YAPHANG 9
9
Kaitor Noa bai swmai tangmani
1 #
Yap 1.28. Kaitor Noa bai bwsarokno hamari rwui hai hwnwi sa kha, “Bwsa kwbáng man di, er di tei hano kupulung khlai di. 2Ha sakani bebak mal-matarok, malnairok tei toksa toktẃirok, twini árok nono ma kirinai, abórok bebak’-no nini yago yapharjak kha. 3Bebak langma gwnangrokno; tei dalo-samprarok bebak’-no nini chámung wngnai, ang nono abórok bebak’-no rw kha. 4#Yap 17.10-14; Leb 19.26; Uái 12.16,23; 15.23.Tamo khe nwng thẃi gwnang kwthang manwi simi ta chá di, tamni hwn ba thẃi-o se langma tongo. 5Khoroksa swk nini thẃino kochok rw khe ang abono muitu tonnai. Mal-matarok phano eba borok phano bini takhukno buthar khe ang aboni bagwi butharwi yagul sunai. 6#Yap 1.26; Lam 20.13.Khoroksa swk borok buthar khe bo tei kubun borok bai butharjaknai; tamni hwn ba borok Kaitorno kosol khe snamjak.
7 #
Yap 1.28. “Hakhe, nwng bwsa kwbángma man di tei ha gwnangwi erwi o hano kupulung khlai di.”
8Hakhe Kaitor Noa tei bo bai baksa tongnai bini bwsarokno hai hwnwi sa kha, 9“Nai di, ang nwng bai tei nini ulni bosongrok bai swmai tang kha, 10nwng bai baksa tongnai langma gwnang bebak mal-matarok bai, toksa-toktẃirok bai musuk-misiprok tei nwng bai baksa rungtorni ha-o nongkhornai bebak bai’-no swmai tango. 11Ang nwng bai swmai tango, ang tei bebak langma gwnangrokno twi kotor bai khe ha sakani sokomor li ya tei o hano ang twi kotor bai tei sokomor glak kha.” 12Tei Kaitor hai hwnwi sa phi kha, “Omo nwng bai ani bisingo tei nini logini bebak langma gwnangrokni bisingo tei thinangni bosongrokni bagwi o swmaini mari rw kha: 13Ang ani chokhrengno nokha-o ton kha, omo’-no ang swngchar bai swmai tangmani mari wngnai. 14Ang nokha-o chumui kasa rw phuru, o chokhreng nukjak khe, 15Ang nwng bai tei o ha saka-o tongma bebak langma gwnangrok bai swmai tangmano muitu khlainai, hakhe bebak langma gwnangrokno sokomorna bagwi twi tor rw glak. 16Chumui-o chokhreng wng khe ang abono naisigwi Kaitor bai bebak ha saka-o kwthang tongnairok swmai tangmano muitu khlainai.” 17Kaitor Noano hai hwnwi sa kha, “Omo’-no ha saka-o tongma bebak langma gwnangrok bai ang swmai tangmani mari.”
Noa tei bwsarok
18Rungtorni nongkhornai Noani bwsarok wng kha Sem, Ham tei Japhet. Ham wng kha Kananni bupha. 19O khorok thamrok khe Noani bwsarok; Bórokni bising tẃi’-no o ha saka-o borok kupulung wngo.
20Noa wng kha swkang ha muphunwi núkhung khlainaisa. Bo’-no swkang angur phang lwng khlai gra-o; 21bo angur bwtwi nung kha, hakhe phek kha tei ríni nogo sago rí kwrwi khe thu-ui tong kha. 22Kananni bupha Ham buphano sago rí kwrwi nuk kha, hakhe phataro thángwi bini tei khoroknwi takhuksongno saui kha. 23Hakhe, Sem bai Japhet rí kangsa naui khoroknwini phairukungo boksaui uklok khe him laiwi thángwi buphano rí bólwi rw lai kha; bórokni bumkhang uphiljak wngwi bórok buphani rí kwrwino mokol bai nuk li ya. 24Noa angur bwtwi phekmani swra khe bwsla kusu bono tamo khlai kha saui manẃi hai hwnwi sa kha;
25“Kanan swraimung nangnai;
bo bini takhuksongni selengni seleng wngnai.”
26Bo hai hwnwibo sa kha,
“Sem ani Subraiyung Kaitor bai hamcha rwjak thung;
tei Kanan khe bini seleng ma wng thung.
27Kaitor Japhetno#9.27: Japhet: O mung Hibru kók bai “Ero” hwnma hai. hamcha rw thung,
tei bo Semni nogo ma tong thung;
tei Kanan Japhetni seleng ma wngnai.”
28Twi kotorni ulo Noa teibo nokha bisi thamrabachi thangwi tong lang kha. 29Tei bini umor nokha bisi chukurabachi-o khe thwi kha.
Zur Zeit ausgewählt:
YAPHANG 9: KOKBSI
Markierung
Teilen
Kopieren
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fde.png&w=128&q=75)
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Kok Borok Bible (Re-edited), Baibel Kwthar
Copyright © 2017 by The Bible Society of India
Used by permission. All rights reserved worldwide.