YAPHANG 12
12
Kaitor Abramno ringmani
1 #
Sam 7.2-3; Hib 11.8. Subraiyung Abramno hai hwnwi sa kha, “Nwng nini sakni hano yakarwi sandai-masarokno tei nwphani nokno yakarwi ang nono phunukna hwnmani a ha-o tháng di. 2Hakhe ang nono dopha kotor snamnai, ang nono hamari rwnai, nini mungno kuchuk khlainai, omo hai khe nwng kaisa hamari wngnai.
3 #
Gal 3.8. Nono hamari rwnairokno ang hamari rwnai,
tei nono swrainairokno ang swrainai;
tei nini bising tẃi khe ha sakani
bebak núkhungno#12.3: nini bising tẃi ... bebak núkhungno: Bebak bosongrok ang nono hamari rwma hai khe hamari rwna bagwi sanai. ang hamari rwnai.”
4Subraiyung tháng di hwnwi dagima tẃi’-no Abram tháng kha; tei Lotbo bo bai baksa tháng kha. Abram Haranni nongkhorwi tháng phuru bini umor nokha bisi snichiba ká kha. 5Abram bihik Saraino tei bini takhukni bwsla Lotno tei bórok Haranno thummani bebak rang-mairok tei borokrokno tlangwi tháng lai kha; hakhe bórok ha Kananno thángna bagwi lam rw lai kha. Bórok ha Kananno phai khe, 6Abram a ha tẃi lái phuru Sekemni More-o uk buphang tong thani bathago. A jora-o Kananni borokrok aro tong kho. 7#Sam 7.5; Gal 3.16.Aphuru Subraiyung Abramno nukjagwi hai hwnwi sa kha, “Nini bosongno ang o hano rwnai.” Hakhe bo bo bai nukjaknai Subraiyungni bagwi aro háyá kaisa snam kha. 8Aboni ulo khe bo Bethelni salkabai hathái bwkhak kutulwi tháng kha tei Bethelni salthángbai-o tei Aini khe salkabai-o ríni nok tang kha, aro bo Subraiyungni bagwi háyá snam kha tei Subraiyungni mungno ring kha. 9Aboni ulo khe Abram thángte-thángte ha Negeb bwkhak tháng rw rwk kha.
Abram ha Ijibo thángmani
10Tabuk ha Kananno asari nang kha, aro belai khe asari nangma bagwi Abram ha Ijibo sal kisa tongwina bagwi tháng kha. 11Ha Ijibo sógwi twtwi wng khe bo bihik Saraino hai hwnwi sa kha, “Nwng wng kha bwrwi naithok; 12hakhe, ha Ijipni borokrok nono nuk khe, ‘Omo nini hik’-no’ hwnwi sa anw tei ano butharwi páiwi nono khe buthar glak. 13#Yap 20.2; 26.7.Nwng ani bukhuk se hwnwi sa ja di, hakhe nini jarwi ang kwthang narwkjak anw phiya angbo kaham’-no tong anw.” 14Abram ha Ijibo habwi khe’-no ha Ijipni borokrok a bwrwino belai khe naithokjak lai kha. 15Pharaoni tẃiphangrok bono nuk kha tei bini naithokmani kókrokno Pharaono saui lai kha. Hakhe a bwrwi Pharaoni nogo tlangjak kha. 16Bini bagwi Pharao Abramno kaham khe ton kha tei bono merarok, musukrok, korai chwlarok, selengrok, selengjwkrok, korai bumarok tei mangingangrok rw kha.
17Tamo khe Pharao Abramni bihik Saraino tlangmani bagwi Subraiyung bini sago tei bini nogo tongnai bebakni saka-o belaino bemuk hamya rwui rohor kha. 18Hakhe Pharao Abramno ringwi hai hwnwi sa kha, “Nwng ano tamo khlai kha de? Nwng tamo omo nini hik se hwnwi sa ya? 19Nwng tamo ‘Omo ani bukhuk se’ hwnwi sa? Aboni bagwi se ang ani hik snamna bagwi ang bono tlango, hakhe iko nini hikno tlangwi tháng si di.” 20Hakhe, Pharao bini borokrokno dagiui rw kha; tei bórok bono bini hani kariui rohor kha bini bihik tei bini tongma bebak’-no rwui rohor kha.
Zur Zeit ausgewählt:
YAPHANG 12: KOKBSI
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Kok Borok Bible (Re-edited), Baibel Kwthar
Copyright © 2017 by The Bible Society of India
Used by permission. All rights reserved worldwide.
