LUK 22
22
Judas Na Jisuta Jurranga Mangei
(Mit. 26:1-5; Mak. 14:1-2; Jhn. 11:45-53)
1Achol tolno badol reen lanpina ta dang apha nei ja wa ah, 2chungtekti thiempu akha chu roukung ocha ngeina malmashi ngei ta ati ae chuna sarukka mani na Jisu ta aruhan ta that ranga hot na ae.
Judas Na Jisu Ta Ngai No Na
(Mit. 26:14-16; Mak. 14:10-11)
3Chuna Judas Iskarot kolla saitan na lutso, amo ha arui asom ani sunga akha ae. 4Hana Judas na chungtek ti thiempu akha chu athieng inn sunga offisar ngei kolla ril ae mani kolla Jisu hi alota jur ang meh! 5Mant na amo ta ariem ma sum pe tukkae ta ngei so. 6Judas na ngei hlak nutienga ejongpa tancha ahra akha ah Jisu hi mani kut chunga malmashi ngei na nahana rou dang no lutta pek rang apha an thou so.
Jisu Na Lanpina Na Bakha Rang Semsa Na
(Mit. 26:17-25; Mak. 14:12-21; Jhn. 13:21-30)
7Achol tolno budol reen rungnie sunga lanpina bu bakha ang kelmo that tang tienga. 8Jisu na Pitar lea Johon ta manui ni na ae rang rou hitta munt ha ah hla so. “Nanui na thing weta anina lanpina bak rang lim ha thourang ae thing hakko.
9‘Amunt hoija nangna di ah kanui ni ta sempi num cha mo ae ta manui na Jisu kolla sai?’ ”
10Jisu na sang, “Nanui na hata hupi sunga lut juija spa akha na tuibel ronna thing tuk hlak kange. Manu tienga juija thing weta malut na inn sunga hata latto. 11Hana inn mitpu hata rillo, ‘Arengpu na nakolla rilleh. Karui ngei lea kanina lanpina bu bakha rang kah ha hoija am meh?’ 12Amo na nangei ta ri pi ange achung tieng kah alok akha am mange, amunt hana nanui na eheilimpa tuk hlakange.”
13Manui na thing juija Jisuna manui ta ril makhai ha tukhlakso. Hana manui na lanpina bakha rang thourang ae thingso.
Lokpa Zanbu
(Mit. 26:26-30; Mak. 14:22-26; 1 Kor. 11:23-25)
14Apha ha phajuija Jisu na ma am rang amunt doikunga ahal-rouron ngei hitta lutso. 15Amo na mani ta ril, “Keina ka ol matienga nangei hitta leima tam ma na lanpina bu hi bakha inn ha di inge! 16Rouram chu keina nangei kolla ril numinge, keina nangei hitta bakha inn ha pha angnijo ae, Chungthieng rengram pha ma lim chu.”
17Hana Jisu na tuidon choi weta Chungthieng kolla niek so. “Na hi nangei na lah weta nangei taranga sam hlakko.” 18Keina nangei kolla rilling atun hai thou wa keina nangei hitta mun ha ah Chungthieng rengram phao malim chu darkha tui inn ang ni ang ae.
19Hana woihapa amo na budol atan sar weta Chungthieng kolla niek ah budol atan, atan tan so. Akha chu manita peveta ril, “Nahi kapum ae nangei taranga pek sha so ae nangie na nahi na tullu lu oh keita ngai lea rang sa ae.” 20Hahekta akha rukka tuidon kom budol baksu takka mani ta pe ah ril, “Na tuidon hi Chungthieng na athar ra chungnam weta pek sa kathee ae nahi chu nangei taranga peksa so ae.
21“Chuti weta an no! Keita jurra hou ang amo ha kei hitta doukang hina am ha ae! 22Meesanaopa ha chu thi ah ta ae Chungthieng lungir sa ha nu juija, chuti weta eja ah atri pi mo nu amo ta jurra hou spa ha chu!”
23Hana mani mashel sunga atujong akha na anikar sunga thing weta na tullu hi ae thing ang mo weta sai hlakthou so.
