Yohane 5
5
Yesuŋo Betsaida Namugo Ŋei Mane Ma Menaŋkake
1Eya wane ŋadino Yuda ŋei eŋane zonom ma taboŋ met met wane nasoine bomileki, Yesuŋo Yerusalem matko wake. 2Ŋo Yerusalem mat wane kotino, Lama Madet wane osino doku namuŋ mane pake. Hibru eŋane dongoka Betsaida ora okanmami. Doku namuŋ eya wane meuno mat mete maneŋo (5) lolike metkoi. 3Ŋei zomaenerop eŋe magu suwaineŋo mat yewa wane kotino pa arikoi, ŋei natne deene pilik pilikine, natne kiye wawetene qoi qoine so, seuseune, eŋe dokuŋo uŋalanine mayakane tomaka pamaŋkoi. 4Onoka wane naso natno Waom wane aŋelo maneŋo doku namuŋ koto ket kitoki, doku uŋalan geki detkei wane. Uŋalane dere more, zoma ŋei mane eŋe alakane doku namuŋ yewao ket maŋke, eŋe zoma kine kine daleoŋo mamaŋke, yewa qeliŋkayakane. 5Ŋei mane yewa metke, eŋe zoma kaki koma 38 yale zomarop metke. 6Yesu eŋe kaki ŋei yewa eŋe papa set pake, eso Yesu eŋe detke ŋei yewa eŋe zoma kaki naso kiroroine geke, eya wane Yesu eŋe ŋei yewa qesonka rake, “Ge menaŋ ganiyakane simin ganmaike me?”
7Zoma ŋeiŋo mainge rake, “Suwaine, doku uŋalane ma okanmaike, naso yewao ŋei maŋo neu biranangi doku namugo kesikale, rawe paki kesikalane ma kororoge metpe ŋei natne edo mo lewine yuwannane dokuwo ket okanmami.”
8Raki so Yesuŋo olatke, “Wiye okora, uwamŋone so supanagu papaŋone manom, paki ma arinom.” 9Ŋei yewa eŋe esatkamde menaŋkaki, uwam lameke papaine puk maso arike.
Masi iwa yemo zonom ma taboŋ met met wane kaiwe naso yewao wakonge. 10Eya wane Yuda ŋei ŋetne eŋe Yesuŋo ŋei ma menaŋkake, eya olale rakoi, “Iwa yemo zonom ma taboŋ met met eya wane naso, ge ŋenane ra rokop don yewa qebarake more, uwamŋone manom paki arimaine.”
11Rau mo edange, ŋei mane neuki menaŋ nanike oŋo nolale ramaike, “uwamŋone mam paki mo arinom.”
12Edangi eŋe qesonka rakoi, ŋei yewa maŋo uwamŋone mam paki arikenane golalike?
13Paki mo ŋeiwa menaŋge, eŋe ŋei maŋo ma menaŋkake eyamo eŋe mi detkake, onoka wane yewao ŋei ŋerep magu suwaine okorakoi, yalinane Yesu eŋe eŋane keuweno siuke arike.
14Ŋado Yesuŋo ŋei yewa Bakom Urumgo maratkaki paki olale rake, “Kanom, ge mo ukude menaŋ maine. Borikineŋone qeliŋka warekene, midao yemo kine kine umatne koso maine wakon-ganiyake.”
15Paki so ŋei yewa eŋe Yesu qeliŋka ari Yuda ŋei ŋetne edane rake, “Ŋeiwa na ma menaŋ-nanike yemo Yesu.” 16Kine iwa yale wane Yuda ŋei eŋe kiyeke Yesu ŋabakakoi. Yesu eŋe zonom ma taboŋ met met naso yewao zoma ŋei yewa ma menaŋkake eya wane eŋe ŋabakakoi. 17Yesuŋo mainge edange, “Naŋane Magane eŋe urata naso baŋem ma okanmaike, eso na yale waka weneŋ mamaile.”
