Osee 2
2
Paale bɛndule Yisreɛl-ten
1«Kɛ paale vanin, mì Israɛlla kui taw.
À vanin sɛ́lɛ́ maa sióónndon
o mɛmma ihɛllan kɔngɔ.
Vana nɔlanin nda cɔmndo le.
Fonda ndáà va nda paandu dimullo-o aa:
‹La co yungu ni le›,
a dimulnin nda o fonda kon aa:
‹Cuavaa Hala yoomaa niaa co ni.›
2O kon, Yudaa a Israɛlla cuungiannin,
mà cua simlacinɔɔ ndu pilɛ,
mà fula o lɛŋnden nin.
Kani paale bɛndulen
paale Yisreɛl-ten le vanin ni.
3Lelan, la veelu puapilɛa niaa aa Ammi (kon co dimio ni aa «Yungu nuu»),
mì la veelu yemaa niaa aa
Ruhama (kon co dimio ni aa «Kaolaa»).»
Israɛl, lanɔ suundɛiyo
4«La kilu kala niaa yamɛi, Israɛl pɛɛn.
La kilul ndu yamɛi,
kani o co lɛ laa ni le,
ya bɛɛ i co lɛ pɔnɔ ndɔ le.
O bɛnda mò vɔɔsun pondale suunda ndɔɔ ndu o hɔl.
Mò faŋan tɔɔmasele suunda ndɔɔ ndu o mɛɛyan tɛɛn,
5yɔŋii ya yunga ndu,
mì mɛi ndu fondo fúú,
mɛɛ o va o paale nda velu ndu len coo yɛ.
I minginin lɛŋnde ndɔlen lɛŋnde veselɛilen,
mì mingi len lɛŋnde mɛmma sɔlan nin te len.
O kon mò vi a bolola vesɛilan.
6I yeema cuavaa ndɔa le,
kani o suundaa nin o velu nda ni.
7Kala nda luɛi suundaa.
Kala solin nda o ipulu-o tuisin siɛmbulan.
O dimi aa: ‹I co lakɔ sámáá nia kɔɔli,
nda co ya ɲɛdiaa nuu, mɛmma nian,
kola ni toosian a yiiŋii saa-o, kola keese nuu,
cuɛima nian a ɲɛm ya kol-lon yɔngoo ni.›
8Lelan, ya Mɛlɛka,
i co ndu nɛiyo kinda laci a yɔɔn,
i co ndu kpakio cɔvɔɔ laci.
O ci lɛnin nɛi o vanin kɔlan coo-o le.
9O kon, o vanin kɔlan sámáá ndɔa kɔɔli,
kɛ o bendalnin nda le.
O nuwviaanin nda, kɛ o seelunnin nda le.
Le hee, o diminin aa:
‹I muungu vɔ mì kɔɛnnun o pɔnɔ ni tasoo lo.
Kani lɔ́ɔ́ ya va ndu o ba-o
yáà hiow va o dɛnɛ kɛndɔɔ nin a sisa.›
10O ve sina maa ya le va ndu maalon,
mɔima sɛnɛiyan a cuɛiyan yɔngoo le.
Ya va ndu vɛlɛ volion a sianion yɔngoo ni,
kɛ mó tosa baalaa a mun le piɔmndo Baal.
11Lelan, i co malun nun poonda o telen koavaa,
mì puu mɔima nian o telen mamɔiyo.
I co vɛlɛ kola ni toosian a yiiŋii saa-o
a kola keese ni va ndu siɛmbulan kumbɔɔ-o yuunda.
12A toɲa, i ciinin ndu bɛ̀ɛ̀lan
mì siɛmbulan la tol ndu
sámáá ndɔa o hɔl kpendekele.
Vana-vana kuunanin ya ken tosa le.
13I tɛɛmbuunin kɔlkɛndɛ ndɔɔ,
mì kuuna kafola ndɔlan,
kɔlkɛndɛ ndɔ paangun sɛnɛiyo,
kafola ndɔla paale pɛngiaalan
a cuungiannda ndɔla kɔlkɛndɛlan kpow.
14I tɛɛmbuunin nakɔla n'rɛsɛnnda ndɔlan
a nakɔla n'voosula ndɔla o va dimio aa:
‹Sámáá nia ke ya lan ni› lan.
I co lan siinguu bundɔɔ
mì visia yondoa de lan.
15I co ndu sangaa tuisi coo
le palɛi o tɛɛmbuu o Baalla sálàlan solullo
a o nda ansan lumndo nin-nde.
O palɛi ken nin, o va kelan suun ndɔn
a yɔlɔn ndɔn labolon vownɔnndo,
mó va kɔlan o sámáá ndɔa lo,
ya ya mó pɔɛɛnun ya.
Ya Mɛlɛka soo nuaa ni.
16I co vɛlɛ ndu hiɔlɔɔ
mì kɔɛ a ndu o lɛŋnde veselɛilen nin,
mì soo o ndu lo.
17Lon, ya mingulnin ndu
nakɔla n'rɛsɛnnda ndɔlan ni,
mì mingi bóllo Akɔr maa dio kɔlkɛsiaa.
O kon, o delnin ya kɔɔlii a yeemɛi
maa telen o va o felengiyɛi ndɔɛi nin-ndo,
maa paale o fula Esipte mò va heeloo len.»
Paale ciyaa sɔngɔlen
18Mɛlɛka dimi aa:
«Paale len, o veelunin ya aa: ‹Pɔnɔ nuu›,
o veelu lɛnin ya aa: ‹Vana ni bɛndoo› le.
19I faŋanin ndu diola Baalla o sondo,
vana ve lɛnin nda ladio piɔlɔɔ le.
20Paalelen, i yiinin kpemaa le vanaa nia.
I yiinin ndu a visia yondoa a á yowva coocoo,
mì yii ndu vɛlɛ a visia pɔm-pɔmbɔa kela lɛŋ-nda.
I yiminin kpaasiaalan, mɔɔn cɔwvon,
a ɲɛm cɔwvon kpow,
mì ke vanaa nia pɛngio,
mà vannun nila ɲulu.
21Nɔm Israɛl, i fula nɔm kɔɔli
le nɔm cuaa o nɔ̀u nin le fɛɛn a fɛɛn.
I fula nɔm kɔɔli le nɔm cuaa o nɔ̀u nin,
mì dɔw nɔm fulu a sandei,
a lou o lediom coo, a kaolaa a á ɲííye.
22I sɔlanin nɔm o nɔ̀u nin
a lou o lediom coo.
O kon, a sinanin maa ya co Mɛlɛka ni.»
23Mɛlɛka dimi nuaa ni aa:
«Paale len, i mulinin piɛilen.
I mululnin halataala piɛilen,
mì halataala mulul lɛŋnden piɛilen,
24mì lɛŋnden le mulul maalon,
mɔima sɛnɛiyan a cuɛiyan piɛilen,
mì ɲɛm mun kpow n mulul Yisreɛl piɛilen.
25I tɔalnin Yisreɛl o lɛŋnden coo,
mì kaola Lo-Ruhama.
I dimulnin Lo-Ammi aa:
‹Yungu nuu niaa co ni›,
mì ndu muli aa: ‹Hala nuu n co ni.›»
Zur Zeit ausgewählt:
Osee 2: BKG
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© Alliance Biblique en Guinée