Yohane 11
11
Lazarus Seukke
1Ŋei mane eŋetne Lazarus, Betani matko geke, eŋe zomakake, Betani eya mat suwaine Mariya so tatine Marta ere yewa gekoik. 2Mariya ŋerep yewa oŋo kelok qoune teine yewa Waom wane kiyeretkino qakki, taukaki so, lewine zouneŋo ratokke, ŋerep yewa wane ŋole Lazarus eŋe zoma kake, eŋe mateene Betani yewao gekoi. 3Tati qa ere Yesu wano don iwa yale ra motpik arike, “Waom, geŋane kima maepŋone eŋane naso baŋem simingan mageyake, mo zoma kamaike.”
4Yesu eŋe don yewa dere more rake, “Lazarus wane zoma eya wane wele yemo seuseu midakaka, zoma yewa wakonmaike, yemo waraŋkaki, ŋei ŋerep eŋe Kaisale wane zonom kau paki, bakomine kitokei, paki numa yewaoka Kaisale wane Gipole eŋe qeli ewe zonomine mayake.”
5Yesu eŋe Marta so qaine so Lazarus eŋane zok simile kaki wetineŋo malipon lukke. 6Yesu eŋe Lazarus zoma kake, eya wane donkisi ariki detki paki, mat geke yewaka koso takotke kaiwe etke metke. 7Mere so, dokoine edane rake, “Ŋene koso Yuda kepeo zinge ariŋem.”
8Raki dokoine eŋe olale rakoi, “Kito ŋebo ŋebon, nasomde bamgo yewaoka Yuda ŋei eŋe wesiŋo gekukei wane okanimi, pakimo, ge koso yewaka zinge arikenane wetkemaine me?”
9Yesuŋo doneene mainge more edane rake, “Kaiwe mama wane auwa 12 pamaike, pakimo yewao qelaŋan mi okaniyake me? Eso ŋei mane eŋe kepe qelaŋane paki numa ariyake, eŋe kineŋo daŋaŋ qeki paki, mi ket qeyake, onoka wane, eŋe kepe kine kine korop deinane qelaŋano maineeka ka more arimaike. 10Ŋo eŋe ruwoo numa ariyake, eŋe daŋaŋ qeki paki, ket qeyake, onoka wane eŋano qelaŋan mane mi pamaike, eya wane qeyake.” 11Yesu eŋe don iwa raki paki, koso mane takotke rake, “Ŋenane kimaze Lazarus eŋe yaup kulu peke, wane na mo eya ari more ma wirikkawe wisikae wiyeyake.”
12Dokoine eŋe don eya dere more iwa yale olale rakoi, “Waom, eŋe kulu pamaikeo, eŋe baŋ menaŋ kayake.”
13Ŋo iwa yale mi detkoi, Yesu eŋe Lazarus mo seukke, eya wane don yewa ramaike, pakimo, eŋe mi dere qelaŋane more yaup wetke rakoi, Lazarus eŋe yaup kulu paki, mo welekatnane mane ramaike. 14Eso Yesu eŋe didiwo ra qelaŋane more edane rake, “Lazarus eŋe mo seukike, 15Ŋo na ŋinane rawe paki, wetne pesemaike, yemo na eŋerop yewa weneŋ mi gile, eya wane ŋine baŋ mali malip korop okanikei, ŋene eŋano ariŋem.”
16Tomas, eŋetine wase wase Atiksipo, oŋo kimakoune natne edane rake, “Ŋene korop weneŋ kito ŋebo ŋebon gorop ariŋem paki, eŋinerop maine weneŋ seukkene!”
Yesu Eŋe Seu Seuwo Ŋine Wisikae Wiye Wiye So Gege Eya Wane Welaine
17Yesu eŋe ari lotkeki paki detke, Lazarus eŋe mo dukkau deŋesereo paki, kaiwe mama etke so etke (4) okange. 18Betani eya mo Yerusalem mat osino metke, 3 kilomitaka eya wane rokop. 19Yuda ŋei ŋerep loutneŋo Marta so Mariya ŋon etne seukkane nasoine mere more, qom etne romatkekei wane arikoi.
20Marta eŋe detki Yesu sariki, eŋe marat kayakane numao arike, ŋo Mariya eŋe yemo matko metke. 21Martaŋo Yesu olale rake, “Waom, ge iwa merine ra, yemo naŋane ŋonne eŋe maine mi seukkirap! 22Ŋo siluŋ na detmaile, ge ukude iwa Kaisale kine kine eya me eya wane meŋen kaikene, eŋe donŋone maine dere more giniyake.”
