Markus 9
9
EJATO KAPITLO.
1Ta pala šob divesenge andes Jezus o Petruses, Jakobuses ta Johaneses paša leste ta gejes lenca kokeres paš i rik api baro brego. 2Pala vejeslo vaverčandes glana lende. Leskr kola vejena šuker, parnes her jib, keake našte kerelo kenk valkaro api phub parnes. 3Pala vejen Elias o Mozesester; ta kale rakerden o Jezusester. 4Pala andes Petrus o lab ta phendes api Jezuseste. Sikerpaskerrai, hi lačo, ta ham kai; me kamahas, ta kerahas drin tikne kherenge, tuke jek, o Mozeseste jek, ta o Eliaseste jek. 5Ta job džandes gar, ho phendeslo, vel ta has len dar. 6Pala vejes i felešnodi prala lende, ta drani felešnodi vejes i bašo ta phendes: Kava hi miro kamlo čavo; hunena apo leste! 7Ta sik, ta dikhen len trujum, dikhen pen kenkes buter her o Jezus kokeres paša lende. 8Her ta gejenle o bregester tele, phendeslo lenge, mo ta phenena kenkes ho ta dikhen pen tume, džin ta hi o dženenger‐čavo i mulender pre štardo. 9Ta jon rikerden kava kova paša lende, ta phučen pen tele ketene, ho kava hi: džin ta hi lo i mulender preštardo. 10Ta jon phučen les ta phenden: O livro‐sikermangerende phenena: Elias hunte džala sikerder? 11Job rakerdes ta phendes apo lende: Elias vela sikerder ta kerelo lauteres kome lačo; her hi nina i dženenger čaveste čindo, job štela but vri, ta hunte veles praserdino. 12Ta me phenau tumenge: Elias ta vejes kai hi lester čindo, ta jon kerden leha ho kamjen len.
13Ta vejeslo lesker sikermangerender dikheslo but čel drumo lende, ta rakerden lenca o sikermangerende. 14Keake sik, ta dikhes o celo čel Jezuses, štoken pen le, našenle kater, ta parkerden les. 15Ta job phučes len: Hoveske čingerena tume vaverkend? 16Pala rakerdes jek drani čeles ta phendes: Sikerpaskerrai me andom miro čavo paša tute, les hi i lalero mulo. 17Ta kai tapereles ha, vicerelo les tele; job čungeralo, ta kniršelo lesker dandenge, ta vela nina sano. Te me phendom tire sikermangerende, ta traden pen les vri, jon ta naštena gar. 18Pala rakerdeslo lenge ta phendes: Tume bipacepenenge! Her raha mo ta ačaues paša tumende? Her raha hunte hidžeraues kome tume? Anena les kate mande. 19Ta jon anden les kote. Ta keake sik dikheslo les, grotldes pes o mulo; ta job pejes api phub ta vargltes pes lo čungeles. 20Pala phučeslo leskr dadeste: Her raha hi, ta gejes leske kova? Kava ta phendes: Siter i čavengerciriester. 21But kopo vicerdeslo les ani jak ta ani pani, ta marenpen les. Ta kamehas tu, pala vehas džiskerpen mender, ta hilderve mender! 22Jezus ta phendes apo leste: Ta našte pacehas tu! Kon paces, koles vela ha hilderdo. 23Ta sik khardes o dad i čavester, rondes ta phendes: Me pacaua, rai; hilder miro bipacapenes! 24Ta dikhes Jezus, ta našjes o čel ketene, preterdeslo i čikalo mules ta phendes apo leste: Tu korelo ta lalero mulo, me phenau tuke: dža drani lesker nikli, ta ve kome gar ani leske. 25Pala dejeslo godlo, grotltes peslo ta gejes vri, ta job has her mulo, keake ta phenden buteder: Job hi merdo. 26Jezus taperdes les paši vast, ta job štejes pre. 27Her ta gejeslo ani kher drin, phučen pen les kokeres: Hoske ta našte tradervehas men les gar vri? 28Ta job phendas apo lende: Kava kova našte ta vela drucha či traderdo her druchi priserpen.
29Ta jon gejen pen kater nikli ta vejena druchi Galilea; job kamjes gar, ta džanelales čomoni. 30Job sikerdes lesker sikermangerende ta phendes apo lende: o dženenger čavo vela ani vast o dženenge, ta drin dives pala lesker merepen vela preštardo. 31Jon hajerden kava lab gar, ta daren pen len ta phučen les.
32Ta jon gejena pala Kapernaum. Her ta hi len khere, phučeslo len: Hoveske rakerden tume apo drom? 33Jon ta phenden či; jon čingerden pen vaverkend api drom, komes hi o bareder tela lende. 34Pala bešeslo peske tele, khardes kola dešduienge ta phendes apo lende: Ta kamelo jek, ta hilo glanduno, pala velo palduno hakenende ta valeto hakenender. 35Ta job lejes i čavo, čides les maškeral tela lende, lejes les ani lesker musia, ta phendes apo lende: 36Kon ta anela jekes kala čavender ani miro lab pre, anelo man pre, anela gar man pre, foni koles, kai bičerdes man.
37Johanes ta phendes apo leste: Sikerpaskerrai, me dikhena jekes, kai trades ani tiro lab bengen vri, me čingdam les, vel ta kandelo men gar. 38Jezus ta phendes: Ma čingerena tume! Tela kenkes, kai kerele api miro lab i baro kovmaster, ta našte čingerelo man sik. 39Kones ta hi gar midžik apa tumen, kava hi tumender. 40Kones ta del tumen i khoro perdo pani ani miro labeste, doske vel ta hi tume o Christusester, čačo me phenau tumen, job našerela leskr plaiserpen gar. 41Kones chojela jekes kala tiknender, kai pacen len amande, koleske vela fededer, ta bladen leske i jareskeri bar an leskr men, ta veles ani baro pani vicerdo.
42Ta chojela tut tiri vast, pala kure li tele; hi tuke fededer, tu ta dža banges ani hamasker džiben drin, her ta hi tut dui vastenge un ta vehes ani bengesker jak drin, ani hamasker jak, 43kai ta merela lenger kermo gar, ta o jak džala gar vri. 44Ta chojela tut tiro piro, pala kure les tele; hi tuke fededer, tu ta džahas gar mišto ani hamasker džiben drin, her ta hi tut dui pirenge un ta veles ani bengesker jak vicerdo, 45ani hamasker jak, kai ta merelo lenger kermo gar, ta o jak džala gar vri. 46Ta chojela tut tiro jak, pala cerda les vri; hi tuke fededer tu džahas jek jakester ani devlesker them drin, her ta hi tut dui‐jakenge un ta veles ani bengesker jak vicerdo, 47kai ta merelo lenger kermo gar, ta o jak džala gar vri. 48Ta hakeno vela o jakeske londo, ta hako delapen vela i loneske londo. 49O lon hi lačo; ta našerela o lon leskr zorelopen, hoveske našte ta kereles tume zorelo? Hi tumen lon an tumende, ta rikervena tume lačopen tela vaverkend.
Zur Zeit ausgewählt:
Markus 9: SINT1912
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
First published by the British and Foreign Bible Society in 1912.
