Osee 5
5
Haki simlacia tosa-o
1«Niaa vanaa-solia-lasálàá,
la yaŋ nilan o sɔɛi he.
Niaa simlacia Israɛlla, la tuei-yɔ.
Niaa co o cɛi lemasaa nin-nda bɛɛ, la yaŋnun-ndɔ.
Niáà bɛnda le vannda pɛɛkoo
le dɛnɛ sandaa tosaa ni.
Kɛ mí la yɔŋnun yaŋɔɔlen le yungu ni co Mispa-o,
mí la yɔŋnun yala toandaa o pembei Tabɔr coo.
2À tow soon bɛndu-bɛndoo Sitim.
Kɛ i co nda kpede dɛnnda palaalan tuisi coo le ken.
3I sina polale Efraim-nden,
Israɛlla co a viannan le ya le.
Kɛ nduyɛ, niaa cuavaa-imamaa Efraim-nda,
la luɛi suundaa,
Israɛlla nɔɔlian.
4Dɛnnda nda co tosaa lan la nɔla lɛ
mì la mingi nda Hala o ibuŋ te.
Kani hoeyii suunda soolaa n'piɔmnde
co hɔŋndo nda coo
le tùú nda sina Mɛlɛka le-o.
5Yonga Israɛlla co nda pila seilen tɛndallo,
Israɛlla a cuavaa-imamaa Efraim-nda
boŋ le dɛnnda ndala vɔɔnndan.
Vannda Yuda bɛɛ boŋ latulu nda ndaa.
6A cuanin saa ndaa a navaa ndaa
mà kɔɛ Mɛlɛka nuwviaa a nda.
Kɛ a seelunnin ndu le,
kani o kɔɛ nda levil.
7A yɔŋnun vanaa lo o lediom coo a Mɛlɛka le,
kani a velu cuavaa sámáá.
Nanu a paangii pilɛ,
a hun cuunin latulu a ɲɛm ndan kpede.»
Cɔwvo del Efraim nda Yuda tɛɛn
8«La hɔŋ leo o kobio Kibea nin,
mì la hɔŋ buloo o kobio Rama nin.
La yonda yonda cɔwvo Bɛt-Avɛn.
Niaa polale Bɛnyamɛn-nden, la caa dɛ!
Kani yaamɔɔa co niaa vɔmndo a makɔɔ.
9Polale Efraim-nden le tambunin
paale ya tuisinin nda dɛnɛ palaa coo len.
Sɔɛi ya co hee Israɛlla dimullo-e
hun tosannin lekɛ́ndɛi.
10Maa vanaa faŋa powtan o pɛɛngulan-nda
simlacia Israɛlla co ni.
Kɛ i co kɔl ni tuwvo tuisi nda coo.
11Cuavaa-imamaa Efraim-nda co kpukpaa sɔlaa.
Ɲɛm va le nda-on hɛlun nda,
kani a co kiltan ɲɛm fondon kɔɔli.
12Lelan, i co siŋnɔn maa piɔŋ makusu
le polale Efraim-nden,
mì siŋnun maa paw kolon le vannda Yuda.
13Cuavaa-imamaa Efraim-nda sina nàà ndaa,
mí Yudaa ca pavii ndɛi.
O kon mí cuavaa-imamaa Efraim-nda kɔa Asiri,
má viam vannda o masa bɛndoo lo le nda malaa.
Kɛ masa kon nɔla niaa singi le,
o nɔla vɛlɛ pavii niɛi cɛwvo le.
14Kani yàlà kana ya co
le polale Efraim-nden ni,
maa yàlà téndé ya co le cɛi Yuda-o ni.
Ya ya, i bii pɛ, i sɛɛsiaa, i kɔɛnnun.
Ɲɛ-ɲɛ ya bii pɛ, i kɔɛnnun a ndu,
vana-vana nɔla ndu hiɔlɔɔ ya o ba le.»
Le muungoo Hala o ibuŋ
15«I co lakɔ mì muungun o calta nilan
háá mà sina maa a cua hakio,
mà nuwviaa ya le muungoo ya o ibuŋ.
Taa va pɛ o kuɛi nin,
a co cɔnɔn ya nuwviaa.»
Zur Zeit ausgewählt:
Osee 5: BKG
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© Alliance Biblique en Guinée