Luka 4

Ŋei Borikineŋo Yesu Liwekkake

1Yesu eŋe Asu Koboboineŋo kotino watkeki, Yordan dokuwo ŋine zinge sariki, Asuŋoka qebinkaki, kepe yaup papaino arike. 2Ari ruwo kaiwe 40, yale gekiso, Ŋei Borikineŋo liwekkake, naso yewao ŋara midaine so ŋara mi nene yaup gemage, ŋarainane seukke.

3Pakiso, Ŋei Borikineŋo olale rake, “Ge Kaisale wane medep gemaineo, yemo ranom wesi iwaŋo ŋara okangep!”

4Rakiso, Yesuŋo mainge olatke, “Kaisale wane ekapŋo iwa yale ramaike, ‘Ŋaraŋoka ŋei gegeine mi ma wakoniyake.’ ”

5Pakiso, Ŋei Borikineŋo bonaga kiroine maneo iwenka wa okora more, kepe wane kutno ŋei ŋerep magune magune ŋei waomkopene eŋerop ge arikoi, yewa ikopka sikan kawareke. 6Pakiso, Ŋei Borikineŋo iwa yale olatke, “Zonom so eŋet biŋek pa ebone arimaike, iwa na ge ginwarekale, yewamo korop naŋane kutno motwarekoi, wane mo na ŋei mane manbe ramaine mangale, 7ge wawetŋone qe meŋen nangene, eya mo na ginbe kine kine iwa korop geŋaneka okaniyake.”

8Rakiso, Yesuŋo olatke, “Kaisale wane ekapŋo yale ramaike, ‘Waomŋone Kaisale eŋe weku meŋen kaikene, so qelitine qe mangene!’ ”

9Pakiso, Ŋei Borikineŋo Yesu Yerusalem matko Kaisale wane Bakom Urum wane bakine kutno mawa birakaki, pakiso olale rake, “Ge Kaisale wane Gipole gemaineo, yemo iwa ŋine sontake qei kepo ketnom. 10Kaisale wane ekapŋo yale ramaike, ‘Kaisale eŋe aŋelokoune raongi mauluke wareganikei.’ 11So mane iwa yale ramaike, ‘Eŋe meteene kutno geu ketpi, wesiŋo kiyeŋone mane mi kitasiyake.’ ”

12Rakiso, Yesuŋo olatke, “Kaisale wane ekapŋo iwa yale ramaike, ‘Waomŋone Kaisale Wawaine okanka more, misuk liwekkaikene.’ ”

13Ŋei Borikine eŋe yaleŋo yale okane, Yesu liwekka wareki qoekiso, qeliŋka more, naso mane wane toma geke.

Yesuŋo Urataine Galili Kepeo Kiyekke

14Yesu eŋe Asu Koboboinane zonomŋo kito qesiŋ makiso, koso Galili kepeo zinge arike, arikiso, don kisiineŋo mat eya korop suwa arike. 15Eŋe Yuda wane lewa lewaŋ urumene mere arike, yewao waket kito edange, pakiso, ŋei ŋerep korop eŋe mawakakoi.

Nazaret Welakoune Eŋe Yesu Ŋadekkakoi

16Yesu eŋe ge ari mage, koso suwa suwa matine Nazaret yewao yalewaka ari lotke more, qezarek peyadao Yuda lewa lewaŋ urumgo wake, eŋe peyada baŋem yale okane gegike, eŋe iwa koso Kaisale wane ekap dapore edaniyakane wiyekiso,

17Kaisale wane qelit ŋei, Isaiya oŋo don qeke, yewa manbi rapoke more, don iwa yale qeke yewa kake.

18“Waom wane Asuŋo naŋane kutno ketmaike, na ŋei ket qeqine eŋano kisi maep don ma arikalane ma wakon nanmaike. Eŋe mulap ŋei yewa siwot ongalane tale nanmaike, so deene pili pilikine yewa deene matok kalane, mulap urata ma more, bori worine yewa qekok ongalane. 19So na Waom wane naso bomileki, ŋei ŋerewekoune ma menaŋ oniyake, eya wane kisi maep don ra wakonmaile.”

20Yesu eŋe kibi yewa dapotki qoekiso, qeuwage more, qelit medep mangi paki, so ket pese metke. Paki, ŋei ŋereppa Yuda lewa lewaŋ urumgo metkoi, eŋe koropŋo deene Yesuka kalilip kakoi. 21Pakiso, Yesuŋo edane rake, “Waom wane don iwa dapotpe ŋine mo derimi, eya wane weleine ukude eyamo wakonmaike.”

22Rakiso, eŋe ebeene bonepke more, doninane weku mane detpi oŋaene qaeki rakoi, “Eŋe iwa mo Yosep wane gipole mida me?”

23Yesuŋo iwa yale edange, “Ŋine naŋane don naŋengo more more iwa yale mane ra okanmami, ‘Dokta, ge goŋomka ma menaŋ nagumaine.’ Ŋine dere nolasikei, ‘Kaperneyam matko manom, kisiŋone detokanmaine, yalewaka iwa geŋone matŋono manom, kaŋem.’ 24Yale rau, na welekatne don naŋengo ŋidanbe detpi, Kaisale wane qelit ŋei eŋine kepe matino ge more done raki, ŋei ŋerep eŋe maine mi tewekkei.

