 19gogo wota ya i kavremap olgeta hil ya we i hae we i hae. 20Wota ya i dip tumas, we i stat antap i godaon kasem top blong ol hil, klosap i kasem seven meta. Noa nomo, wetem ol famle blong hem mo olgeta samting we oli stap wetem hem long bigfala sip ya, olgeta ya nomo oli stap laef. 21-23Olgeta samting ya we i gat laef we oli stap long graon, God i bin mekem olgeta, be long taem ya, hem i draonem olgeta evriwan oli ded. Ol man, wetem ol anamol, mo ol naranarafala samting we oli stap wokbaot long graon, mo ol pijin, God i spolem olgeta evriwan bakegen. Noa nomo, wetem ol famle blong hem mo olgeta samting we oli stap wetem hem long bigfala sip ya, olgeta ya nomo oli stap laef. 24Nao wota ya i stap olsem, gogo kasem wan handred fifti dei.
Zur Zeit ausgewählt:
Jenesis 7: BBR
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Bislama Revised Bible © Bible Society of the South Pacific, 2012.
