Osee 11
11
Kaola Mɛlɛka kaola Israɛl-lo
1«Tuma Israɛl va maa poombɔ pɔmbɔ-o,
mí kaola ndu,
mí veelu ndu, ndu po nuu,
le faŋanndo Esipte.
2Kɛ mɛɛ ya va Israɛlla veeloo faw,
lende nda va kɔnndan ya levil.
A va Baal sálàlan solullo,
a va ansan lomɔɔ le halaa fondoa.
3Nduyɛ, ya Mɛlɛka pɛɛku Efraim kɔlan ni,
ya saa ndu balan le taŋtaŋndo tosaa ni.
Kɛ o sina maa ya le va ndu mandaa le.
4O vanacieeyɛi nin ya va ndu nanɔɔ ni,
o koalaa nin ya va kɔlan a ndu ni.
Mí yɔŋnun le ndu
mɛɛ kalacuaa cua hɔ́ɔ́ ndɔɔ nuaa
mò yiiliaa hɔ́ɔ́ kon kúúvo nuaa yɛ.
I va tundɔnndo le ndu ɲɛdiaa yɔngoo.
5Israɛlla muungu lɛnin Esipte le,
kɛ masaa Asiri tosanin masalen nda coo ni,
kani a kɛɛ le muungoo ya Mɛlɛka o ibuŋ.
6Cɔwvo luɛinin o kobila ndalan nin,
mì mɔɛi cɔwve kilikili ɲɛm co nda kandaa-on.
Cɔwvo mialnin nda kpow.
Kon tosannin le pɛl nda pila tɛnda-o.
7Vanaa nia yeema le lo
o lediom coo a ya Mɛlɛka le.
A co nda veeloo fulaa coocoo,
kɛ vana pilɛ bɛɛ co cɔnɔn te.
8Vɛ̀ɛ̀ ya nɔla yɛnin niaa kɛɛ,
niaa cuavaa-imamaa Efraim-nda?
Éé niaa Israɛlla,
vɛ̀ɛ̀ ya tiw yɛnin ba
mì yii niaa dúmbú?
Vɛ̀ɛ̀ ya nɔla yɛnin
mì tosal niaa maa kobio Adma,
te kon te mì siinguu niaa
maa kobio Seboyim?
Kɔllo hiilun ya nin,
ɲííye bii ya taw-taw.
9I tosanin mɛɛ kɔllo tuulu ya taw yɛ le.
I muungunin le polale Efraim-nden tɛɛmbuuo le.
Kani i co vanaciee le,
Hala ya co ni.
O-Diandaa ya co niaa tɛɛn ni,
I hinnin a kɔltuw le.
10Vannda kɔanin Mɛlɛka kɔɔli.
O vanin pɛɛliaa maa yàlà.
O lonin pɛɛliaa kon mì poaa ndɔa cɛn
a ba paalen le del-lo,
mà hin a kiltan a á ɲiiyaa.
11A cannin Esipte mà hin a ɲiiyaa maa n'yow.
A cannin o lɛŋnde Asiri len nin
mà hin a kiltan maa n'poonpoon.
O kon, i kɛsinin nda
mà cal o cɛila ndalan nin.
Ya Mɛlɛka soo lende ni.»
Zur Zeit ausgewählt:
Osee 11: BKG
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© Alliance Biblique en Guinée