Osee 6
6
1«La hun mì n muungun Mɛlɛka o ibuŋ!
Kani ndu lɔɔ naa ni,
kɛ o co naa cɛw.
Ndu booluu naa ni,
kɛ o co pavii nɛi holiholi.
2O minginin naa yoomoo o n'dial
o palɛi ndii ŋiin bɛngu.
O paale yàándɔlen coo,
o minginin naa a kiyɛi,
mì n muungu yoomu ndu o hɔl.
3Lelan, n sinan Mɛlɛka.
N kindikindin le ndu sinaa.
Kani o co hunɔɔ lekɛ́ndɛi
mɛɛ ɲɛ-tengaa paale siaa hun nuaa yɛ.
O co naa hunɔɔ coo maa piɔɔ lesial,
te kon te maa piɔɔ sialte tase
pɔɔliaa lɛŋnden-ndo.»
4Kɛ mí Mɛlɛka mulul niaa aa:
«Yɛɛ ya tosa yɛnin le niaa,
niaa polale Efraim-nden?
Niaa polale Yuda len yɛ,
yɛɛ ya tosa yɛnin le niaa?
Kaola niaa nɔ le ya-o,
maa mɔ́m idii o co ni,
maa makɛm o co ni, o nɛi puusian te.
5Lelan ya co kei a vanaa-tɛɛngaa-diom Hala-a ni,
mì tuisi niaa sangalan coo.
Lelan ya diwnin niaa
a sɔɛi fulanin ya o sondo-e ni.
Yamɛi nii tenganin vakpa maa ɲɛ-tengaa lepala.
6Lou o lediom coo hiow ya hɛnan
a sálàla n'cɔlulan.
Hala sinaa co fisa a sálàla loamaalan solio.»
Dɛnnda vɔɔnnda Israɛlla co tosaa lan
7«Kɛ mɛɛ Adam tosa yɛ#6.7 mɛɛ Adam tosa yɛ: Fondaa ho dindu taw o hebrei nin te. Vanaa pum a hivi ndu aa: «O kobio Adam nin», a pum aa: «Mɛɛ vanndacieea tosa yɛ». ,
la tɛɛmbuu kpemaa, mí la yii ya dúmbú.
8Kobi vanaa kɔlvesɛiya Kalaad co ni.
Kàŋnda kooma vanndacieea kposon la co lon ni.
9Mɛɛ vanaa del vannda coo-a yììnùn kundaa
le vannda cumullo nuaa yɛ,
lende vanaa-solia-lasálàá Kalaad
a co vannda diwvo o nɛi Sikɛm-ndo ni.
A co dɛnnda kɔlvesɛilan tosaa a labɛɛla.
10I ce dɛnnda vɔɔn-vɔɔnndan Israɛlla tɛɛn:
cuavaa-imamaa Efraim-nda co pɛngi suundaa le.
Israɛlla co nɔɔlianndo pila.
11Niaa cuavaa-imamaa Yuda-a bɛɛ,
i co niaa hunɔɔ kovɔɔ.»
Vannda kpow a laasian mí dɛnɛ palaa toal nda coo
«Lɔ́ɔ́ yáà yeema vanaa nia
va o cɛlen nin-nda mingio nanu-o,»
Zur Zeit ausgewählt:
Osee 6: BKG
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© Alliance Biblique en Guinée
