Yohane 12

Mariyaŋo Doku Qounerop Yesu Betani Matko Taukake

1Peyada bano kaiwe 6 paki, Yesuŋo Betani matko Lazarus geke, yewa arike, ŋei yewa mo alakan Yesuŋo seuseuwo ŋine ma wirikkaki, wisikae wiyeke. 2Eŋe yewa Yesu wane ŋara maulukkoi, Marta eŋe qesiŋone ŋara suluke zakeo motke, Lazarus eŋe Yesurop zakeo metke. 3Pakiso, eŋe Yesu wet pesek oi bakom okan-kaikei wane ŋara surok mau zeke, naso yewao Mariya eŋe doku beloŋ mane, lewine suwaine, sanda libekaŋo mamaine, yewa ma qakki, Yesu wane kiyeretkine tau kaki paki, eŋine lewine zouneŋo ratokke, doku maine qoune simimile teine, eya wane qouneŋo mat yewa wane kotino korop pise watke rokopke pake. Paki Martaŋo ŋara motki, Yesu so Lazarus eyao ŋei natne eŋe wekuwoka weneŋ mere ŋara nekoi. 4Yesu dokoine eŋane keuweno ŋine ŋei mane Yudas Iskariot, oŋo weku baŋ siron qeki, ŋaba edo Yesu maikei, oŋo rake, 5“Ŋene onoka wane mi doku qounerop iwa motŋem, ari wesi 300 kina kiyatki sariki, wesi yewaŋo ŋei aboŋene midaine madu wanap, eya maine ebonŋem rap me?” 6Eŋe don iwa rake, yemo eŋe madu wanap qesiŋ oniyakane midakaka, eŋe kobu mama geki paki, wesi kite mageke, wane yewa ŋine maki paki, eŋine qesiŋnagu okaniyakane wetke more rake.

7Ŋo Yesuŋo yemo rake, “Ŋine ŋerep yewa qeliŋkau! Eŋe kelok yewa ma geke, yemo naŋane solane taukaki duk nangei wane ra more mageke. 8Madu wanap aboŋene midaine eŋe ŋinerop naso baŋem ge arikei, ŋo na yemo ŋinerop naso baŋem mi gekale.”

Lazarus Qekeiwane Done Rakoi

9Ŋei ŋerep magu suwaine eŋe detpi, Yesu eŋe Betani matko metke, eso eŋe yewa arikoi. Eŋe arikoi, yemo weku Yesu kaikei waneka mi wetke arikoi, eŋe Lazarus seuseuwo ŋine ma wirikkaki wiyeke, eŋe weneŋ yalewaka kaikei wane arikoi. 10Eso Bakom Kito Kito Pris Suwaine ŋei eŋe Lazarus weneŋ qeu seukeyakane don urata makoi, 11onoka wane, eŋane rau paki Yuda ŋei loutneŋo suwainekopene qeliŋ one, Yesu detlukka malipkakoi, eya wane.

Yesuŋo Yerusalem Matko Ŋei Waom Yale Waketki Ewine Kito Mawakakoi

12Kepe qaeki kaiwe maneo ŋei ŋerep magu suwaine Kaisaleŋo Loloŋongane Peyada mesikei wane sarikoi, eŋe detpi, Yesu mo Yerusalem matko sarimaike. 13Eso, eŋe don yale detpi paki, marat kaikei wane geleqat metine, rubi so komu so geru metine korop rutupke, eyaŋo eŋet kito risu birakei wane numao peike arikoi, paki boka rakoi, “Kaisale ma wakaŋem! Kaisaleŋo mosopkakep, eŋe Waom wane eŋetko sarimaike, Kaisaleŋo Israel eŋane Ŋei Waom mosop-kakep!”

14Yesu eŋe doŋki mane maratka eŋane kutno metke, Kaisale wane ekapŋo iwa yale ramaike, eya wane rokopko okangoi,

15“Mi kaet gangep, mat suwaine Zion, iwa sarimaike, geŋane Ŋei Waom, doŋki medeunane kutnoka umaike.”

16Eŋine dokoine eŋe naso yewao masi yewa wane kine mi detlukkoi, ŋo ŋado Yesu eŋe Magaineŋo qeli ewe zonominane kotino mawa birakake, naso yewao eŋe kine detkoi, yemo Kaisale wane ekapŋo don eya mo yalewa wakoniyakane ra wakone more rake, eso eŋe eya wane rokopka eŋe okankakoi.

