Markus 10
10
DEŠTO KAPITLO.
1Ta job kerdes peslo kater vri, ta vejes ani them o Judester i vaver rik o Jordaneste. Ta o čel vejes papele paša leste ketene, ta job sikerdes len komoli, her his lo sikelo. 2Pala vejena o Farizearia kate, ta phučen pen les: Hi i romes proserdo, ta mekelo lesker romni? 3Job rakerdes ta phendes apo lenge: Ho phendes tumen Mozes? 4Jon phenden: Mozes proserdes, ta vel i mekesker‐lil čindo, ta i romni vela meklo. 5Jezus rakerdes lender ta phendes: Vaška o džiskerpen tumaro dzienge čindeslo tumen kava rakerpen. 6Sikeder o kerepenester kerdes o devel rom ta romni. 7Doleske mekele o rom lesker dad ta lesker dai, ta ačelo paša lesker romni. 8Pala vena kala dui jek mas. Len hi gar kome dui, foni jek mas. 9Ho dejes o Devel ketene, mo ta kerela o dženo gar drana vaverkend. 10Ta i khereste phučenpen les komoli lesker sikermangerende prala kova. 11Ta job phendes apa lende: Kones kai mekela lesker romni ta leles i vaveraha, kava phagela lake i biab. 12Ta mekela i romni laker rom, ta lela i vaveres, pala phagela joi i biab.
13Ta jon andene čaven paša leske, ta taperelo len. O sikermangerenge preterden kolen kai anden len. 14Her ta dikhes les Jezus vejeslo chojemen ta phendes apa lende: Mekena ta vena o čavenge manca, ta čingeren tume gar lenca, ta kolenge hi o Devlesker them. 15Čačo me phenau tumenge: kones, kai lejela o Devlesker them gar pre, her i čavo, kava vela čačepaha gar drin. 16Ta job lejes len ani leskr musia, čides lenge o vast pre ta priserdeslo prala lende.
17Her ta gejeslo apo drom vri, vejes jekes, kai pejes glan leste tele, ta phučes peslo: Kamlo sikermaskerrai, ho mo ta kerau me, ta vel man o hamasker džiben. 18Jezus ta phendes apo leste: Hoske khare tu man „lačo“? Kenkes hi lačo her o Devel kokeres. 19Tu džane o rakerpen: Tu mo ta phage o biab gar, tu mo ta merehas kenkes, tu mo ta čorehas gar, tu mo ta chocherehas gar, tu mo ta patehas tiro dad ta tiri dai. 20Job ta rakerdes ta phendes apo leste: Sikermaskerrai, kava lauter rikerdomes me i ternopenester an. 21Jezus ta dikhes apo leste, kamjeslo les, ta phendes apo leste: Jek felela tuke; dža koi, bikere lauterho hi tut, ta de len o čorele, pala vei tu i barbalopen ani bolepen; pala vehe, ta dža mange pale. 22Job has dukhedo prala gova lab, ta gejes kajemen kater nikli; ta les has but kova. 23Ta Jezus dikheslo trujal ta phendes apa lesker sikermangerende: Her pharo vena kolen, kai hi len but love ani Devlesker them! 24O sikermangerenge kerdena bare jake prala lesker labenge. Jezus rakerdes komoli ta phendes apa lenge: Čave, her pharo vena kolen kai rikerenle an lenger love ani Devlesker them! 25Hi les lakoder, ta džala i divio grai druchi sibeskri‐cheb, her ta vela i bravalo ani Devlesker them! 26Jon ta šreken kome buteder ta phenden tela vaverkend: Kones našte ta vela dulo? 27Jezus dikhes len un ta phendes: Paši dženenge našte džala gar, ta paši Devleste hi lauter kerdo. 28Petrus ta phendes: Dikhehe, me mekjames lauter ta našames tuke pale. 29Jezus rakerdes ta phendes: Čačo, phenau tume, hi kenkes, ta mekelo o kher, ta o phrala, ta o phea, ta o dad, ta i dai, ta o čavenge, ta o phub vaške mange ta o sastobičerpeneste (evangelieste), 30kai vela peske gar šelkopo, kana an kava ciro kherenge ta phralenge ta phenenge, ta daienge ta čavenge ta phubenge tela čingerpenester, ta ana velociro phub (šveto) o hamaster džiben. 31But o erstender vena o paldunender ta but o paldunender vena i erstenender.
