YAPHANG 13
13
Abram bai Lot kak laimani
1Hakhe Abram ha Ijipni nongkhorwi tháng kha, bo tei bihik tei bini bebak tongmarokno tei Lotno tlangwi Negebo tháng lai kha. 2Abram merarok, punrok tei mal-matarok bai gwnang wng kha, rangchak rukphaibo wng kha. 3Bo Negebni simi Bethel bwkhak tháng kha, hakhe swkango bo ríni nok tang thani sógwi kha. Abo Bethel bai Aini kwcharo, 4bo aro’-no swkang háyá snamo; tei aro’-no Abram Subraiyungno khulumo.
5Abram bai baksa thángnai Lotnibo merarok, punrok, mal-matarok tei bini hai’-no sakni núkhung bai selengrok tongo, 6aboni bagwi oro khoroknwi kwrẃngsa khe tongnani ha khochor kha; bórokni mal-matarok belai bángmani bagwi thansa khe kwrẃngsa-o tongwi man li ya, 7hakhe, Abramni mal-mata mwrwknairok bai Lotni mal-mata mwrwknairok uálai kha, a jora-o Kanansarok bai Peressarok a ha-o tongo.
8Hakhe, Abram Lotno hai hwnwi sa kha, “Nwng bai ang le uálaima cha ya tei nini mal-mata mwrwknairok bai ani mal-mata mwrwknairokbo uálaimabo cha ya; tamni hwn khe chwng wng kha sandai se. 9O bebak ha nini bwskango ya diba? Nwng ang bai nok juda wng si di. Nwng yaksi bwkhak tháng khe ang yagra bwkhak thángnai; eba nwng yagra bwkhak tháng khe ang yaksi bwkhak thángnai.”
10 #
Yap 2.10. Hakhe Lot ayang-uyang nahar kha tei nuk kha Jordan rukung ha kaham, bebago twi nangjak, Subraiyungni tháiblwng#13.10: Subraiyungni tháiblwng: Eden tháiblwngno khurchaui samani. hai, ha Ijipni Juar phaisingni ha hai, omo wng kha Subraiyungni mokol bwskango bo sokomorma kamiyung Sodom bai Gomora. 11Hakhe Lot Jordan rukungni bebakno saui na kha tei bo salkabai bwkhak tháng kha, omo hai khe bórok khoroknwi kak lai kha. 12Abram Kananni ha-o tong kha, Lot khe harungni kamiyungo tong kha tei Sodomni samo khe ríni nok tang kha. 13Sodomni borokrok khe belai’-no hamya tei Subraiyungni thani belai khe sumsok khlai kha.
Abram Hebrono thángmani
14Lot bo bai kagwi tháng khe Subraiyung Abramno hai hwnwi sa kha, “Nwng tabuk tongmani oroni kaham khe nahar di, salgrabai, salsibai tei salkabai phiya salthángbai bwkhak nahar di; 15#Sam 7.5.tamni hwn khe, nwng tabuk nuhurma-o harokno ang nono tei nini bosongrokno rw phlainai. 16Ang nini bosongrokno o ha sakani hasingsa hai khe er rwnai; ha sakani hasingsano khoroksa swk lekhaui man khe nini bosongroknobo lekhaui mannai. 17Bacha di, tabuk o ha tongsak’-no kebeng-kosong himwi nai di, tamni hwn khe ang nono omono rwnai.” 18Hakhe Abram aroni kutulwi tháng kha tei Mamreni uk buphangrok tongma Hebrono tongwi kha; aro bo Subraiyungni bagwi háyá kaisa snamwi kha.
Zur Zeit ausgewählt:
YAPHANG 13: KOKBSI
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Kok Borok Bible (Re-edited), Baibel Kwthar
Copyright © 2017 by The Bible Society of India
Used by permission. All rights reserved worldwide.
