Daniɛl 11
11
1«Ya yɛ, o vɔsi tasoo nin o masale Darius Mɛdenɔ len bɛngu, i va ndu Darius ikɛi le ndu malaa a le ndu yoomuan yɔngoo. 2Nihau, i co nɔm toɲaa cɔm:
Cɔwvo masaa a ba luaŋ-ndo a masaa a ba too-o tɛɛn
Tofa vɔ! Masaa nda yáá cannin vɛlɛ mà tosa masalen o lɛŋnde Pɛrse len coo. O hiɔɔlundɔɔ sɔlanin bolofaa mò hiow a yáá-aa kan kpow. Lɔ́ɔ́ o sɔlanin yoomuan taw a bolofaa ndɔɔ-o, o nuwviaanin nɛilan le masaa Yavan cɔlɔbaa. 3Kɛ masa dialun kalaa pum sulnin o lɛŋnde Yavan-nden coo, mò tosa masalen a kpaaya bɛndoo taw. O tosanin ɲɛ hɛnannin kɔl ndɔɔ-o. 4Kɛ telen o calnin ɲɛkɛndɛi o masale ndɔlen coo-o, masale ndɔle len le tambunin mì le piɔwnun o kpengun hiɔɔlun lelɛŋndon coo. Cuavaa ndɔa imamaa loonin masalen te. Le tosan ndɛnin a kpaaya bɛndoo maa paandu le, kani le vanin le piɔvaalen vanaa celen o ba.
5Masaa a ba too sɔlanin kpaayaa taw, kɛ vanaa vanin ndu ikɛi-ya, o pilɛ hiawnin ndu kpaayaa, mí masale vana kon le hiow le ndɔlen. 6Te vɔsilan taw la hiow pɛ, a yii kpemaa. Cua laandu masaa a ba too calnin masaa a ba luaŋ-ndo o ba o nɔ̀u nin, le diom pilɔɔ yiiyo. Kɛ kpaaya cua laandu kon tambunin. O malnunnin vannda o ba, a hɔ́ɔ́ ndɔɔ, a vanaa kɔanin a ndu-a, a vana ndɔ malaa o telen kon nin, vana-vana lonin yoomu le#11.6 Bungɛi he, nɛi 6 ndɔɔ ho dindu o hebrei nin te. Lelan vana-vana hivi ndi mɛɛ o bii ndi bila ɲɛ-pɔmbɔ yɛ.. 7O telen kon, vana pilɛ o yungu ndɔɔ nin cuanin fonda fuɲa ndɔ-o, mò hinul masaa a ba luaŋ-ndo, mò soŋ vanaa ndɔa cɔwva, mò luɛi masaa coo o kobi nda kunga a kpakio-o nin. Mò cɔlɔba nda a yoomuan, mò nɔla nda. 8O cuanin piɔmnda a halaa co o lɛŋnde len nin-nda, o cuanin vɛlɛ ɲɛm cɔwnun a volin humbon-ndon a ɲɛm cɔwnun a sianion-ndon, mò kɔɛnnun a mun o lɛŋnde Esipte len nin. O tosanin vɔsilan taw, o sɔɔnguunin masaa a ba luaŋ-ndo ikɛi le. 9Masaa a ba luaŋ-ndo cannin, mò kɔɛ o masa co a ba too-o lo. O kon kɔɔli, o muungunin o lɛŋnde ndɔlen nin.