23Rakiso Yesuŋo olatke, “Geŋane ŋonŋone eŋe baŋ maine wisikae wiyeyake.”
24Martaŋo olale rake, “Na detmaile, eŋe baŋ qeli so kepe naso etne qoeyake, yewao wisikae wiyeyake.”
25Yale raki, Yesuŋo olale rake, “Na wisikae wiye wiye so gege eya wane welaine, ŋei mane eŋe na malipnane geyake, eŋe seukeyakeŋo siluŋ koso wisikae wiye geyake.”
26Ŋo mane eŋe wisika geki paki, na malip nane gemaike, eŋe baŋ mali malipinane mi siukluke more, qeli gege togon marat-kayake, ge don iwa maine detluke malip kamaine? 27Martaŋo mainge olale rake, “O, Waom, na mo wetneŋo malip-ganmaile, ge Mesiya, Kaisale wane Gipole, Kaisaleŋo ketkenane rakane ge kepo ketkone.”
Yesuŋo Lazarus Wane Arokke
28Marta eŋe don yalewa raki paki, koso zinge ari, qaine Mariya eŋineka oraki sarike paki, eŋe iwenka kere eretneka olale rake, “Kito ŋebo ŋebon mo sarike iwa, so eŋe geŋane ramaike!” 29Mariya eŋe don eya dere kaŋzaŋ wiyeki paki, biririke Yesu marat kayakane arike. 30Yesu eŋe matko mi sari lotkeke, eŋe mikep metki Marta ari maratkake, yewaoka yewa metke. 31Yuda ŋei Mariyarop weneŋ matko wetne kito pese metkoi, eŋe kau kaŋzaŋ wiye biririke qeinat ket arikiso, eŋe ŋadino mogare arikoi, eŋe wetke rakoi, “Mariya eŋe deŋesereo mane arokeyakane arimaike.”
32Mariya eŋe ari mat wazaino Yesu metke, yewa lotke more Yesu maratkake, pakimo kino umi qe ketki paki olale rake, “Waom, ge iwa ginera, yemo naŋane ŋonne eŋe mi seukkirap!”
33Yale raki paki arokki, Yesu eŋe kake, so Yuda ŋei eŋerop sarikoi, eŋe weneŋ yale waka arokkoi, paki eŋane qomino maki qom borik zok make, so manerop qiseke. 34Paki qeson one rake, “Ŋine diyawao dukkemi?”
Eŋe olale rakoi, “Waom sari kanom!”
35Yesu eŋe kaki paki arokke. 36Yale okangi, Yuda ŋei eŋe kau paki rakoi, “Kau, eŋe ŋeiwae wane simileine zok manerop pake!”
37Ŋo natne edo rakoi, “Oŋo ŋei loutne de pilik deene malotkeke, eŋe onoka wane weneŋ maine mere Lazarus warekaki, mi seukkirap me?”
Yesuŋo Lazarus Seu Seuwo Ŋine Ma Wisikaekake
38Yesu eŋe wetne koso manerop tabaeki, qom borik okangi paki, deŋesereo arike. Deŋesere yewa yemo weti bonagao wesi aŋaino, kemgo maulukkoi, aŋaine yewa mo wesiŋo kito wongeu metke. 39Eya wane Yesuŋo rake, “Wesi yewa mau arikep!”
Marta, ŋei seuseunane kiyarine, oŋo olale rake, “Waom yewa baŋ qoune borikine ŋenguyake, eŋe seukki dukkaŋem, kaiwe etke so etke okanmaike!”
40Yale rakiso Yesuŋo olatke, “Ge malip nannom paki, Kaisale zonominane kibi maine suwaine wakongi kaikenane, done na mi golalile me?” 41Eŋe wesi mau masikange, pakiso Yesuŋo deine potki qeliwo waki rake, “Magak, ge meŋe meŋenne mo derine, eya wane na eweŋone kitomaile. 42Na detmaile, ge naso baŋem ketŋone more, naŋane meŋe meŋenne det okan maine, ŋo na don iwa ramaile, yemo yaup mida, ŋei ŋerep iwa okoramami, edo goŋo talenannom ketkole, naŋane yale detluke malipkaikei wane, eŋane rawe paki ramaile.” 43Don iwa raki qoeki, eya wane ŋadino Yesuŋo suwaineka togogole bokaki paki rake, “Lazarus, ge wiye sari saketnom!” 44Yale rakiso, ŋei seuseuneŋo aŋaine teweke wiye sari saketke, meteretkine so kiyeretkine eya mo deŋesere wane lap lapŋo kawe kawetne, so lap lap mane de kaitine kawe kawetne, pakiso Yesuŋo edane rake, “Lap lap yewa lalageu paki, birakau, eŋe oŋom saketkep.”
