Osee 12
12
Polale vɔɔnnden polale Efraim-nden le co ni
1«Cuavaa-imamaa Efraim-nda balu ya a còòlan,
cɛi Israɛllo balu ya a sɔɔn lakafan.
Polale Yuda len le co vɔ ya Mɛlɛka kɔɔli,
kɛ le co vɛlɛ halaa celennda sooloo.
2Cuavaa-imamaa Efraim-nda
co kiltan hoeiye kɔɔli,
a co hoeyii fula a ba paalen le can-ndo-e
kɔlan kɔɔli.
Lepalaa-lepala a co còòlan
a delɔɔcoo vangalaa.
A yii kpemaa a lɛŋnde Asiri len,
a co cuɛiyan pisio Esiptea o ba.
3Mɛlɛka co hunɔɔ kɔɔsɔ a polale Yuda len,
o soaŋnin cuavaa Yakɔb-a le kela nda vɔɔndo.
O tosalnin nda mɛɛ dɛnnda ndalan la co yɛ.
4O dembe kala nda-o nin pɔ́
Yakɔb koondan bɛ ndɔ pelei ni,
telen o siŋnun langbanɔ kálàá-o,
mó cɔlɔba nda Hala.
5Mó cɔlɔba nda mɛlɛkanɔɔ,
mó nɔla mɛlɛkanɔ kon,
mí Yakɔb mɛli yeelan, mó tɛɛlun ndu.
Betɛl o komal ndu ni,
lon Hala soo o naa lo ni.
6Mɛlɛka co Hala-Nɔ-Kpaayaa-Kpow-vo ni,
diola ndɔlan aa Mɛlɛka.
7Lelan sisa, niaa cuavaa-imamaa Yakɔb-a,
la mùùngú ya Hala niaa o ibuŋ.
La vá kelaa o vanakɛndɛyɛi a o sandei nin.
La vá Hala niaa tiindanndo le lɔ́ɔ́-lɔ́ɔ̀.
8Ya Mɛlɛka dimi aa:
‹Cuavaa-imamaa Efraim-nda
nɔ ɲɛla tuvaala lakafalan o laba
maa yulaa Kanaan,
a yeema bɔɔ kafalan.›
9Mí niaa niaa dimi aa:
‹N siŋnun vanaa bolofaa,
n sɔla ɲɛm kɛndɛn latɔ́ɔ́-tɔ́ɔ́-on taw.
Bolofaa kon kpow,
lalle naa n kelu le ndu sɔlaa ni.
N tosa lakafa le, n tosa haki
o ndu nuwviaa nin te.›
10Ya yɛ, kabi o lɛŋnde Esipte len nin,
ya co Mɛlɛka Hala niaa ni.
I co vɛlɛ niaa kɛsi o cɛila-kolala-toandaalan bɛngu,
maa o palɛi bɔɔŋian lakafoe coo.
11I soo o vanaa-tɛɛngaa-diom Hala-a lo,
mí cɔm vannda vunduan taw-taw.
I soo o talelan nin
a sondola vanaa-tɛɛngaa-diom Hala-a.
12Vanaa co Kalaad-a tosa dɛnnda lahakilan
má siŋnun vanaa fondoa.
A co sálàlan solio Kilkal a navaa tovaa,
kɛ fondala-loamaa-lasálàla ndalan
la siŋnunnin powta kundalan
o ciɛɔn nin.
13Mí Yakɔb ndóò ɲaanun lɔ́ɔ́ kon,
mí ndóò kɔannun Aram,
mí Israɛl tosa baalaa le lanɔɔ sɔlaa,
mó manda cɔlua le lanɔɔ sɔlaa.
14A vana-tɛɛngaa-diom Hala-o pum
Mɛlɛka kei ni mó soli Israɛlla
o lɛŋnde Esipte len nin,
a vana-tɛɛngaa-diom Hala-o koni
o kei ni mó manda nda.
15Cuavaa-imamaa Efraim-nda
boli Mɛlɛka kɔllo nin taw má yɔŋul ndu.
Kɛ Maalii ndaa co nda dɛnnda vɔɔnnda ndalan
mingul le vanndacieea nda diw-va.
O minginin siɛmbulan ndalan nda pila coo.»
Zur Zeit ausgewählt:
Osee 12: BKG
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© Alliance Biblique en Guinée