Alok Chuhlakna
24Arui ngei sunga trong jet hlak thou so mani kar sunga atu na loktek ta hal mo ae ta. 25Jisu na manita ril, “Adang jati ah rengpa ngeina mani chunga mitpu ngei hekta tullu lu hana mani chunga tullu lu pi ngeita, ‘Mee ngei ta tonpi’ ngei ae ta kokkae. 26Chuti weta nani chu hajong ah nao no ae; chuti weta, nani chunga lok tekti pana naopong hekta, akha chu lamkai mee hana rui sanao ngei hek tullu lu su oh. 27Atu na loktek ti mo ae, ongveta bakka am pa lea ano lea amo ta bakpi innpi am pa ha? Ow ve, ongveta bakka am pa ae chuti weta nangei kar sunga chu bakpi innpi ah ae ah am chu kei inge.
28“Chuna nangei chu ka-ol lei sunga kei hitta am ha so chau; 29Pathieng na keita rengram pek chuhekta keina kom nangei kolla pe singe. 30Nangei kom ka rengram ma kei hitta bakha inn ha pha ange hana nangei na Israel sakai asom ani chunga rourillanga phomlu chunga ong ange.”
Pitar Ngeinorang Jisu Rouril
(Mit. 26:31-35; Mak. 14:27-31; Jhn. 13:36-38)
31“Simon, Simon! Anno, saitan na nangei lim pa ta chang anranga rou lah so ve, hrano karra ahra am no rang, lou mee pana sangshi hran hekta. 32Chuti weta keina nataranga neik ja aminge nangoiring ha nuleh no ranga Simon. Chuna nangna ka am na ah na lea jui ja nangna na-u-nanao ngei ta jaitha pe oh.”
33Pitar na sang, “Arengpu, keina nathingna amunt chang honna raen-inn sunga hal akha chu nathit na amunt na thit ang inge!” 34“Keina rilling, Pitar,” Jisu na ril, “Awoni jintienghi arhongpa na hung ang no ae nangna keita woithum dang nonge ta naril ma lim ma.”
Selhou Lea Chamsei
35Jisu na arui ngeita sai, “Nangeita sumhou tolno wa akha keabur tolno wa kahla jui apha ah nangei na ejongpa watta chau?”
Mani na sang, “Ephou wat no weh.”
36“Atun chu,” Jisu na ril, “Ejonga atu jongna sumhou am lea chu choijo oh; hana atu jong na chamsei am no lea malinglut jurveta leithingo. 37Rouram chu nangei kolla keina rilla aminge abai sunga jiekka shi na ril, ‘Amo ha maral am ngei karra masing ten then so weh.’ Chuna keina nangei kolla rillinge nahi keina thungpi ange. Kasarukka jieksha ha atun chu pha ah wa so oh.”
38Arui ngeina ril, “Anno! hina chamsai ani am meh arengpu!”
“Hana ngei so ae! amona sang.”
Mullon Olives Ah Jisu Na Niek Na
(Mit. 26:36-46; Mak. 14:32-42)
39Jisu na hupi houphurra mathing na chak ti mullon olive ah; hana arui ngei na kom amo hita thing ha. 40Amunt ha mapha juija amona manita ril, “Niek ah am mo, chu na nangei ha ahlem na nea no rang.
41Hana amona alung denga hla alal na changa mamita houphurra ahuk hrun weta niek so. 42“Amo na ril, “Pathieng,” Ejonga nahi nahal nalung aleh chu olla ka-am kakap hi lah pi oh. Kahal ano shu oh, chuti weta nahal hana tullu lu oh.” 43Thangwan tieng hai thou wa wanrui ngei na makolla mel muh ah jaitha hap so machunga. 44Alung tonga amona alung thienga niek ae; chuna ahlan tui tulla jung kom alei chunga chu athi hekti ae.
45Niek ma am na mun hai thou wa marui ngei am na maleh juija ol happa inn hlakka am so ae. 46Amo na mani ta ril, “Alowa inn hlakka am ma chau? Thou weta nie oh ahlem pa na nea no ranga.”
Jisu Ta Mant Na
(Mit. 26:47-56; Mak. 14:43-50; Jhn. 18:3-11)
47Judas na lamkai weta wairul riha na mani kolla tungphao Jisu tronga am song. Arui asom anie sunga akha na Jisu am na wa veta abe ah chup so. 48Chuti weta Jisu na Judas ta ril, “Abe chuppa nangna meesanaopa ta jur so che nu?”
