Lukas 23
23
Yesu wuzani Pilatus
Mat. 27.2, 11-14; Mark. 15.1-5; Yoh. 18.28, 33-38
1E fiki amai gaini hlaiɗi, e kiŋ wuzani Pilatus.
2E tiki piɗi aŋ pi seŋ midini e miɗi: Ɗif hanɗa, tiyi mi niviŋsi aŋ ziɗi piɗi ɗai buri e fiki dûrgûzi amai, a ɗala tar na sini Sezar, a yika sini ba a Kristu, a pai. 3Pilatus a zilbaŋ a muɗa: Tuku ku paiɗi Yudiyakai kai ɗi? A waya seŋ a muɗa: Ku muɗaŋ na ɗa ku tuku. 4Pilatus a muɗa siɗi paakai n'abakai zi ɓaka gaini firiɗi ɗai lai maini nɵa: Mu nava seŋ na meefeŋ sini ɗif hanɗa kai, na kapai a nava rgi burini. 5Amma e siiyi mini e miɗi: A na faka ɗai amai, gaini hitrini midini afti na Yudiya paŋ, a tikasi pini war Galeliya par haa won na.
Yesu wuzani Herod
6Hlai na Pilatus a ɵina hanɗa, a zilba ɓa ɗif hanɗa a na war Galeliya par ɗi? 7Won hlai n'a sɗa ɓa, ni a na midini afti na wiini Herod par ɗa, a ɵinaŋ sini Herod. Herod, a na fu a Yeruzalem warni mefeŋ ni ɗa. 8Won hlai na Herod a tala Yesu ɗa a firiya gara, buri a faana yaw a dara a talaŋ, buri labar n'a na ɵinaŋ miɗini ɗa, a hiina ɓa aga a za wala zi siŋki ktai wuzani arni ɗi? 9A zilbaŋ midini wazagai viya, amma Yesu a wiyini seŋ kai sam. 10Paakai n'abakai zi ɓaka gaiɗi ɗai n'e siɗi gara, e ɗi fu ca aŋ pi seŋ midini gdaŋ gara. 11Herod gaiɗi ɗai zi gɗam na wiini lai, e tirkiŋ, e zini yewere, won hlai n'e vidi li gaini Yewere ɗi, n'e wiini sapa n'a ŋala gara sini li lai, e wiyiŋni wiini Pilatus. 12War mefeŋ ni ɗa, Herod gaini Pilatus e bindi aŋ marmakai, wuzani hanɗa e ɗi fu gaw gaiɗi marɗi.
Sariya zi mri te ɗukla midini Yesu
Mat. 27.11-26; Mark. 15.1-15; Yoh. 18.39; 19.16
13Pilatus a yikiɗisi paakai n'abakai zi ɓaka gaiɗi n'abakai gaiɗi ɗai paŋ lai sini. 14A miɗiɗi: Tiki ki kiŋasi ɗif hanɗa, ɓa a n'a faka ɗai amai, mu zilbaŋ wuzani arki, amma mu nava wala ktai na meefeŋ sini na kapai mu rgaŋ burini kai. Seŋ na ki piŋni miɗini na ɗa, mu navaŋ ɵa kaalai. 15Herod ɗe a navasi seŋ sini kaalai, buri a wuyuŋmusi wai. Nɵa ɗa a za wala ktai n'a kiɗa a nava mri burini kai zaŋ. 16Aga mu ɵini daɓala pini su su lai, mu hinaŋ a hala wiini. 17Miɗi fet na wiiɗi Paska paŋ sai, Pilatus a ɵiɗisi ɗif zi daŋgai ktai edi suuwa suuwa.
18E ɗûûli gaini hlaiɗi e miɗi: Fuɗa ɗif hanɗa edi, amma ku ɵiyisi Barabbas edi su. 19Barabbas ni ɗa, e ɵiŋ warɗi daŋgai buri a faka dûrgûzi amai warni fuŋ n'abai, buri ɵiɓini belek lai. 20Pilatus a waya a zilbiɗi pra: Buri a firiya ɓa a ɵa Yesu ɗa. 21Nagai e ɗûûli e miɗi: Tokoŋ amai sini luwuŋ zi dagra. 22A miɗiɗi azi n'ag'aŋ hu: Ɗif hanɗa a za zi meefeŋ ɗa a mada? Mu nava wala ktai sini par n'a kiɗa a nava mri burini aŋ kai. Mu ɵini li daɓala pini su su ɗa, mu hinaŋ a hala wiini. 23Amma e siiki, e ɗûûli gara, e piyi ɓa sai a tokoŋ amai sini luwuŋ zi dagra, ɗuwalɗi a nava rɗi n'amai. 24Pilatus a sa futi buri a za maini na ɗai e firiyiŋ ɗa nɵa. 25A ɵa ni n'e ɵiŋ warɗi daŋgai burini fikini dûrgûzi n'amai gaini ɵiɓini belek ɗa su, amma ni n'e ɗa piyiŋ ɗa, a saŋ war tiɗi aŋ zi sini maini n'e diri nɵa.
