Lukas 21
21
Like na wiiɗi muni na war greŋ
Mark. 12.41-44
1A yima arni amai, a tiliɗi zi farai e ɗa si farai war kes n'e yimi farai warni ɗa, 2A tiliti muni na war greŋ na haw te mula sulai sulu woni lai. 3Nɵa a muɗa: Jre, mu miɗiki Muni na war greŋ na murga hanɗa te sa te suwa ɗai paŋ, 4buri nagai hanɗa paŋ e si likeɗi na ɗa pini abaini faraiɗi, amma na ɗa te sa na pini kiɗi kai na wiiɗi, an na aŋ tiɗi na te suma gaini a ni ta.
Yesu a muɗa miɗini ɓilki n'edi na wiini tempel
Mat. 24.1-2; Mark. 13.1-2
5Won hlai na ɗai zamai e ɗa miɗi gaini ɗa ɓa: A rga gaini ali-fuŋ na zafai gaini like zamai zamai na ɗai e siŋ sini Alaw, n'e jûvi tempel gaini lai ɗa, a muɗa: 6Mefeŋ aga a cosi, war mefeŋ ni ɗa, alini fuŋ n'aga ki tiliŋ na ɗa, ktai aga a hina gaini tiki amai midini maini kai.
Wazagai n'aga a siŋka miɗini dibiɗi yai
Mat. 24.3-8; Mark. 13.3-8
7E zilbiŋ e miɗi: Api zi hitri, wazagai hanɗa aga a za kaswata ɗa? Wala n'aga a siŋkiyi midini wazagai hanɗa a mada? 8Yesu a waya seŋ a miɗiɗi: Ki hini ɗif a wiliki edi kai, buri viya aga e hilisi siki war yikiŋa aŋ miɗi: Ta, mu ni. Pra, hlai a va li, ki tiɓi piɗi kai. 9Won hlai n'aga ki ɵini gaw gaini dûrgûzi, ki hiini kai, a dewele ɓa wazagai hanɗa a za avut, amma dibini hlai ɗa aŋsi hai.
10Nɵa a miɗiɗi: Afti ktai aga a faka amai sini afti na zamai, aftini pai ktai sini afti na wiini pai na zamai. 11Ziriyini afti n'abakai aga a za war hlai zamai zamai ɗa, vlak gaini wiyamai aga a za lai, wazagai zi mili hunai viya aga a za gaini wazagai zi siŋki n'abakai na war hlai n'amai.
Wala zi siŋki n'abai ɗa, a gir na ɗai aga e ziŋ siɗi ɗai zi hitri
Mat. 10.17-22; Mark. 13.9-12
12Amma wuzani hanɗa, ɗai aga e yimiki, e zigi gir, aga e siki edi war sinagogne aŋ ziki sariya. Aga e miliki warni daŋgai, aga e kiki wuzaɗi paakai gaiɗi lawaŋai lai buriya. 13Hanɗa aga a hûgûki aŋ zi zaida mada 14Ki yimi miɗiki ɓa: Aga ki zizini siki wuzani hlai gaini seŋ n'aga ki pli siki edi gaini kai. 15Buri Ta aga mu siki yel, na gawki e siɗi aŋ bili edi sini kai, e kiɗi aŋ miɗi seŋ zamai siɗi kaalai. 16Aga e siki edi ɗa e ɗi tamaiki, gaiɗi tawalakaiki, gaiɗi zagalakaiki, gaiɗi marmakaiki, aga e fiɗi zamai viya arbaki par.
Mat. 24.9-13; Mark. 13.13
17Ɗai paŋ aga e bili gaw siki buriya, 18Amma ayir na midiki ktai kaw aga te ba edi kai. 19Siiki, aga ki nivi suŋfa.
