Yohane 10
10
Yesu Eŋe Lama Ware Ware Maine
1Yesuŋo koso takotke more rake, “Na welekakatne ŋidanbe detpi, ŋei mane eŋe lama eŋane sen koto madetkoka mi wakesiyake, eŋe yaup tewinoka sen yuwane wakesiyake, eŋe kobu ŋei so ŋei mane wane aboŋ kine kine kobu teba waraŋ ŋei. 2Ŋo ŋei mane eŋe madetkoka wakesiyake, eŋe yemo lama eŋane ware ware. 3Madet wane ware ware eŋe oŋom ŋei yewa wane madet eya lalageyake paki, eŋine lamakoune eŋe eŋine donine eya maine desikei paki, eŋe eŋeteene eya maine weku weku edora iwenongi, inat sakesikei. 4Eŋe lamakoune koropka inat ebu saket ware more, oŋom ŋetne kisage alakangi, lamakoune eŋe welaenane don mo det okanmami, wane ŋadino mogare arikei. 5Eŋe ŋei mane wane ŋadino mi arikei, midakaka, eŋe ŋei maneŋo edorayakeo, yemo lama eŋe ŋei yewa kakakka ari warekei, onoka wane, eŋe ŋei natne eŋane doneene mi det okanmami, eya wane, eŋe donine kuneŋine dere more, kaetongi rakake arikei.” 6Yesu eŋe don naŋengo kito edange, ŋo eŋe kine onoka wane don yalewa ra ŋedanmaike, eya wane kine mane dere kaŋem, eŋe yalewa ra mi dere qelaŋangoi.
7Paki, Yesu eŋe koso manerop edane rake, “Na ŋidanbe detpi, welekakatne na noŋom lama eŋane madet, 8Ŋei korop naŋane numa alakane sarikoi, ŋei yewa eŋe korop kobu mama so kobu teba teba, paki eya wane lama eŋe doneene mi detkoi. 9Na madet, eya wane ŋei mane eŋe naŋanoka sariki paki, sen koto wakesiyake, eŋe baŋ Kaisaleŋo mayake, paki eŋe baŋ ululuŋ sari sakesiyake, so waket ariyake, yale okane, Asu wane ŋara moriyan maine marat kayake. 10Kobu mama ŋei eŋe yemo kine kine mane bile mayakane mi sarimaike, eŋe yemo lama kobu ebu more enguyakane, so matali qetali ebuyakaneka sarimaike. Na yemo lama eŋe gegeene wakongi, gege togon so Asu Koboboine eŋano wat watko paki geulukkei, eya wane na sarikole.
11“Na noŋom yemo lama eŋane ware ware maine, lama ware ware maine eŋe lama eŋane raki paki, gegeine maine qaisikka more seukeyake. 12Ŋo ŋei eŋe lewine qolekaikei wane raki paki, eŋe lama maine mi ware oniyake, so oŋo lama eŋane magak maine zok mida, yewa wane eŋe kaki, kasi zubaine mane sariyakeo, eŋe kakakka more, lama qeliŋongi paki, kaet ariyake paki, kasi zubaine eŋe lotke more, lama eya korop edore more esopongi, yau yaup ket giŋ qiririŋ ari warekei. 13Ŋeiwa yewa eŋe yale okaniyake, eŋe yemo onoka wane mida, eŋe yemo lewine mayakaneka urata ma ge okanmaike, eya wane eŋe kaet arimaike paki, eŋe lama ware-oniyakane mi desiyake. 14Na lama eŋane ware ware maine, na lama magukopne na eŋe detluk onmaile, ŋo lama magukopne eŋe yalewaka na maine detluk nanmami. 15Rokop yale waka Magak eŋe na detluk-nanmaike, eya wane na lama eŋane ra more gegene qik kaikale, so lamakopne qesiŋ-onikale. 16Na lamakopne natne gemami, eŋe Yuda wane sen iwa wane kotino mi gemami, na eŋe weneŋ yale waka ebu sarikale, paki eŋe naŋane donne desikei paki, eŋe lama magu weku okanbi, ware wareene eyamo weku noŋomka baŋ ware-onikale.
17“Magak eŋe naŋane okan-kamaike, onoka wane yemo na gegene kepe ŋei eŋane ra more, qaisik-kawe paki, seuseu makale paki, na koso wiye gege manerop makale, eya wane. 18Ŋei maneŋo naŋane gege maine mi maki mida leleyake, midakaka, na nae similenane noŋomka gegene qaisikka ebonikale. Na gegene qaisik kakalane zonom pa ninmaike, so na gegene koso manerop makalane zonom weneŋ pa ninmaike. Magakŋo na yale wa okangalane raki paki nolatke.”
19Yesu eŋe don iwa rakane, Yuda ŋei eŋe koso manerop wiri magu etke okangoi, 20paki eŋe ŋei loutneŋo iwa yale rakoi, “Eŋe asu qotkoine magemaike! Eŋe qelaŋ! ŋine onoka wane done raki ket more detmami!”
