Lukas 20
20
Ɗai e sispi miɗini spakni Yesu
Mat. 21.23-27; Mark. 11.27-33
1Mefeŋ ktai, Yesu won hlai n'a na hitriɗi ɗai warni tempel, a na muɗa labar na pɗem edi lai ɗa, paakai n'abakai zi ɓaka gaiɗi ɗai n'e ɗû wazagai, gaiɗi n'abakai n'arbaɗi ɗai e liɓisi, 2e zilbiŋ e miɗi: Miɗiyi haw: Ku za na ɗa gaini spak na maɵa ɗa? Na a suku spak hanɗa asiya ɗa? 3A waya seŋ a muɗa: Ta lai mu dara mu zilbiki ktai, wiyiŋa seŋ. 4Baptisme na wiini Yohana ɗa, a na sini Alaw par, zaw siɗi ɗai par ɗi? 5E kitiŋ arbaɗi e miɗi: Na ɓa, mu wuyumu seŋ li ɓa: Sini Alaw par ɗa; aga a muɗa ɓa, ki yimi warni kai buri mada? 6Na ɓa, mu wuyumu seŋ li ɓa: Siɗi ɗai par ɗa; ɗai paŋ aga e fuɗumu edi, buri e yimi jre ɓa, Yohana ɗa a ɗif na mini Alaw. 7Nɵa e wiyi seŋ ɓa: E siɗi hlai n'a sasi woni par kai. 8Nɵa Yesu a miɗiɗi: Ta lai mu sɗa spak na mu za gaini na ɗa kaalai.
Seŋ zi siŋka maini midiɗi ɗai zi zigi zardeŋ zi vin na maafanai
Mat. 13.33-46; Mark. 12.1-12
9A tika pini aŋ muɗa seŋ zi siŋka maini hanɗa siɗi ɗai maini nɵa: Ɗif ktai a pa luwuŋ zi viŋ war zardeŋni, A zag'aŋ edi tiɗi ɗai zi sda, a hala wiini a morkoi midini afti na gaigai. 10Won hlai na mefeŋ ni luwuŋ zi wi a cosi li ɗa, a ɵina ɗif zi sɗa ktai siɗi ɗai n'e zigi zardeŋni, e sinisi galni alini luwuŋ zi vin n'a na aŋ wiini ɗa. Ɗai zi zigi zardeŋ ɗa, e ɵiɓiŋ haa e wiyiŋsi kadai blaŋ. 11A ɵina ɗif zi sɗa na zamai pra, e ɵiɓiŋ, e tirkiŋ haa, e wiyiŋsi kadai blaŋ. 12A ɵina ɗif zi sɗa n'ag'aŋ hu, e zini wuruk, e birgiŋsi lai. 13Epin-gezani zardeŋ zi luwuŋ zi vin ɗa, a hiina a muɗa: Kapai mu za ɗa a mada? Aga mu ɵina ahiya na mu daraŋ siɗi, ablaŋtaŋkai aga e sini hormo ɗi ɗa. 14Amma won na ɗai zi zigi zardeŋ zi luwuŋ zi vin, e tiliŋ a na halasi ɗa, e kiti seŋ arbaɗi e miɗi: Hanɗa a ni n'a mula bulum ɗa, fuɗuŋmu edi kapai bulum ɗa a hina aŋ wimu. 15E birgiŋ edi war zardeŋ zi luwuŋ zi vin ɗa par, e fiɗiŋ edi. Epin-gezani zardeŋ zi luwuŋ zi vin ɗa aga a ziɗi maɵa maɵa ɗa? 16Aga a vidiɗi ɗai zi zigi zardeŋ zi luwuŋ zi vin hanɗa edi. Aga a sa zardeŋni tiɗi ɗai zamai. Won hlai n'e ɵini hanɗa, e miɗi: Kaai, aga a sɗa aŋ za maini hanɗa ɵa kai. 17A tiliɗi a muɗa: Seŋ n'a ɗo ɓa: Ahi-fuŋ na ɗai zi rgi dalam e biliŋ edi ɗa, a bunda aŋ ahi-fuŋ n'a tika war koŋni dalam ɗa, a waya edi maɵa ɗa? 18Asiya ɗi paŋ n'a kɵa li miɗini ahi-fuŋ hanɗa, aga a haɗa, ni na ahi-fuŋ hanɗa a kɵa li miɗini ɗa, aga a saraŋ edi. 19War sarti ni ɗa, ɗai zi ɗû wazagai gaiɗi paakai n'abakai zi ɓaka, e piyiŋ aŋ yimiŋ, amma e hûniɗi ɗai ɗa ta, e siɗi ya ɓa a muɗa seŋ zi siŋka maini na ɗa buriɗi nagai.