Ɓilki n'edi na wiiɗi Yeruzalem
Mat. 24.15-22; Mark. 13.14-20
20won hlai na ki tiliɗi vokɗi askarai e gûniti li Yeruzalem azumai ɗa, aga ki siɗi ɓa: Ɓilki n'edi na wiiɗi a ŋasi gobi. 21Nɵa ɗai n'e ɗa war Yudiya aga e rûvi amai midini huwuŋ, nagai n'e ɗa aha warɗi Yeruzalem ɗa, aga e yimi siɗi edi, nagai n'e ɗa edi par ɵimaɗi Yeruzalem ɗa, e niyi aha warni fuŋ n'abai ɗa kai. 22Buri mefeŋ ni ɗa, Epiɗ-ɗai aga a ziti sariya na jre, kapai wala n'aŋ gaini ɗû ɗa a va amai. 23Haw gara buriɗi falakai n'e ziyi gaiɗi nagai n'e siɗi fiyaw wiiɗi aliɗi war mefeŋ ni ɗa, gir n'abai aga a za midini afti, suwar n'abai aga a za buriɗi ɗai hanɗa lai. 24Aga e fiɗiɗi edi gaini kaɵkar, aga e kiɗi edi aŋ bege arbaɗi pinzibaɗi ɗai, ɗai n'edi par aga e kirpiti Yeruzalem azumai pini eziɗi haa mefeŋ n'a sa ta buri ɓa ɗai n'edi par e ziɗi gir wiiɗi Yeruzalem ɗa a va amai.
Gizini Ahini ɗif
Mat. 24.29-31; Mark. 13.24-27
25Wala zi siŋki aga a za siɗi futi gaini tile, gaini meeɵek lai. Ɗai na midiɗi yai paŋ hunai n'abai aga a yimiɗi haa e siɗi wala n'e ziŋ ɗa kai, won hlai n'aga e ɵini suurani yem-ra n'abai na gaini mayaw lai. 26Ɗai aga e mri tini hunai, won hlai n'aga e hiini midini wazagai n'aga a halasi midiɗi yai. Wazagai zi rgi n'arbani hlai n'amai ɗa aga a gigiɗa amai. 27Won hlai ni ɗai aga e tili Ahini ɗif a halasi arni ɗugul gaini spak warɗi abai. 28Amma won hlai na wazagai hanɗa a tika pini li aŋ za maini hanɗa ɵa ɗa, ki ɗiyi amai midini eziki, ki yimi arki amai buri pli n'edi na wiiki a ŋasi gobi.
Wala n'a siŋka ɓa pai n'Alaw te ŋasi gobi
Mat. 24.32-35; Mark. 13.28-31
29A muɗa seŋ zi siŋka maini zamai ktai pra siɗi maini nɵa: Ki tili sini luwuŋ Fige gaini luwaŋai zamai ɗa paŋ, 30Won hlai na ki tili sugoini a faka li aŋ goɗa ɗa, ki siɗi ɓa guɵur te ŋasi gobi. 31Nɵa, tili lai won hlai na ki tili wazagai hanɗa, aga ki siɗi ɓa, pai n'Alaw te ŋasi gobi. 32Jre, mu miɗiki Vna hanɗa aga a vada kai, haa wazagai hanɗa paŋ a za li. 33hlai n'amai gaiɗi yai aga a vada edi, amma seŋ na wiya aga a vada edi kai.
Simni karki
34Ki giɗimi siki pɗem kapai agulki a bunda guma pini gorom na wiini simi gaini ciini, gaini hiini zi giriŋi na wiiɗi duniya ɗa kai, kapai mefeŋ hanɗa, won hlai n'a luɓasi midiki a nivikisi ɓurgum kai. 35Maini ava nɵa kai, buri aga a halasi midiɗi nagai paŋ n'e ɗa midiɗi yai. 36Nɵa, ki simni karki, ki siiwi kûreɗ-kûreɗ, kapai ki nivi gdaŋ, aŋ kûrɗi siki edi mini wazagai n'aga a za ɗa paŋ.
37Girvudi ɗa, a hitra amlai warni tempel, duvuk ɗa a hala a faana amai midiɗi huwuŋ zi luwuŋ olive ɗa, 38Gorof par ɗai e hilisi warni tempel aŋ ziɓiri hitrai na wiini.
Zur Zeit ausgewählt:
Lukas 21: MUSGUM
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
