Lukas 24
24
Ɵiyi n'amai na wiini Yesu
Mat. 28.1-8; Mark. 16.1-8; Yoh. 20.1-3
1War Dimas gorof par cup ɗa, e hili min waŋ ɗa gaini wazagai zi ɗûgûdi zi lûgûzi gaini emel n'e ziziniŋ ɗa lai tiɗi. 2E niviti funi ɗa gaini likiti edi mini waŋ ɗa par. 3E niyi amlai warni, amma e nivi kopoŋni Epiɗ-ɗai Yesu kai. 4Won hlai n'e ɗiyi ca e siɗi wala n'e ziŋ ɗa kai ɗa, e tiliɗi ɗai sulu e ɗiyisi wuzaɗi par gaini sapa n'a ŋala gara siɗi. 5Hunai a yimiɗi gara e pi arɗi azumai midini afti, ɗai ɗa e miɗiɗi: Ki piyi na karni arbaɗi zi mri buri mada? 6Ni aŋ won na kai, a ɵiya amai ya, ki hini midiki a kɵa burini seŋ n'a miɗiŋki won hlai na nasi ka war Galeliya, a miɗiki ɓa: 7A dewele ɓa, Ahini ɗif a sa edi war tiɗi ɗai na tuwarai, a toko amai sini luwuŋ zi dagra, war mefeŋ n'ag'aŋ hu ɗa, a ɵiya amai. 8Won hlai ni, midiɗi a kɵa gaini seŋni Yesu ɗa. 9E wiyisi mini waŋ par, e hili e miɗiɗi wiiɗi na doogo pi ktai gaiɗi na zamai ɗa lai miɗini wala n'a za ɗa. 10Hanɗa e ɗi miɗi: Mariya Magdalena gaiɗi Yowana, gaiɗi Mariya n'emini Yakob gaiɗi falakai zamai zamai n'e ɗa gaiɗi lai. E miɗi n'a za wiiɗi Apostelai. 11Amma seŋ hanɗa, a tala arɗi maini seŋ na nafani aŋ kai nɵa, e yimi seŋɗi kai. 12Gaini hanɗa paŋ Peter a faka a lawa edi mini waŋ. Won hlai n'a goɓa azumai ɗa, a tala sapa n'e fiɗiŋ gaini ɗa azumai ca. Asakal par a waya wiini aha, a bunda hiyak burini wala n'a za ɗa.
Morkoi na Emmawus sek
Mark. 16.12-13
13Mefeŋ ni dama, zamai sulu arbaɗi par e hili warni fuŋ ktai n'e yikini ɓa: Emmawus, arbani na gaiɗi Yeruzalem ɗa a za kilometir yaw. 14E ɗi fu aŋ hiɗi kalaŋ midini wazagai n'a za ɗa arbaɗi marɗi. 15Won hlai n'e ɗa e hiɗi kalaŋ, e sispi midini wazagai zamai zamai lai ɗa, Yesu gaini midini dama a torosi gobi gaiɗi, e kiti morkoiɗi piɗi marɗi. 16Arɗi sini ca sme, amma e siɗiŋ ɓa A ni nɵa kai. 17A miɗiɗi: Wala na ki sispi miɗini miɗini eziki yaw na ɗa a mada? Nagai e ɗiyi ca, siɗi a kwima gara.
18Ktai arbaɗi na yikini ɓa: Kleyopas a waya seŋ a miɗini: Tuku ku morkoiɗi, na ku hina warɗi Yeruzalem blaŋ ku sɗa wala n'a za war mefeŋ hanɗa kai ɗa? 19A miɗiɗi: A za ɗa a mada? E miɗini: Wala n'a za sini Yesu na Nazaret par, n'a na ka a ɗif na mini Alaw zi spak war sda, war seŋ zi miɗi lai, wuzani Alaw, wuzani arɗi ɗai lai. 20Paakai n'abakai zi ɓaka na wimu gaiɗi n'abakai e siŋ edi kapai sariya zi mri te ko miɗini, e tûkûŋ amai sini luwuŋ zi dagra lai. 21Tiyi mi hiini ɓa a ni n'aga a sa pli n'edi wiiɗi Izrayel ɗa, gaini hanɗa paŋ ɗa girna ɗa a mefeŋ n'ag'aŋ hu asakal na wala hanɗa a za ɗa. 22Falakai zamai arbayi par e bindi yi hiyak gara, e hili mini waŋ goprof n'abai hanɗa, 23won hlai na e nivisi kpoŋni kai, e hilisi e miɗiyi ɓa: Ɗai zi ɵeŋ na warni fuŋ-n'Alaw par e siŋki siɗi, e miɗiɗi ɓa ni aŋ karni. 24Zamai arbayi par e hili mini waŋ, e nivi wazagai ɗa maini na falakai e miɗiŋɗi nɵa, amma ni mal ɗa e tiliŋ kai.