10Cuavaa masaa a ba luaŋ-ndo a bɛɛndiannin le cɔwvo. Mà cuungiaa vanaa cɔwva taw, mà sɔɔnguu, mà coŋ nda coo maa mɛmma hunaa. A luɛinin ma del ndu coo a cɔwvo háá o kobi nda kunga a kpakio-o nin. 11Masaa a ba too tuulunin kɔl a masaa o ba luaŋ-ndo, mò kuel ndu a cɔwvo. Masaa a ba luaŋ-ndo cuungiaanin vanaa cɔwva taw. Kɛ masaa a ba too soaŋnin nda, mò nɔla nda. 12O puusiaanin nda, mò kuundian taw le vanaa sɛ́lɛ́a o tɛɛmbuunin kan-nda, kɛ o lonin o nɔla kon coo le. 13Kani masaa a ba luaŋ-ndo muungunin, mò cuungiaa vɛlɛ vanaa cɔvaa celen hiovɔɔ a tasea. Vɔsila pum la hiow pɛ, o kuel ndu a vanaa cɔvaa sɛ́lɛ́a kan, a ɲɛm cɔwvon taw. 14O telen kon, vannda taw a cannin le masaa a ba too cɔlɔbaa. Hali langbaa hɔlta vesɛiya o yungu nɔm Daniɛl-lo nin, a simulnin ndu a cɔwvo, haliko mi dɛnɛ cɔmnun o vundulen nin-ndo peelun, kɛ a nɔlanin ndu le. 15Masaa a ba luaŋ-ndo hunnin, mò tangul nɛiyo a powtan háá o kpakio bollen, mó del kobi nda kunga a kpakio-o coo. Vanaa cɔwva a ba too a nɔlanin ndu simullo le, kani kpaaya ndaa venin o bɔɔ le ndu simullo le. 16O tosanin ɲɛ hɛnannin kɔl ndɔɔ-o, vana-vana nɔlanin ndu simullo le. O calnin o lɛŋnde hiow naŋɔɔ len nin, o nɔnin kpaayaa le ɲɔɔn tɛɛmbuuo. 17O yiyannin le hunɔɔ a kpaaya ndɔ lemasaa kpow, mò yii kpemaa nda masa co a ba too-o. O yɔngunin masa co a ba too-o lanɔɔ haliko mó tiw ndu ba. Kɛ o nɔlanin te, kɔlkalu ndɔ kon malanin ndu le. 18O kon kɔɔli, o mulinnin a ba lɛŋii co o mɛnndan ikɛi-ye, mò bii i bɔɔ-bɔɔ. Kɛ kuubanɔɔ pum tɛɛmbuunin yonga ndɔ kon, mò tuisi ndu nda pila o lebol. 19O mululunnin kobila nda kunga a kpakio o lɛŋnde ndɔle kpeekpeilen nin-ndan, kɛ o nɔlanin ndan te. O delnin, vana ci lɛnin ndu le. 20Vana muungunin o fonda ndɔɔ-o viamnin vana biyaa muloo le kɔlan ɲɔɔn cuaa a paa-kala o fonda hiow naŋɔɔ o masale len nin-ndo. Kɛ palɛi pum o kon kɔɔli, o yomiyominin, mò tambu, kɛ o venin vannda o hɔl kpendekele e, o venin o cɔw nin te.
21Vana vannda luei yii loo siŋnunnin masaa o fonda ndɔɔ, a yɔngunin ndu bɛɛle lemasalen te. O telen kɔlɲuloo vanin-ndo o hun cuanin masalen a kɔlkalu vɔɔndo ni. 22Kunda vanaa cɔw súú-súù nɔlanin ndu le. O fukpanin vanaa cɔwva háá mò yimiyimi nda, mò dii vana co bolle kpemaa-o. 23O yiinin kpemaa a ndu mò tosal ndu kɔlkalu vɔɔndo. Hali mo nɔ bɛɛ vanaa bɔɔ le, kpaaya ndɔɔ vanin o bɔɔ taw. 24Telen kɔlɲuloo vanin-ndo, o luɛinin o fondala hiow tɔnɔɔ o tàndà kon nin-ndan nin, mò tosa ɲɛ fuɲaa ndɔa a fuɲaa ndɔa mamaa tosa vɔ kabi loo. O piɔwnin vanaa vanin ndu kɔɔli-a ɲɛ-sɔlaa a bolofaa cɔwvo. O kindinnin le kobila nda kunga a kpakio lan delɔɔ coo. Kɛ kon tosannin le telen pum daama.
25O tiindannin yoomuma ndɔan, mò kuel masaa a ba too a vanaa cɔwva taw. Masa kon bɛɛ bɛɛndiannin a vanaa cɔvaa kpaayaa taw le ndu cɔlɔbaa, kɛ o nɔlanin ndu simullo le, kani o miingulnin ndu yaŋɔɔlan. 26Vanaa ndɔa kpeekpeiya yiinin ndu dúmbú. Vanaa ndɔa cɔwva cɛɛlunnin, mà vi taw-taw. 27Yeemɛi biinin masaa ŋiɔŋaa kan le dɛnɛ vɔɔndo tosaa, a vanin icali nɛɛ pilɛ ma dimulan còòlan, kɛ còòla lan la nɛŋinin ɲɛ-ɲɛ le, kani telen kelun-ndo tiiya vɔnin te. 28Masaa a ba luaŋ-ndo muungunin o lɛŋnde ndɔlen nin a bolofaa taw. Kɛ o nɔnin nɛyɔnndo a kpema diandaa, mò yiyan le ndu tɛɛmbuuo. O kon, o muungunin o lɛŋnde ndɔlen nin.