25“So Welekatne ŋidanbe, Elaiya geke, naso yewao kaiwe suwaine okoraki, koma karewe so nat paromine meso 6 yale paki, ŋara siukki bodi suwaine wakone, kepe rokopke pake. Naso yewaoka Israel eŋane kepeo mala loutne gekoi, 26Ŋo siluŋ Kaisale eŋe Elaiya rakaki, Israel eŋano mi arike, eŋe rakaki qelaŋ ŋerep mala mane Zarepat matko, Sidon kepeo geke, eŋano arike. 27So propet Elisa geke, naso yewao Israel eŋane keuwo ŋine ŋei loutne kubet togon gorop gekoi, ŋo siluŋ Israel eŋane keuwo ŋine ŋei mane wane kubetineŋo mi osike, yemo Naman, Siriya kepeo ŋine, eŋane kubetine weku osike.”

28Yesu eŋe yale ra edangiso, ŋei ŋerep Yuda lewa lewaŋ urumgo metkoi, eŋe detpi sigileki, sotene osike. 29Pakiso, wiye more mat ŋadino Yesu ma birakau qeinat ketki ma ari more, matene metke bonaga yewa wane pupulukino iwenka wa more, sora mezeno ma ari more, sorao rupapkau kesiyakane okangoi. 30Ŋo siluŋ mi kauso, eŋe ŋei ŋerep keuweno ŋine piŋdige more, ket siu siuko sanka arike.

Yesuŋo Asu Borikine Ŋei Mane Wano Ŋine Esopkake

31Yesu eŋe ari mage, Galili kepeo mat mane Kaperneyam, yewa lotke more, qezarek peyadao ŋei ŋerep edane kito ebon okange. 32Yesu wane donine ewinerop raki, ŋei ŋerep eŋe dere more welelepkekoi. 33Yuda lewa lewaŋ urumgo ŋei mane asu borikinerop metke, 34eŋe Yesu ka more, suwaineka boka more rake, “Yai! Yesu Nazaret welaine, ge daleo okan ŋonikenane sarimaine? Ge matali ŋonikenane sarimaine me? Na det ganmaile, ge Kaisale wane ŋei Koboboine.”

35Yale rakimo, Yesuŋo asu borikine don olale more rake, “Ge doŋ mane more, ŋei yewa qeliŋka saket arinom!” Rakiso, asu borikine eŋe ŋeiwa ma papkaki, ŋei ŋerep keuweno ket rasu pakiso, eŋe saket arike, ŋei wae mi matalikake.

36Pakiso, ŋei ŋerep eŋe ka more oŋaene qaeki, auye qeuye okane more rakoi, “Don iwa daleo? Eŋe ewe bibirop so zonomineropŋo asu borikine raongi, saket arimami!” 37Pakiso, Yesu wane don kisi yewaŋo kepe mat yewa suwa rokopke arike.

Yesuŋo Petoro Sewenine Ma Menaŋkake

38Yesu eŋe Yuda lewa lewaŋ urumgo ŋine ket more, Saimon wane matko wake. Saimon wane sewenine eŋe zoma gereunerop qeki pake, pakimo eŋe Yesuŋo mapik kayakane ra more olatkoi. 39Pakiso, Yesu eŋe Saimon sewenine pake, mat kotine yewa waket more papainane osino okora, so zomawaeŋo qeliŋ-kayakane don kukŋan togoleka olatke, pakiso osopkaki zoma eŋe ŋerep yewa qeliŋ-kakiso, ŋerep eŋe esat yewaka wiye more koso, Yesu so dokoine ŋaraene mire mauluk okane ebongi nekoi.

Yesuŋo ŋei ŋerep Loutne Ma Menaŋonge

40Kepe qoekiso, ŋei ŋerep natne eŋe kimakopene zoma kine kine natneŋo ebuki pa okangoi, yewa Yesu wano ebu sarikoi, pakiso, Yesuŋo metine leweteno weku weku more, korop ma menaŋonge. 41Asu borikine eŋe yale waka, ŋei ŋerep loutne eŋane kotoeno ŋine esopongi saket more, aro suwaine aroke more rakoi, “Ge Kaisale wane Gipole!”

Pakiso, Yesu eŋe asu borikine yewa eŋe don mi raikei wane rawetonge, onoka wane eŋe kineine iwa yale detkoi, eŋe Mesiya.

Yesu Eŋe Yuda Lewa Lewaŋ Urum Natne Mere Arike, Yewao Don Edange

42Kepe qaekiso, sakoropka, Yesuŋo wiye more mat yewa qelige, kepe nat paromine ŋeiine midaine pake, yewa ari geke. Pakiso, ŋei ŋerep eŋe zuwaŋka ge mage, so maratkakoi, maratka more eŋerop geyakane ma walukkakoi. 43Pakiso, Yesu eŋe siluŋ edane rake, “Na Kaisaleŋo daleo ŋei ŋerep wareonmaike, eya wane kisi maep donine mat baŋem ŋei ŋerep korop ra edanikalane Kaisaleŋo biranangi ketkole.”

44Yale ra edane so Yuda kepeo Yuda lewa lewaŋ urum mere arike, yewao wa more, ŋei ŋerep don edane kito ebon okane geke.

Zur Zeit ausgewählt:

Luka 4: onsNT

Markierung

Kopieren