25Yesu a miɗiɗi: Tiki, midiki gdaŋ, ki yimi seŋ na ɗai na mini Alaw e miɗiŋ ɗa kai. 26A na ɗa ɓa, Kristu ɗa a sɗa gir maini hanɗa ɵa, kapai asakal par a niya warɗi abai na wiini kai ɗi? 27A tikasi pini sini maktuɓ na wiini Musus par, war lokwita na wiiɗi ɗai na mini Alaw paŋ lai. A siŋkiɗi edi war ɗû par wazagai n'a muɗa miɗini ni ɗa paŋ.
28Won hlai n'e ŋi gobi gaini fuŋ n'e diri e hili woni ɗa, a za sini maini ɗif n'a dara a vuga wuzani sek ɵa, 29e siiyi mini e miɗi: Sumna gaiyi won hlai n'aga mi fini woni ɗa buri futi te za koskoi ta, yuvai te vada vat ya. A niya amlai aŋ sumna gaiɗi. 30Won hlai n'a sumna azumai aŋ suma gaiɗi, a tika peŋ a sa tese sini Alaw, asakal par a ɓurwaŋ a siŋɗi. 31Nɵa arɗi a mala edi e siɗiŋ, amma e tiliŋ a na arɗi kir kai. 32E miɗi arbaɗi marɗi: Won hlai n'a nasi ka aŋ haɗa kalaŋ gaimu warɗi futi ɗa, n'a na ka a suŋkumu ezini ɗû edi lai ɗa, agulmu a firiya.
33War hlai ni dama, e fiki amai, e wiyisi a Yeruzalem, e niviɗisi na doogo pi ktai gaiɗi nagai n'e ɗi ka gaiɗi lai. 34Nagai e miɗiɗi: A jre Epiɗ-ɗai a ɵiya amai ya, a siŋka sini arni Simun lai. 35Nagai na sulu e miɗi miɗini n'a za siɗi warɗi futi ɗa, gaini siŋki na siŋka sini arɗi won hlai n'a ɓurwa peŋ ɗa.
Yesu a siŋka sini arɗi ɗaini zi hitri
Yoh. 20.19-23
36Won hlai n'e ɗa aŋ miɗi seŋ hanɗa, ni gaini midini dama a ɗiya arbaɗi zaw, a miɗiɗi: Ɵeɗ a sumna midiki. 37Amma e miliŋi gaini hunai n'abai, e hiini ɓa e tili na ɗa a sezeni ɗif zi mri ɗi. 38A miɗiɗi: Ki hûni buri mada? Ki giriŋi buri mada? 39Tili ta gaini aza ɗa, mu ta dama, titimiŋa. Tiliŋa pɗem buri seze ɗa, neŋ sini, keɵke sini lai maini na ki tiliŋ aŋ sa na ɗa ɵa kai. 40Won hlai n'a na muɗa hanɗa, a siŋkiɗi tini gaini ezini. 41Ɗai zi hitri ɗa, firiyi a yimiɗi gara, e bindi hiyak gara lai, e diri e yimi ɓa A ni kai. Nɵa Yesu a miɗiɗi: Wala zi simi tiki kai ɗi? 42E kinisi hilif zi viŋgi agwi. 43A tikaŋ, a sumaŋ wuzani arɗi.
44A miɗiɗi: Hanɗa a seŋ na mu na ka mu miɗiŋki, won hlai na mu na ka gaiki ɗa. A dewele ɓa, wazagai paŋ n'a ɗosi mada war ɗû na wiini Musus, war maktuɓ na wiiɗi ɗai na mini Alaw, war yama lai a va amai. 45Nɵa a mala hiiniɗi edi kapai e ɵini ezini ɗû ɗa. 46A miɗiɗi maini nɵa: Aŋ gaini ɗû ɓa: Kristu aga a sɗa gir, aga a ɵiya amai arbaɗi zi mri par war mefeŋ n'ag'aŋ hu lai. 47Bindi na gamai n'Alaw a haza tuwur edi burini ɗa, aga a muɗa edi sini pinzibaɗi ɗai paŋ, a tikaɗi pini aha warɗi Yeruzalem par. 48Tiki, ki ɗi zaidakaini seŋ hanɗa. 49Ta, aga mu ɵinasi wala na Apa a muɗa gaini ɗa midiki. Amma, tiki ki simnika aha warni fuŋ n'abai ɗa ca haa spak n'amai par a wa siki haw.
Yimi n'amai na wiini Yesu
Mark. 16.19-20; Sdaɗ. Apost. 1.4-14
50A kiɗi haa gobi gaiɗi Betaniya, A yima tini amai a ɓikiɗi. 51Hlai n'a na ɓikiɗi ɗa, a ɓurwa gaiɗi a yima amai. 52Nagai e hûrgû azumai wuzani, asakal par e wiyisi a Yeruzalem sek gaini firiyi n'abai. 53E simni kureɗ war tempel, e si tese sini Alaw lai.
Zur Zeit ausgewählt:
Lukas 24: MUSGUM
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