Tar n'a sa sini Sezar
Mat. 22.15-22; Mark. 12.13-17
20E tiki piɗi aŋ tiki hangalɗi sini, e ɵini ɗai zamai n'e zi siɗi maiɗi ɗai na jre ɵa kapai e nivi seŋ ktai mini par n'e yimiŋ gaini kapai e siŋ tiɗi n'abakai gaini Lawan. 21Ɗai hanɗa e zilbiŋ e miɗi: Api zi hitri, tiyi mi siɗi ɓa, tuku ku muɗa pɗem, ku hitra pɗem lai. Ku za ɓraw arɗi ɗai kai, amma ku hitriti futi na wiini Alaw war jre. 22Pini gadai ɗa, mi kiɗi mi si tar sini Sezar, zaw mi si kai ɗi? 23Won hlai na Yesu a sɗa yelɗi ba, a wiyiɗi seŋ a muɗa: Kiŋasi denariyus ktai haw, 24foto na miɗini gaini ɗû n'aŋ miɗini ɗa, a wiini asiya ɗa? E wiyi seŋ, e miɗini: A wiini Sezar. 25Nɵa a miɗiɗi: Ki sini walani Sezar wiini Sezar, na wiini Alaw wiini Alaw lai. 26E kiɗi aŋ nivi seŋ n'e yimiŋ gaini war mini par wuzaɗi ɗai kai, e bindi hiyak burini seŋ n'a wiyiŋɗi ɗa, e bi miɗi liyik.
Zilbi na miɗini ɵiyi n'amai
Mat. 22.23-33; Mark. 12.18-27
27Zamai arbaɗi Sadusekai n'e yimi ɓa ɵiyi n'amai aŋ kai ɗa, e hilisi sini Yesu e zilbiŋ, e miɗi: 28Api zi hitri, Musus a ɗo siyi maini nɵa: Na ɓa ɗif a mra, a hiniti ka li munini, seyemni kai ɗa, tawalni a yimiti muni ɗa kapai a za seyem wiini tawalni n'a mra ɗa. 29Nɵa, tawalakai e ɗi fu muguzak, n'abai ɗa a tikiti muni ɗaw, a mra ɗa a hina seyem kai. 30N'aga wulani a tikiti, 31n'ag'aŋ hu a tikiti pra, haa na muguzak paŋ e tikiti paŋ, e mri e hini ka seyem kaalai. 32Asakal par, muni te mra lai. 33War ɵiyi n'amai ɗa, aga te za ɗa aŋ munini asiya ɗa, buri nagai muguzak paŋ e tikiti aŋ muniɗi paŋ.
34Yesu a waya seŋ a miɗiɗi: Falakai gaiɗi maɵagai na warɗi yai hanɗa e tiki marɗi, 35nagai n'e kiɗi aŋ niyi warɗi yai na t'aŋ wuzamu war ɵiyi n'amai n'arbaɗi zi mri par ɗa, nagai aga e tiki falakai kaalai, e tiki maɵagai kaalai. 36E kiɗi e mri zamai kir kai, buri e ɗa kal kal maiɗi ɗai zi ɵeŋ na war fuŋ-n'Alaw nɵa, nagai e ɗi alini Alaw buri a ɵiyiɗisi amai war mri par ya. 37Buri ɵiyi na ɗai zi mri aga e ɵiyisi amai ɗa, hanɗa a wala na Musus a muɗa edi midini, won hlai n'a muɗa midini kukuɓ n'a na ya ɗa a yika Epiɗ-ɗai ɓa a Alaw na wiini Abraham, Alaw na wiini Isaak, Alaw na wiini Yakob lai. 38Ni ɗa a Alaw na wiiɗi zi mri kai, amma Alaw na wiiɗi na karɗi, buri nagai na wiini ɗa e ɗa karɗi. 39Zamai arbaɗi ɗai n'e ɗû wazagai e wiyi seŋ e miɗi: Api zi hitri, ku waya seŋ pɗem gara. 40E kiɗi aŋ zilbiŋ miɗini seŋ zamai kai.
Kristu gaini David
Mat. 22.41-46; Mark. 12.36-37
41A miɗiɗi: Mu kuɗumu aŋ miɗi ɓa: Kristu a ahini David ɗa, maɵa maɵa ɗa? 42David gaini midini dama a muɗa war maktuɓ zi yama maini nɵa:
Epiɗ-ɗai a muɗa sini Epiɗi-ɗaŋa ɓa:
Ku sumnasi ɵima warni hlai zi hormo na wiya,
43haa mu bindiɗi gawku aŋ ɓok na ku ha amai sek miɗini.
44Na ɓa Ɗavid a yikaŋ ɓa a Epiɗ-ɗai ɗa, a kiɗa aŋ za ɓa a ahini maɵa maɵa ɗa?
Yesu a miɗiɗi buri e zi hangal gaiɗi ɗai n'e siɗi gadai gara ɗa
Mat. 23.1, 5-7, 14; Mark. 12.37-40
45Won hlai na ɗai paŋ e ɗa ziɓiri ɗa, a miɗiɗi wiiɗi ɗaini zi hitri: 46Ki zi hangal gaiɗi ɗai n'e ɗû wazagai ɗa, e firiyi e piyi ɗa gaini sapa na mogo kai, kapai e siŋki edi ɓa e ɗi n'abakai, e diri ɓa ɗai e ɵiɓiɗi wuti warni hlai na ɗai e tipi woni ta ta ɗa, e firiyi ɓa amlai warni sinagogne ɗa, e simni ɗa amai avut, sini simi ɗa e simni won hlai na wiiɗi ɗai n'abakai lai. 47E simi wazagaiɗi falakai na war greŋ ɗa, pini arɗi ɗai ɗa, e siiwi siiwa na mogo lai, nagai aga e niviti kûɗi-sariya na gdaŋ.
Zur Zeit ausgewählt:
Lukas 20: MUSGUM
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