18Don yale rake, eya wane Yuda ŋei ŋetne eŋe zok manerop det worikkau paki, qekei wane rakoi, eŋe zonom ma taboŋ met met wane ra rokop don qe barakke, so eya waneka mida, Yesu eŋe Kaisale wane eŋine Magaine rake, eso eŋe yalewa raki paki, oŋomka Kaisale rop rokop weku takotkeke, eya wane eŋe detpi, sigileki, qekei wane rakoi.
Yesu Eŋe Ma Wisikaeŋone More Turuŋzane Don Rakoke Ŋeboniyake.
19Paki so Yesuŋo edane rake, “Na ŋidanbe detpi, Magak mane wane Gipole eŋe oŋomka kine kine mane eŋine wetno mi okaniyake. Midaka. Eŋe kaki Magaineŋo kine kine okaniyake, eŋe yewaka mogare okaniyake. 20Magak eŋe Gipolane zok similekaki, masi kine kine korop oŋom ma okanmaike yewa sikanka okanmaike. Eŋe baŋ masi kine kine kakapa suwaine iwa kepo wane rokop mida eya yale, waka mayakane sikan kayake. Paki mo ŋine baŋ korop oŋaŋine qaeyake. 21Magak eŋe ŋei seuseune ma wisikae one more, gege togon ebon okanmaike, rokop yale waka medep eŋe eŋine simileinane ŋei mane gegeine maratka more, gege togon manbe ra maniyake. 22Me Magak oŋomka ŋei turuŋine eboniyakane don mi rakoke ebon okanmaike, eŋe turuŋine rakoke ebo ebon wane urata yemo korop Gipole manwareke. 23Eya wane ŋei ŋerep korop eŋe Magak ewine kito okanmami, rokop yale waka Gipole ewine kitokoi, ŋo ŋei mane eŋe Gipole ewine mi kitoyakeo, eŋe Magakŋo birakaki ketke, eŋe yale waka bakomine mi kitoyake.
24“Na ŋidanbe detpi, ŋei mane eŋe naŋane don desiyake, mo talenangi ketkole, eŋe weneŋ malip kayake, eŋe gege togon mo eyaka marat kamaike, so eŋe sot turuŋ wane don urata mi mayake, midakaka. Eŋe seuseu mo ŋadekkake, wane ukude yemo gegeo waketke gemaike, so naso baŋem ge wayake. 25Na ŋidanbe detpi, naso mo bomileyake, naso mokaka bomilike wane ŋei seuseune eŋe baŋ Kaisale Gipolane don desikei, paki mo eŋe done desikei, so eŋe wisikae wiye, gege togon ge arikei. 26Magak eŋe gege ma wakone ebo ebon wane zonom eŋino pake, rokop yale waka Gipole eŋe gege ma wakone ebo ebon wane zonom mange. 27Eŋe Ŋei Wawainane Gipole, eya wane Magak eŋe turuŋ wane don ŋei rakoke eboniyakane zonom mange. 28Ŋine oŋaŋine misuk qaeki, naŋane don eya wane dereret urata maikei, naso mo bomilemaike, yewao ŋei seuseune deŋesereo pamami, eŋe korop eŋine boka wokaine desikei, 29paki, eŋe baŋ deŋesereo ŋine wiye saket warekei, ŋei natne tanik manik mayakatne okangoi, eŋe baŋ wiye more gege togon marat-kaikei, ŋo ŋei natne tanik manik qotkoine okangoi, eŋe baŋ wiye more, sotenane turuŋine don urata maikei.”
Kaisaleŋo Yesu Wane Kine Ma Wakon Okanmaike
30Na nae wetno bonepnane urata mane maine mi makale, “Kaisaleŋo nolatmaike, eya wane rokopkoka turuŋ wane don rakoke ebonmaile, eso noŋo, turuŋ wane don rakoke ebo ebon, yemo koboboine, onoka wane, na nae similene mogare urata yewa mi mamaile, na Magakŋo talenangi sarikole, eŋane donka teweke more mamaile.
