Luka 5

Yesuŋo Mikepka Dokoine Edoraki Sarikoi

1Kaiwe maneo Yesu eŋe Genesaret namuŋ sawekino geki, so ŋei ŋerep loutneŋo Kaisale wane don desikei wane Yesu wano lotke more, osino lewage more lolikkakoi.

2Yesu eŋe otki, seki etke waraŋotpi sa qalakko metkoik, zawon teba teba ŋei eŋe sekiyene qeliŋore ket so kamagaene sauke okorakoi, 3pakiso, Yesuŋo sekiwa mane Saimon wane rara, eya wane kutno waki, pakiso Saimon rakaki, seki qebinkaki, qalakko ŋine qei qei weteke, pakiso, Yesu eŋe seki kutno ka mere, ŋei ŋerep magu suwaine yewa don kito edange.

4Edangi qoekiso, Saimon olale rake, “Geŋone so kimatkeŋone ŋine sekiŋine koso esorogeu, qei namugo weteuk ma koso kamaga ŋine zawon wane birau ketkep.”

5Rakiso, Saimonŋo olatke, “Kito ebo ebon, ŋene ruwo kirop pai, eyamo ŋene urata suwaine zok manerop mene, ŋo zawon mide mane mi ebune, ŋo iwa mo siluŋ goŋo ramainane, koso kamaga birawe ketkep.” 6Yale ra more, eŋe kamaga birau ketki, zawon magu suwaine kamagao watkeu, kamaga toeyakane okange. 7Pakiso, eŋe kimakopene seki maneo gekoi, yewa mete bira pakonbi sarikoi, sariu so zawon peikeu, sekiwo wamage, seki etke eretnarek watkekoik. Pakiso, zawon umatneŋo etotki, seki etke yewa oroge kiwetko ketkeik wane okangoik. 8Saimon Petoroŋo masi yewa kaki paki, Yesu wane kaitko wawetine qe more rake, “Waom! Qeliŋnane arinom, na ŋei borikine!”

9Pakiso, Saimon eŋine so kimakoune weneŋ gekoi, eŋe zawon magu suwaine ebukoi, yewa ka more welelepkekoi. 10Saimon kimatkine, Yakop so Yohane, Zebedi wane gipoletkine, ere yale waka oŋaetne qaeke, pakiso, Yesuŋo Saimon olatke, “Mi kaet gangep, ge ukude zawon urata mamaine, boaŋ ŋei ŋerep yale waka eŋano urata ma more ebunom, naŋano sarikei.”

11Pakiso, eŋe seki waraŋotpi qalakko wauk so, kine kineene korop qeliŋware so, Yesu ŋadino arikoi.

Yesuŋo Ŋei Mane Kubet Togole Saukkake

12Atak maneo Yesu eŋe ari ŋei mane kubetŋo solaine korop rokopkaki geke, mat yewao lotkeke, pakiso ŋei yewa eŋe Yesu kaki paki, oŋomka tamge more rake, “Suwaine, ge detnom paki, maine sauk nangene!”

13Yesuŋo metine solaino ma more rake, “Na det ganmaile, wakoenom!” Rakiso, yewaoka kubetŋo osiki paki, ŋei qeliŋkaki menaŋge. 14Pakiso, Yesuŋo ŋei wa rawetka more rake, “Ge kubetŋone osimaike, eya wane don kisiŋone ŋei mane mi edanikene, ge mosop ŋei, pris wano ari solaŋone sikankanom, kayake. Pakiso, solaŋone menaŋmaike, eya wane Mose wane don teweke more, soe soep mitnom, ŋei ŋerep eŋe ka more, solaŋone mo wakoemaike, yale desikei.”

15Ŋo siluŋ Yesuŋo ŋeiwa kubetine maki osike, eya wane don kisiŋo suwa arike, pakiso, ŋei ŋerep loutneŋo Yesu wane donine desikei wane, so zoma kubet korop yewa sauk oniyakane sarikoi. 16Yesu eŋe Kaisaleŋo zonom maniyakane, kepe ŋei me mat kine kine midaine, yaup sai pamaike, yewao eŋineka ari more, meŋe meŋen urata mamageke.

Yesuŋo Ŋei Mane Kiye Metine Seu Seune Ma Menaŋkake

17Kaiwe maneo, Yesuŋo ŋei ŋerep don kito edange, Kaisale papa togon welaine ŋei, Parisi so Skribe, eŋe weneŋ yewa metkoi, eŋe Galili kepeo mat mere arike, yewa ŋine so Yuda ŋine so Yerusalem ŋine Waom wane zonomŋo weneŋ Yesurop geki, zomaenerop ma menaŋ onge. 18Pakiso, ŋei natne eŋe ŋei mane kine so metine seuseune, yewa supiwo ma birau ketkiso teweke, Yesuŋo ma menaŋ kayakane eŋano ma arikoi. 19Ari more, mat koto ma wakesikei wane, ŋei ŋerep magu suwaine eŋano qekakoi, pakiso, teweke weti mat bakine kutno ma wa more, mat bakine lalageso, supiinerop birakau mat koto, ŋei ŋerep magu eŋane keuweno Yesu wane kaitko ket pake. 20Pakiso, Yesuŋo mali malipene korop pa ebonge, yewa kaki pakiso, ŋei wa kiye metine seuseune olale rake, “Kimane, geŋane sotŋone mo matali ginmaile.”