17Ŋei ŋerep magu eya Yesurop weneŋ ge more ka okorau, Lazarus deŋesereo ŋine ora ma wirikkaki, seuseuwo ŋine wiyeke, eŋe eya wane don kisiine ŋei ŋerep natne kine kine wakonge, eya wane ra wakone edan warekoi. 18Yesu eŋe masi togogole maki kisiine detkoi, kine eya wane ŋei ŋerep magu yewa eŋe ari numao maratkakoi. 19Eya wane Parisi eŋe edomka auye rau kere pora okange, iwa yale rakoi, “Ŋine kamami, ŋene don urata ma more, korop mabotop onwaremaine! Kau, ŋei ŋerep korop mo eŋane ŋadino ariwaremami!”

Grik Natne Eŋe Yesu Kaikei Wane Zuwaŋkakoi

20Grik natne eŋe peyada nasoo ŋei magu Yerusalem matko Kaisale meŋen kaikei wane arikoi, eŋerop keuweno weneŋ mere meŋenkakoi. 21Eŋe Pilip wano sarikoi, eŋe Betsaida matko Galili kepeo ŋine, paki qesonka rakoi, “Suwaine, ŋene Yesu kaikenane ŋonmaike.”

22Rauso, Pilipŋo ari Andreya olatke, olatkiso eretnarek ari Yesu olatkoik. 23Pakiso, Yesuŋo mainge etane rake, “Ŋei Wawainane Gipolane qeli ewe zonomine suwaine mayakane nasoine mo bomilemaike. 24Na ŋidanbe detpi, wit woune kepo mi ketki paki wekuwoka witaino mere, eŋe weku yewaŋoka mesiyake. Ŋo eŋe kepo kesiyake, yemo solaineŋo gotosiyake, ŋo kotino woune eyamo yemo komine qelotke saki paki suwa more, wele loutne qeyake. 25Mane eŋe eŋine gegeinane siminkaki kima maki siuke maniyake, ŋo mane eŋe eŋine gegeine naŋane ra more kepe iwao geki paki ŋabaka more ŋade-kayake eŋe baŋ Magakŋo warekaki, gege togon wane biŋek pamaniyake. 26Mane eŋe naŋane qelit mama geyakane okaneso, naŋane ŋadeno sariyake, eso naŋane qelit mama eŋe baŋ narop na gekale yewao weneŋ gekete. Mane eŋe naŋane urata mageyake eŋe baŋ naŋane Maganeŋo eŋetine manerop mawa kayake.”

Yesu Eŋe Seu Seuinane Don Rake

27Yesu eŋe koso iwa yale rake, “Qomne qiseki zonomne oremaike, eso na daleo raikale? Na maine iwa yale rakale, ‘Magak, naso iwa misuk wikileŋo detkanom sari kutno wayake’? Yale mida. Naso iwao mo na wikile koto waket arikale, na yalinane sarikole. 28Magak, manom eŋet biŋek ŋoneŋo qeli ewe zonom gorop wakone arikep!”

Yesuŋo yale rakiso qeliwo ŋine don mane iwa yale raki ketke, “Na mawe eŋet biŋeknane so qeli ewe zonomne mo wakone suwa arimaike, wane koso manerop mawe suwa ariyake.”

29Ŋei ŋerep magu yewa okorakoi, eŋe don yewa dere rakoi, “Eya quruŋŋo mane kitomaike!” ŋo natne eŋe rakoi, “Aŋelo maneŋo don olatmaike!”

30Rauso, Yesuŋo edane rake, “Don iwa noŋo desikalane raki paki mi wakonike, midakaka, yemo ŋido desikei wane, ŋinane raki paki ŋine qesiŋŋune more wakonmaike. 31Ukude yemo kepeo ŋei ŋerep kineene Kaisaleŋo dere wanokeyakane naso, ukude yemo kepe iwa wane Ŋei Waom mo mainka la pelekkaki ketmaike. 32Na kepeo ŋine neu wiyekei, naso yewao na baŋ ŋei ŋerep korop waraŋonbe naŋano lotke warekei.” 33Eŋe don eya rake, yemo seuseu daleo seukeyake, eya wane don naŋengo motki paki rake.

34Raki ŋei ŋerep magu eŋe mainge olale rakoi, “Ŋenane ra rokop donŋo ŋedanmaike, yemo ŋei yewa Kaisaleŋo birakayake, yemo ŋei ŋerep magukoune ebu naso baŋem naso baŋem wareoniyake, so Mesiya eŋe mi seuke more, banine ge ariyake. Daleo wane ge ramaine, Ŋei Wawainane Gipole eŋe yemo baŋ ma wiye birakau kibego seukeyake? Ŋei Wawainane Gipole eyamo ma?”