E tûkû Yesu amai sini luwuŋ zi dagra
Mat. 27.31-44; Mark. 15.20-32; Yoh. 19.17-24
26Won hlai n'e ɗa hili gaini, e yimi ɗif ktai, Simun na Kirine par, n'a na waisi edi warni vowaini par. E tikini dagra wulani buri a libaŋ pini Yesu. 27Firiɗi ɗai viya gaiɗi falakai lai e hili pini. Falakai e tûwi, e ɵi marava siɗi lai burini. 28Yesu a bunda arni siɗi, a muɗa: Tiki ɗai na Yeruzalem, ki tûwi buriya kai, amma ki tûwi buriki tiki dama, gaiɗi aliki lai. 29Buri mefeŋ a na gizi, na ɗai aga e miɗi ɓa: Ɵeɗ midiɗi falakai na muɗaŋai, ɵeɗ miɗini gut n'a wa duk kai gaini fiyaw n'e ciŋ ka duk kaalai. 30Ɗai aga e miɗi sini luwaŋai ɓa: Kɵisi midiyi, sini boŋorai ɓa: Ŋûyûyi cok. 31Na ɓa e zi sini luwuŋ na hirnaŋ maini hanɗa ɵa ɗa, n'aga a za sini luwuŋ na huleŋ ɗa aga a suwa hanɗa pra kai ɗi.
32War sarti ni dama, e kisi ɗai zamai sulu, ɗai na maafanai kapai e tûkûɗi amai gaini.
33Won hlai n'e cû war hlai n'e yikiŋ ɓa: Keɵkeni humok, e tûkûŋ amai woni gaiɗi ɗai na sulu na maafanai lai, na ktai war galni hanɗa par, na ktai war galni hanɗa par lai. 34Yesu a muɗa: Apa, ku pɵa meefeŋɗi hanɗa midiɗi kai, buri e siɗi wala n'e ɗa e ziŋ ɗa kai. E ɓûrwi sapani arbaɗi pini wala zi vili.
35Ɗai e ɗiyi ca ca e tili, amma n'abakai ɗa e zini yewere e miɗi: A kurɗa ɗai zamai kir ka, a kurɗa sini dama haw le, na ɓa a Kristu na wiini Alaw zi viri edi ɗa. 36Askarai lai e zini yewere, e hilisi wuzani gaini vin na hahayaŋ, 37e miɗi: Na ɓa ku paiɗi Yudiyakai ɗa, kurɗa suku dama edi. 38Ɗû a na fu amai par miɗini maini nɵa: Ɗif hanɗa a paiɗi Yudiyakai.
39Ktai arbaɗi ɗai na maafanai n'e ɗa amai sini luwuŋ zi dagra gaini a tirkaŋ a muɗa: Ku Kristu ɗa kir kai! Kurɗa suku dama lai, kûrɗiyi tiyi lai. 40Amma, maini a ɓaraŋ a muɗa: Ku huna Alaw kai ɗi? Sariya zi mri te ɗukla muduku maini Ni ɵa lai kai ɗi? 41Tumu ɗa, n'a za sumu ɗa a jre, buri a za sumu na ɗa pini sdamu na mu zuŋmu, amma ni ɗa a za wala ktai na meefeŋ kai koo! 42A muɗa: Yesu, hina muduku a kɵa buriya won hlai n'aga ku niya warɗi paiku ɗa. 43Yesu a waya seŋ a miɗini: Jre mu muɗuku: Girna haa, aga ku sumna gaya war paradis.
Mrini Yesu
Mat. 27.45-56; Mark. 15.33-41; Yoh. 19.28-30
44Futi gobi girvudi ɗa, gegeŋ a za midini afti paŋ haa sini sa hu na koskoi ta. 45Futi te doogo duk, sapa na e giŋiŋ amai amlai warni hlai na sɗik ɗa a ɓasa arba kal kal. 46Yesu a ɗuula a muɗa: Api, mu hina suŋfaŋa war tuku. Asakal n'a muɗa hanɗa ya, suŋfani a wa edi. 47Won hlai n'abaiɗi askarai na ɗai pini miya ɗaw a tala hanɗa, a sa tese sini Alaw a muɗa: Ɗif hanɗa a ɗif na jre fakat. 48Firiɗi ɗai n'e tipisi aŋ tili wala hanɗa, asakal n'e tili wala n'a za ɗa ya ɗa, e wiyi aha sek ɗa war marava.
49Nagai n'e siɗiŋ gaiɗi falakai n'e hilisi pini haa a Galeliya par ɗa, e ɗiyisi edi gaigai par e tili wala n'a na za ɗa.
Pini Yesu
Mat. 27.57-61; Mark. 15.42-47; Yoh. 19.38-42
50Ktai arbaɗi ɗai zi kiti seŋ, n'e yikiŋ ɓa Yosef, a ɗif na pɗem, na jre lai, 51seŋ na marni e rgiŋ warɗi, n'e ziŋ lai ɗa, ni a ɗiya warni kai, a ɗif na Arimatiya, fuŋ n'abai na wiiɗi Yudiyakai par, a na fu aŋ biyiti pai na wiini Alaw lai. 52A hala sini Pilatus a zilbaŋ miɗini kopoŋni Yesu. 53A tikasi kopoŋni azumai amai sini dagra par, a faɗaŋ warni sapa, a fanaŋ warni waŋ n'e ɓiliŋ sini huwuŋ, n'e tiki ɗif warni duk kai hai. 54A za na ɗa war mefeŋ na wiini zizinini-si, Sabbat ɗa, a na fu gobi aŋ tika pini lai.
55Falakai n'e hilisi gaini a Galeliya par e tiki futi pini, e tili waŋ ɗa, e tili hlai n'e finiŋ woni lai. 56E wiyi aha aŋ zizinisi siɗi gaini wazagai zi ɗûgûdi zi lûgûzi, gaini emel lai. War Sabbat ɗa e yivi siɗi amla maini n'aŋ warni seŋ zi gadai ɗa nɵa.
Zur Zeit ausgewählt:
Lukas 23: MUSGUM
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