Yesu Qeu Seukeyakane Ra Togolekoi
45Yuda ŋei loutne eŋano ŋineŋo Mariya kakei wane weneŋ sarikoi, eŋe Yesuŋo masi kine kine make, yewa kakoi paki eŋe malip kakoi. 46Ŋo natne edo yemo zinge Parisi eŋano ariu paki, Yesuŋo masi kine kine make, yewa edangoi. 47Eso Parisi so Yuda ŋei suwaine eŋe kepe ware ware ŋetne natne eŋerop qeturage lewageu paki, eŋe edane rakoi, “Ŋene daleo okanikene? Ŋei iwa eŋe masi togogole korop mamaike! 48Ŋene qeliŋ kaŋem, eŋe numa tanik iwaka okane ariyakeo, ŋei ŋerep loutne manerop eŋe baŋ eŋe malipka warekei, paki eŋe naso eyao Roma ŋei qelaŋ edo gavaman okane, ware ongoi, eya wane rakoi, Roma kawali ŋei eŋe sariu paki, Bakom Urumze kitopokeu paki, ŋei ŋerep magu kopze weneŋ korop matali qetali ŋebu ma ket biraŋongei.”
49Eŋane keuweno ŋine ŋei mane eŋetine Kaiyapas, eŋe koma yewao Bakom Kito Kito wane Pris ŋetne Suwaine geke, oŋo rake, “Ŋine dereretŋine midaine, ŋine kine kine mane mi detluk kamami! 50Ŋine kine kine mane iwa yale eyamo mayakakatne, ŋine eyamo mi detmami, ŋei ŋerep korop matali ŋonbi mida warekenane, turuŋine yemo ŋei weku mau, oŋo maine seukki paki, ŋei ŋerep mapik ŋongirap me?” 51Kaiyapas eŋe eŋine wetino ŋine mi rake midakaka, eŋe koma naso yewao Bakom Kito Kito Pris Suwaine geke, eya wane eŋe propet don saeŋine yewa Yesuŋo baŋ seukki paki, Yuda ŋei mapik oniyakane rake. 52So eŋe seukki paki, Yuda ŋei eŋeka bonep mi mapik oniyake midakaka, eŋe seukeyake, yemo Kaisale wane dokoine korop kepe baŋem yeo yeo ket ari ge waremami, eŋe ebu more qe waraŋgi, magu so wet dereret weku okane gekei wane rake.
53Kaiwe mama yewaoka Yuda ŋei ŋetne eŋe numa mane maratka more, Yesu qeu seukeyakane don kiyeke rakoi. 54Eya wane, Yesu eŋe Yuda kepeo Yuda ŋei eŋane kaitko didiwo ari sari mi okange. Eŋe mat yewa qeliŋgi paki, ari kepe mat mane ŋei midaine kepe yaup papaine eya wane osino metke, mat suwaine mane, eŋetine Epraim, yewao dokoine eŋerop weneŋ gekoi.
55Yuda ŋei Kaisaleŋo Loloŋonge, so qeliŋongi weku mane solaene peseki metkoi, eya wane detsoroke metmet eya wane peyadaine mesikei wane naso mo bomileke, eso ŋei ŋerep korop mat nigatno ŋine qelige, Yerusalem matko ariwarekoi. Eŋe Mose wane ra rokop don mogare, sot kine kineene sauke masuluk naguwi paki, Kaisale wane kaitko koboe more, ŋadino peyada mesikei. 56Eŋe bakom urumgo lewage mere, Yesu zuwaŋkau paki, auye rakoi, “Ŋine daleo wetkemami? Eŋe peyadao sariyake me mida?” 57Bakom Kito Kito Pris Suwaine so Parisi, eŋe donene mo ra togolekoi, ŋei maneŋo Yesu wane met met wiye wiyeine desiyakeo, yemo ikop ari ra wakone edangiso, eŋe maine ma lukkaikei.
Zur Zeit ausgewählt:
Yohane 11: onsNT
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2012, Wycliffe Bible Translators, Inc. All rights reserved.