35Rauso Yesuŋo edange, “Qelaŋan eŋe nasomde nigatne kiro kirop ŋinane keu ŋino geyake, eya wane ŋine takotke numaŋine qelaŋangoka gekei, pakiso panamanŋo misuk sari koraut ŋuniyake. Onoka wane, ŋei mane panaman togolane, kotino ari more diyawao arikale, eya mo mi detmaike. 36Naso iwao mo qelaŋanŋo ŋinerop gemaike, eya wane ŋine detlukka malipkaikei, qelaŋan pa ŋibonmaike, eyaŋo mo ŋine baŋ qelaŋan wane ŋei ŋerep magu so dokoine okanikei.”

Yuda Ŋei Loutne Eŋe Yesu Mi Malipkakoi

Yesu eŋe don iwa raki qoeki, eya wane ŋadino yemo qeliŋone ari siuke geke. 37Yesu eŋe masi kine kine togogole eya korop eŋane deene kutno maki deene qomineŋo kamaŋkoi, ŋo siluŋ mi malipkalukkoi. 38Yale okanbiso, propet Isaiyaŋo don qeke eya wele okange,

“Waom, kisi maep donŋone ŋene edanŋem maŋo donze detluke malipkake? Eya mane midakaka! Waom eŋe oŋom zonomine sikanonge, ŋo maneŋo mi malipkake.”

39Kine iwa yale wane eŋe maine mi detluke malipkakoi, onoka wane Isaiya eŋe yale waka iwa yale qeke,

40“Kaisale noŋo iwa yale ramaile, na ŋei ŋerep deene ma pilikale, so dereretene leŋongale, eso eŋe deeneŋo kine kine mane misuk kaulukkaikei, so wet derereteneŋo don wane kine maine mi detlukkaikei. Kaisale noŋo yalewa ramaile.”

41Isaiya eŋe don iwa rake, yemo onoka wane eŋe Yesu wane qeli ewe zonom gorop kaki paki, eŋane rake.

42Yewaoka Yuda ŋei ŋetne loutneŋo Yesu malipkakoi, ŋo siluŋ Parisi eŋane kaet ongi mali malipene yewa didiwo mi rawakongoi, yemo onoka wane, eŋe detpi paki Yuda lewa lewago ŋine so eŋane tego yewa ŋine esoponbi qeinat sen ŋadino qelaŋ tegoo kesikei wane rau paki kaetongi motkekoi. 43Eŋe Kaisaleŋo eŋetene edora mawa oniyakane yemo zok mi simile ongi sorin gekoi, ŋo ŋei edo edora mawa ongei wane yemo zok simile detkoi, so wetene suwaine pake.

Yesuŋo Don Rake Yewaŋo Ŋei Ŋerep Gegeenane Wano Wanok Urata Mayake

44Yesu eŋe suwaineka bokaki paki rake, “Mane eŋe na malip naniyakeo, eŋe naka weku mi malip naniyake, eŋe siluŋ Magak talenangi ketkole, eya eŋe weneŋ yale waka malip kayake. 45Mane eŋe na nan okanmaikeŋo Magak talenangi ketkole eŋe yale waka weneŋ ka okanmaike. 46Na qelaŋanŋo kepeo ketkole, eyamo ŋei ŋerep koropŋo na malip nanikei wane, ŋo mane eŋe na malip naniyakeo, eŋe panaman koto mi geyake. 47Mane eŋe naŋane don detki paki mi tewekeyake, mo na eŋe turuŋine mi manikale so eŋano noŋo wano wanok urata mi maikale. Na kepeo ŋei turuŋine ebonikalane mi ketkoleso eŋano wano wanok urata makalane mi ketkole, na ebuwe menaŋgei wane ketkole. 48Mane eŋe na ŋadeknangi paki donne mi desiyake, eŋe maneŋo turuŋine baŋ maniyake. Na don ra okanmaile yewaŋo baŋ gemage naso qoeki turuŋine rakoke maniyake so eŋane yewaŋoka baŋ wano wanok urata mayake! 49Na don iwa nae wetno ŋine mi ra okanmaile. Midakaka. Yemo Magak talenangi ketkole, oŋom don rawe paki ra wakonikalane so ra qelaŋanikalane matoke ninge. 50So na detmaile, eŋane pi donŋo gege togon ma wakon okanmaike, na don korop ra okanmaile, yemo Magakŋo ra matoke nolale ninge, rokop ra okanmaile.”

Zur Zeit ausgewählt:

Yohane 12: onsNT

Markierung

Kopieren