21Kaisale papa togon welaine ŋei, Skribe so Parisi, eŋe don yewa dere more, edomka auye rakoi, “Ŋei iwa eŋe ma ŋeiŋo Kaisale ma baik kamaike me? Ŋei maneŋo maine borikine ma mataliyake eya mida, Eŋe, Kaisale, wekuŋo maine borikine mataliyake!”

22Yale auwi, Yesuŋo wetenane kine dere more, edane rake, “Ŋine wetŋineŋo onoka wane yaline wetkemami? 23Diyawaŋo ewekine raikene, ‘Geŋane borikineŋone mo matali ginmaile,’ me raikene, ‘Wiyenom paki, arinom?’ 24Na ra qelaŋan ŋunbe, Ŋei Wawainane Gipole, eŋe kepeo borikine matali matali wane zonom pa manmaike.” Yesuŋo yale edangi pakiso, ŋeiwa kiye metine seuseune olatke, “Na golatpe, ge wiyenom! Papaŋone manom paki, matko arinom!”

25Rakiso, ŋeiwa eŋe ikopka ŋei ŋerep eŋane deene kutno wiye more papaine more pake, yewa ma more, so matino ari Kaisale bakomine kitoke. 26Ŋei ŋerep eŋe yewa ka more, zok welelepkekoi! So kaetongi, Kaisale bakomine kito more rakoi, “Masi kine mane, mi kakaze, iwa ukude wakongi kamaine!”

Yesuŋo Lewi Oraki Ŋadino Arike

27Eya wane ŋadino, Yesuŋo ari more kaki, ŋei mane takis mama, eŋetine Lewi, eŋe takis mama urumino metke, pakiso Yesuŋo olale rake, “Ŋadeno modat-nane sarinom.”

28Rakiso, Lewi eŋe wiye more, kine kineine korop ŋadek-kawareso, Yesu ŋadino modatka arike.

29Pakiso, Lewiŋo Yesu wane ŋara soep suwaine matino mitwarekiso, takis mama ŋei, so ŋei yauwine natne loutneŋo weneŋ ererop zakeo mere ŋara doku nekoi.

30Ŋo, Kaisale papa togon welaine ŋei, Parisi so Skribe eŋane tego natne eŋe Yesu wane dokoine eŋane detpi manerop boriki rakoi, “Ŋine onoka wane takis mama so borikine mama eŋerop ŋara doku nemami?”

31Rauso, Yesuŋo mainge edange, “Ŋei ŋerep solaene maine eŋe dokta wano mi ari okanmami, eŋe zoma kubetenerop edoka weku ari okanmami. 32Na ŋei ŋerep maine eŋet biŋek korop eŋe edorawe wetene maingekei wane mi ketkole, na borikine mama edorawe, wetene maingekei wane ketkole.”

Sawe Gege Wane Qeso Qeson

33Ŋei ŋerep natne eŋe Yesu olale rakoi, “Yohane wane dokoine eŋe ŋara doku wane sawe ge more, naso baŋem meŋenka okanmami. So Kaisale papa togon welaine ŋei Parisi, eŋane dokoene eŋe yale waka okan okanmami, ŋo geŋane dokone yemo eŋe ŋara doku yaupka ne okanmami.”

34Yesuŋo edane rake, “Ŋei mane ŋanomine mayake, eŋane lobokoune eŋane ŋara maulukeu, ŋerep ŋaune eŋe weneŋ eŋerop ye metki ka ŋido maine ŋara mawalukeu, kimakoune eŋe ŋara midaine maine yaup mesikei? O weneŋ midaka! 35Eŋe boaŋ ŋadino ŋerep ŋaune eya ma ariu, eŋerop weneŋ mi metki, kimakoune eya eŋe maine baŋ ŋado ŋara midaine kima-enane qom borik okane more ŋara wane sawe gekei me mesikei.”

36Yesuŋo don saeŋine iwa yalewaka edange, “Mane maŋo tutu mane takot muselo ŋine matoke more, takot sogine bara warakine yewao more qetusiyake. Eŋe yalewa okangi, takot musele yewa barakeyake, pakimo takot muselane tutuine yewaŋo takot sogine yewao mo rokopkeyake. 37Me mane maŋo wain musele qeki nomare sogine yewao weteyake, eŋe yalewa okangi, wain musele yewaŋo nomare sogine yewa abongi poripkeki, wain eya qakeyake, pakimo, nomare eya eŋe muzu geyake. 38Eya wane wain musele eya qeu nomare muselo weteyake! 39Mane eŋe wain sogine neki similekake, eŋe wain muselane bauine wamaike, paki ramaike, ‘Wain sogine yemo weku mane, eŋe yale raki paki baŋ wain muselane bauine wayake.’ ”

Zur Zeit ausgewählt:

Luka 5: onsNT

Markierung

Kopieren