32Jon gejene api drom pre pale Jeruzalem; Jezus gejes glane lende, jon ta našen pen les trašerdo pale, ta kerden bare jaka. Ta job andes papele kola dešdujenge paša leste, ta phendeslo lenge ho vela prala leste. 33Dikhehe me džahas pre pala Jeruzalem, ta o dženenger čavo vel kola barerašaiende, ta livrosikermangerende, ta phuriende praldeto; jon marenpenles ta delpen les o biboldenge (gadženge). 34Ta kola prasenpen les ta čungeren les an, ta kuren les ta maren les; ano trinto dives velo papele preštardo.
35Pala štakerena Jakobus ta Johanes, čave o Zebedeusester, paše leste ta phenden: Sikerpaskerrai, me kamahas tu kere men, ho mangahas men tuter. 36Job ta phendes apo lenge: Ho kamena tume, ta me keraues tume? 37„De men, ta bešahas jekes tiro čačo rikeste, ta jekes tiro zerbo rikeste ani tiro railapen.“ 38Jezus ta phendes apo lenge: Tume džanena gar, ho mangenes tume. Našte piahas tume o khoro kai piau me? ta vel tume kola boldopeneste boldo kai vel me boldo? 39Jon ta phenden apo leste: Men našte les. Jezus ta phendes apo lenge: Tume piahas kova khoro kai piau me, ta kola boldopeneste vel tume boldo, kai vel me boldo. 40Ta o bešapen miri čačeske ta miri zerbeske, štela gar paša mande ta daues tume, foni kolen kai hi les kerlo. 41Her ta hunden kava kola deš, vejenle chojemen prala Jakobus ta Johanes, 42Jezus ta khardes len paša leste ta phendes apo lenge! Tume džanena, ta kolen kai vena her raien o čelenge andikhamen, ta kerden pen le bares prala lende, ta lenger bare kerden lenger rušapen (oder zor) prala lende vri. 43Gar hi keake tela tumende, foni kon ta kamel ta vela bares tela tumende, vela tumaro valeto, 44ta kon kamel ersto tela tumende, velo hakenender valeto. 45Ta nina o dženenger‐čavo vejes gar ta butikeren pen les, foni ta butikerelo job ta delo lesker džiben i mekapeneske o butender.
46Ta jon vejena pale Jericho. Her ta cerdeslo lesker sikermangerende ta i baro hufka čeleske i Jerichester vri, bešes o čavo o Timester, Bartimeus, o kašiko apo drom ta mangjeslo. 47Her ta hundeslo, Jezus ta hi, o Nazarenaro (Nazareteskero) dejeslo godlo ta phendeslo: Jezu tu čavo o Davidester, hi mange lačo! 48Ta but preterden les, ta mo hilo pokoni. Job ta dejes kome buteder godlo: Tu čavo Davidester, hi mange lačo. 49Jezus ačes tardo ta phendes: Kharen les kai. Ta jon khardena kova kašikeske ta phenden apo leste: Hal džiskero, šte pre, job kharela tut! 50Pala vicerdeslo lesker ripen nikli, štejes pre, vejes pašo leste. 51Ta Jezus rakerdes pašo leste: Ho kamehe, ta mo kerau me tuke? O kašiko ta phendes apo leste: Rabuni ta veles ta dikhau me! 52Ta Jezus phendes apo leste: Dža tuke, tiro pacepen hilderdes tuke! Ta sik dikheslo, ta našes peske pale api drom.
Zur Zeit ausgewählt:
Markus 10: SINT1912
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
First published by the British and Foreign Bible Society in 1912.