49Jisu hitta am arui ngei na ejong pa shuk shijove ta ripha so, mani na Jisu ta sai, “Arengpu kani champ sai hi tol pi ang meh?” 50Hana mani kar sunga akha na chungtekti Thiempu shuk kor akha hina akur changtiengpa tanso.
51Chuti weta Jisu na ril, “Na hina ngei so ae!” Chuna amona spa hana kur tonga dampi so.
52Hana Jisu chungtekti thiempu akha chu athieng inn sunga offisars hana ulien changei amota mant wa eja kolla ril, “Hrano mee ta mant nang hekta nangei na mollo champ mo ta phao ah chau? 53Rungnie chang honna keina nangei hitta athieng inn sunga am ha lei ah chu nangei na mant rang hotna no chao, chuti weta nahi apha so ae nangei taranga athim na rou choija jaitha pha ah nangei tullu lu ranga.”
Pitar Na Jisu Ta Ngeino Na
(Mit. 26:57-58,69-75; Mak. 14:53-54,66-72; Jhn. 18:12-18,25-27)
54Manina Jisuta mant na amo ta chungtek ti thimpu inn na rui ah thingso. Pitar na kom aram lah hai thou anu juija wa ae. 55Inn tumai ah sarmei hlan weta manina ahul tunga ongna ah Pitar kom ong tolla am meh. 56Meesuuk namei sanao akha na sarmei am na onga ma-am ri weta amona ma am na ah mun na an weta makolla ril, “Na spa hikom Jisu hitta am ha mee ae!”
57Chuti weta Pitar na ngei no oh ril, “Namei, keina amota dang nange!”
58Apha atante takka spa akha na dangpi sier so Pitar ta “Mani karrak sunga nangkom akha ae!”
59Hana atente akha nutienga adang spa akha na makolla ril, “Ephao ngoiring no rang am no ae na spa hi Jisu hitta am ha houphur mee ae rouram chu amo hikom Galily mee ae!”
60Chuti weta Pitar na ril, “Spa, keina dang nonge nangna rilla am rou ha!”
Hata mani tronghlakka am lei ah arhongpa na hungso. 61Arengpu na ahul tunga an na rolla Pitar kolla munna anna Pitar na Arengpu na makolla rilphur ngeileh thei so. “Arhongpa na hung malim ma awoni jintieng hi nangna keita woithum ngei ang no che ti rou.” 62Pitar na shukka thing weta alung kha ah tapso.
Jisuta Phitta Nuiso Na
(Mit. 26:67-68; Mak. 14:65)
63Jisu ta hakka am ngei na makolla phitta akha chu nuiso ae. 64Manina Jisu ta mamit hlum ma rou sai makolla, “Atu na nangta phit mo ae rillan oh!” 65Hana mani na leima tam ajak tukpi rang rou makolla ril ae.
Bomtulh Na Ah Jisu Ta Ruija Shuk Na
(Mit. 26:59-63; Mak. 14:55-64; Jhn. 18:19-24)
66Nie nu na shukjuija lamkai ahre chungtekti thiempu ngei akha chu roukung ocha ngei na bomtulla mani maikunga Jisu ta ruija wa pi so. 67“Kani ta rillo,” mani na ril, “Nanghi Messiya ah che?”
Amona sange, “Ejonga keina nangei kolla ril lea chu nangei na keita ngoiring ang no chau ae. 68Hana ejonga keina nangei kolla rou sai lea chu nangei na sang ang no chau ae. 69Chuti weta atun hai thou wa meesanao pa chu ineh-nepa Chungthieng ban changtieng pa ah onga am shijo ae.”
70Mani lim pana ril, “Chuleh chu nang hi Chungthieng sanao pa che meh?”
amona sange manita, “Kei ae ta nangei na ril so chau.”
71Hana mani na ril, “Kani na rou ngir tollang mee darkar am no ae! Kani na kanithei ah naril rou ha thei songe!”
Zur Zeit ausgewählt:
LUK 22: CHOTBSI
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Chothe Naga NT - ATHARKUTHROU
Copyright © The Bible Society of India, 2014.
Used by permission. All rights reserved worldwide.