31“Ŋo na noŋomka nae kinene ra wakongale, yemo don yewa ra wakonmaile, eya mo wele midaine okaniyake. 32Ŋo siluŋ ŋei mane yewa oŋo naŋane kine ra wakonmaike, paki na detmaile, eŋe naŋane kinene ra wakonmaike eyamo welekatne. 33Ŋine alakan Yohane wano don motpi arike, paki so oŋo don wele yewa ra wakonge. 34Ŋei ŋido naŋane kinene ra wakongei wane na mi ra okanmaile, midaka, na iwa yale ra okanmaile, yemo weku, naŋane kinene detpi paki, gege togon ma wakon ŋuniyakane ŋinŋinane ra okanmaile. 35Yohane eŋe welekatne kiwa yale geke. Gemore laweke so qelaŋan ŋunge, paki so ŋine nasomde bamgoka eŋane qelaŋaninane simile detkoi. 36Ŋo siluŋ naŋane tungo, maneŋo naŋane kinene ra wakon okanmaike, eŋe Yohaneŋo kinene ra wakone ŋibonge, eya wane rokop midakaka, eŋe zok manerop kakapa suwaine. Na urata korop ma okanmaile, yemo Maganeŋo makalane ra ningane yewa ma okanmaile, wane urata ma okanmaile, yewaŋo nae tungo kinene ra qelaŋangi wakon okanmaike, so Magakŋo biranangi ketkole, yewa urataneŋo ŋei ŋerep sikanon okanmaike. 37So Magakŋo biranangi ketkole, oŋom naŋane kine yale waka ra wakonge, ŋine eŋine aŋaino ŋine don mane mi detkoi, me eŋine kaitine mane mi kakoi, midakaka, 38so ŋine eŋine donine yewa koto ŋino motpi paki, warekau mi pa okanmaike, onoka wane, ŋine birakaki ketke, eŋe wetŋineŋo mi malipka okanmami, yewa wane ŋine yaleoken okan okanmami. 39Ŋine Kaisale wane ekapko pamaike yewa dapot okanmami, onoka wane, ŋine iwa yale det okanmami, yewa wane kotino ŋinŋine baŋ gege togon maratkaikei, so ekap yewaŋoka naŋane kinene ra wakone okanmaike! 40Ŋo onoka wane ŋine eweke more gege togon maratkaikei wane naŋano mi sari okanmami?
Yuda Ŋei Eŋe Yaup Wane Mose Wano Makatakkoi
41“Na ŋei edo sola mawa mawa kine kine okannanikei wane ma zuwaŋ mi okane ramaile. 42Ŋo na ŋinane kine mo detlukmaile, ŋinane kotoŋino yemo Kaisale wane simileŋo mi paulukmaike. 43Na Magak wane eŋetko eŋine tungo biranangi sarikole, ŋo ŋine siluŋ kima mi okan nanmami, gemage ŋei yauwine mane eŋine eŋetko sariki ŋine baŋ kima okankaikei. 44Ŋine ŋidomka sola mawa mawa, eya wane yemo simile ŋun okanmaike, ŋo ŋine Kaisale weku eŋano ŋine mawa mawa yewa mi togole more yuwane mamami paki, mo daleo ŋine wetŋineŋo maine eŋe malipkaikei? 45Ŋine naŋane iwa yale misuk desikei, oŋo ŋenane kineze eŋe baŋ Magaine ra wakone olasiyake, i midakaka. Mose eŋe wekuŋo baŋ ra wakon ŋuniyake. Moseŋo qesiŋ ŋoniyake rau paki, eŋe mogatmami, oŋo baŋ ra wakon ŋuniyake. 46Ŋo ŋine welekatne Mose wane don dere malip kakoi ra, yemo naŋane don yale waka dere malip kaurap, onoka wane, Mose eŋe naŋane ra more don eya qeke. 47Ŋo Moseŋo don qeke, yewa ŋine mi dere malip kakoi, paki mo daleo noŋo don ramaile, iwa maine dere malipkaikei me?
Zur Zeit ausgewählt:
Yohane 5: onsNT
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2012, Wycliffe Bible Translators, Inc. All rights reserved.
