Yohane 15

Yesu Eŋe Welekatne Wain Ekiine

1“Na welekatne wain ekiine, ŋo nae Magane eŋe wain eu welaine. 2Qogine kopne me mulaune me metine bori worine natne naŋano seuseune wele midaine okane pau, eyamo yeine magakŋo kitare qakki arikei, ŋo mulaune natne wele maine, eyamo wareongi, wele manerop qekei. 3Ŋine yemo kisi maepdon mo ŋidanbe detkoi, paki yewaŋo ŋibuki qelaŋangoi gemami, 4Ŋine wet mali malipŋineŋo na ma qotnane gekei, eso na ŋine baŋ yale waka wetneŋo ma qotŋune gekale. Ŋo wain qogine mane eŋe eŋineka pa more wele mi qeyake, eŋe wain kinerop takot nagu pa more, yemo wele maine qeyake. Rokop yale waka ŋine weleŋine maine mi qekei, na wetŋineŋo neu ma qotnane, narop tako rakot geu paki, yemo weleŋine maine qekei.

5“Na wain ekiine, ŋo ŋine qogine kopne, mane eŋe narop takorakot geyake, eso na eŋerop takorakot gekale, eŋe weleine zok manerop wakoniyake. Ŋine na midaine geu, paki kine kine mane maine mi maikei. 6Mane eŋe na wetŋo mi ne qotnane geyake, eŋe eki qogine yale kitare biraki ari seukeyake. Eki qogine yaline yemo korop meik ware gerepko peikki wau gerepŋo zeki sololokki paki, korop mida lelekei. 7Ŋo ŋine na wetŋo ne qotnane geu, naŋane donŋo ŋinane koto ŋino payakeo yemo ŋine kine kine mane wane ŋungi meŋenkau paki ŋine maine maratkaikei. 8Yale waoken okane more naŋane Maganane eŋet biŋek mawa sikan onikei, so ŋine weleŋine zok manerop qekei. Numa yalewa okanikei yemo ŋine naŋane dokone okangei. 9Magakŋo na wet maep okannan okanmaike yale waka noŋo ŋine wet maep okanŋun okanmaile, eya wane ŋine naŋane wet maepkoka gekei. 10Na Maganane aŋa donne so ra rokopine tewekewe paki eŋane wet maepko gemaile, ŋine naŋane aŋa don so ra rokop donne tewekeu paki, naŋane wet maepko gekei,

11“Na don iwa ŋidan waremaile, yemo naŋane wetpeseŋo ŋinane kotoŋino maine kesiyake, paki ŋinano wetpeseŋo maine watwatko rokopke payake. 12Naŋane aŋa donne me ra rokop donne, yemo iwa yale, noŋo wet maep okanŋun okanmaile, yale waka ŋine ŋidomka wet maep okan nagu gekei. 13Sogino daleo wet maep okan nagu gekoi? Iwa yale, ŋine ŋinŋine simile eya misuk mogatka gekei. Ŋine doku tau tau magu kima kopŋine eya eŋane simile zok manerop dere gekei, ŋinano ŋine maneŋo kimakoune eŋane ra more gegeine qaisikkaki paki, seukeyakeo, eŋe kimakoune wetŋo ma qotone more malipone okarayake, eya mo menageyake. 14Na don ŋidanmaile yewa tewekkeiwo, yemo na ŋunbe naŋane kimakopne okangei, 15qelit mama eŋe suwaineineŋo kine kine onokaka mamaike, eya mo mi detlukmaike, eya wane turuŋine yemo na ŋine urata medep mi ŋidora more, na kimakopne ŋidoramaile, onoka wane na Maganano ŋine don kine kine detkole, yewa korop mo ŋidan-waremaile, eya wane na kimakopne ŋidoramaile. 16Ŋido na mi ma wakonnangoi, noŋo ŋine ma wakon-ŋungole, so ari geu paki wele loutne maratkau baninine payakane uratao bira-ŋungole. So ŋine kine kine yewa me yewa Magak wanoŋine maikei wane rau paki naŋane eŋetne nora meŋenkau eŋe baŋ ŋiboniyake. 17Iwa yemo na ra rokop me aŋa donne iwa yale ŋidanmaile, ŋine ŋidomka wet maep okan nagu gekei.”

Kepe Ŋeiŋo Yesu Ŋabakakoi Yalewaka Dokoine Ŋaba Onikei

18“Kepe ŋei kisi maepene midaine eŋe qaisik-ŋunbi ŋine iwa yale desikei, eŋe alakan na yale waka qaisiknangoi. 19Ŋine kepe iwa wane biŋek ra yemo kepeo ŋine ŋei eŋe enŋene biŋek wane kima maine okan ŋunbirap, yemo noŋo ma wakonŋunbe kepe iwa wane tanik manik qeliŋgoi wane ŋine eya wane biŋek mi gemami. Kine yalinane kepeo ŋine ŋei ŋerep eŋe qaisikŋunmami. 20Na iwa yale ŋidangole yewa detmami, ‘Qelit mama maneŋo suwaineine mi yuwan kayake,’ eŋe na ŋaba okan nangoi kop, yemo ŋine baŋ yalewaka okanŋungei. 21Eŋe siluŋ tanik kine kine iwa baŋ okanŋun warekei, onoka wane, na Magakŋo ŋinane ra biranangi ketkole, ŋine naŋane biŋek gemami, eya wane kine eŋe mi detkamami. 22Na eŋano sariwe paki, kine kine mane mi edangole ra, yemo eŋe borikine midaine geurap. Iwa yemo eŋe koso borikineene manerop motkekei wane numaine mane mi pamaike. 23Mane eŋe na qaisiknan okanmaike, eŋe Magane yale waka qaisikka okanmaike. 24Na eŋane keuweno masi kine kine, ŋei maneŋo mi mamaine, yewa mawe mane mi kaurap yemo eŋe borikineene midaine geurap. Iwa yemo mawe eŋe mo kauluk warekoi, ŋo koso siluŋ na so Magak weneŋ qaisik-ŋot okanmami. 25Yale okanbi, enŋene Ra Rokop Dongo don mane qekoi, eya wane wele wakonge, ‘Eŋe kine midaine naŋenka qaisik-nangoi.’

26“Qesi Qesiŋ baŋ sariyake, don wele eya wane Asu, oŋo Magak wanoŋine sariyake. Noŋo baŋ Magak wanoŋine talekawe ŋinano sariyake. Sariki paki naŋane kine ra suwayake. 27So ŋine weneŋ yale waka naŋane don ra qelaŋanikei, onoka wane ŋine mo qei kino kiyeke narop gekoi, ge sarimage iwa gemami.

Zur Zeit ausgewählt:

Yohane 15: onsNT

Markierung

Kopieren