21Ŋo natne eŋe rakoi, “Ŋei mane eŋe asu qotkoineropŋo don iwa yale maine mi rayake! Asu qotkoineropŋo ŋei deene pilik pilikine eŋane deene daleo ma lotkekei? Eya midakaka!”
Yuda Ŋei Eŋe Yesu Ŋabakakoi
22Iwamo Yerusalem matko Bakom Urum mosop kakoi, eya wane peyada me zonom ma mesikei wane naso mo bomileke, eŋe sogino Bakom Urum Kaisale wane biŋek qe eŋane eŋetko rakokkoi, eya wane wetke metmaŋkoi, eya wane nasoine bomileke, naso yewa mo momo nasoo. 23Yesu eŋe Bakom Urum koto waket Solomon wane Tougo arike. 24Ariki Yuda ŋei eŋe sari lolikkau paki olale rakoi, “Ge naso dango ŋene ra qelaŋane ŋedangene, ge welekakatne ma? Ge Mesiya me? Kaisaleŋo ŋei ŋerep ebukenane biragange, yemo ge ŋene ra qelaŋane ŋedannom.”
25Yesuŋo mainge edane rake, “Na mo ŋidan okanmaile, ŋo ŋine siluŋ naŋane don yewa dere mi malipka okanmami, na urata kine kine ma okanmaile, yewa yemo Magak wane don teweke ma okanmaile, yewaŋo naŋane kine ra wakon okanmaike. 26Ŋo ŋine yemo naŋane lama magu midakaka, eya wane ŋine na wetŋineŋo mi malip nanmami. 27Naŋane lama eŋe naŋane donne detokanmami, na eŋe detonmaile, eŋe na mogatnane ŋadeno sari okanmami. 28Na gege togon ebon okanmailane, eŋe mi seukkei, eŋe gege togon ge arikei, geu ŋei maneŋo naŋane meteno ŋine mi neuma ebu ariyake. 29Maganeŋo ŋei magu more ninge, eya yemo manerop kakapa suwaine kine kine natne korop yuwanka waremaike, wane ŋei maneŋo Maganane metino ŋine maine mi oma nane ebu ariyake. 30Magane so na ŋere mo kinese weku, ŋere koso wiri etke mi okanmaite.”
31Yale raki, so Yuda ŋei eŋe koso manerop wesi peikeu paki qeu seukeyakane okangoi, 32okanbi, Yesuŋo edane rake, “Na Maganane urata maine loutne sikan-ŋunbe kemi, paki mo ŋine urata mane diyawa wane rau paki, mo na wesiŋo nekukei wane okanmami?”
33Yuda ŋei eŋe mainge olale rakoi, “Ge urata maine mamaine, eya wane ŋene ra more wesiŋo gekukenane mi okanmaine, midakaka, ŋo yemo ge goŋom Kaisale wane numa ma okora ewe mabaik okan kamaine, kine eya wane raŋem paki, wesiŋo gekukenane okanmaine, ge ŋei yauwine, ŋo ge siluŋ geŋonane iwa yale ramaine, ‘Na Kaisale!’ ”
34Yesuŋo mainge edange, “Ŋinŋine ra rokop don bonepŋino don mane qekoi, yewao Kaisaleŋo iwa yale rake, ‘Na iwa yale ramaile ŋine Kaisale.’ 35Eŋet eyamo sogine Kaisaleŋo ŋei eŋano ra wakonge, eŋe rake, ‘Ŋine Kaisale,’ paki mo Kaisale wane ekapko don eya mo mane mi koso qein geke paki tanik mane okanmaike 36Ŋo na yemo Maganeŋo ma wakon nange paki talenangi iwa kepo ketkole, eya wane na Kaisale wane Gipole yale ramaile, paki mo, ŋine numa dalino kau, na Kaisale ewe mabaik okankamaile? 37Ŋo na Maganane urata mi makaleo, yemo ŋine naŋane donne dere misuk malip kaikei. 38Ŋo na urataine mawe, ŋine naŋane donne dere mi malip kaikeiwo, yemo ŋine urata mamaile yewa kaso, malip kaikei, yale okanbi paki, naso baŋem iwa yale detlukkei, Magakŋo narop gemaike, so noŋo Magak korop gemaile.”
39Yale raki, eŋe koso manerop ma lukkaikei wane okangoi, ŋo eŋe keuweno ŋine siuke sau saungo saket arike.
40Yesu eŋe koso zinge ari, Yordan doku yuwane erinat wa ari mage, Yohaneŋo ŋei ŋerep doku tauone geke, yewa lotkeso eya geke. 41Gekiso, ŋei ŋerep loutneŋo eŋano sarikoi, sari olale rakoi, “Yohane eŋe masi togogole mane mi make, ŋo eŋe ŋei iwa wane don kine kine korop rake, yemo wele mo welekatne wakon waremaike.” 42Eso yewao ŋei ŋerep loutneŋo Yesu wane done dere malip kakoi.
Zur Zeit ausgewählt:
Yohane 10: onsNT
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2012, Wycliffe Bible Translators, Inc. All rights reserved.