29Te telen kelun-ndo tiiya pɛ, o cannin vɛlɛ mò kuel masaa a ba too, kɛ sɔɔn tosan ndɛnin o mɛɛlula lan maa o kandɔɔ le. 30Vannda cannin Kitim mà hinul ndu, mà hun simul ndu. O kon, o vunin n'dial, mò muungu. O mulinnin mò kuel kpema diandaa a kɔltuwvo. O va pɛ muungoo, o nuwviaa vanaa malnin kpema diandaa-a le bɛndaa a nda. 31O viamnin vanaa cɔwva mà hun nɔɔliaa cɛi-diandaa a kobi nda kunga a kpakio-o. A kuunanin sálà nda solul Mɛlɛka lepalaa-lepala-o, mà hun kɛsi mààla tɛɛmbualan ndon. 32O lueinin vanaa kɛɛ kpemaa-a o pɔwlan nin a candula ikpaavalan. Kɛ yungu vanaa sina Hala ndaa-a nda simnin yili o dɛnnda ndalan nin ma lo lecoo. 33Vanaa hiow kɔlkaloo nda tɛɛn-nda pɛɛkunin vannda taw. Telen pum o kon kɔɔli, a diwnin a bɔɔ-bɔɔ nda tɛɛn a mɔɔn cɔwvon, a loamnin a pum a yinnden, a malnin a pum o kaasoo ma puu nda ɲɛm ndan o laba. 34Telen nda vanin kon o sanga imɔnɔɔ nin-ndo, a sɔlanin malaa ɲɛ-pɔmbɔ kínɛí. Kani vannda taw a sɔɔnguunin nda ikɛi a kɔlta muuluanndan. 35O vanaa hiow kan kɔlkaloo-a tɛɛn, a pum malnin nɛiyo, kɛ Mɛlɛka tuisinin nda dɛnɛ palaa coo haliko ma tɔɔnun, ma dendu, mà muungu a kɛndɛ háá o telen kon mɛɛlulan, kani telen kelun-ndo tiiya vɔnin te.
36Masaa tosanin ɲɛ hɛnannin kɔl ndɔɔ-o, o kuundiannin háá mo cennun maa ndu hiow halaa kpow ni. O diminin sɔɔn yongan a Hala-Hiow-Ɲɔɔn-Kpow-vo. O nɔlanin ɲɛ hɛnannin kɔl ndɔɔ-o tosaa háá telen kɔltuw Hala-o fulanin ceen-ndo. O kon, Hala peelunin sɔɛi o kelu-e. 37Masa kon nɔnin lebɛɛ le halaa fuɲaa ndɔa mamaa biilu-a le, o nɔnin vɛlɛ lebɛɛ a hala vanlaandua kaola taw-vo le. O vonin vɛlɛ hala celen te, kani o cannunnin maa ndu hiow halaa kpow ni. 38Yɔŋii o biilu halaa kan, o biilunin hala kobi nda kunga a kpakio-o, o fuɲaa ndɔa mamaa sina loo, mò yɔngu ndu sianion, volin humbon, powta báà kàlàlan a ɲɛm vɔngu bɛndon. 39O cɔlɔbanin kobila nda kunga a kpakio lan a kpaaya hala celen, o kenin vanaa cɛlnin hala kon-nda bɛɛlen, mò kɛsi nda vanaa bɛndua vannda taw coo, mò piɔw nda lɛŋnden le vɔ̀ngɔ̀ ndaa.
40O telen mɛɛlaa, masaa a ba too hinulnin ndu a kɔltuwvo, kɛ mì masaa a ba luaŋ-ndo tol ndu coo a ɲɛla ɲaanannda ndɔla cɔwla cɔlua nan-ndan, a vanaa tosa cɔwvo o soa coo-a, a dɛ̀ndɛ̀la bɛndula cɔwlan taw o mɛnndan coo. O luɛinin o lɛŋii bɔɔ-bɔɔ nin, mì vanaa ndɔa cɔwva tiw lenin pindo maa mɛmma hunaa. 41O luɛinin o lɛŋnde hiow naŋɔɔ len nin, mò bii vanaa bɔɔ-bɔɔ, kɛ Edɔmnda, Moabua a cuavaa lebolla o cuavaa Amɔn-nda tɛɛn a hialunnin ndu. 42O kuumbunnin lɛŋnde taw coo a kpaaya ndɔɔ, hali lɛŋnde Esipte len le helunnin ndu le. 43O puunin Esiptea bolofaa o ba: sianion, volin humbon a ɲɛm sɔvɛɔn taw. Libiia a Kusiia delnin ndu kɔɔli. 44Kɛ siòònde biinin ndu a sɔɔn fulanin a ba paalen le can-ndo-on a á sɔɔn fulanin a ba luaŋ-ndo-on, mò cɛn a kɔltuwvo le kɔlan vannda taw diwvo. 45O baŋnin cɛila-kolala-toandaala ndɔla lemasalan o mɛmma ihɛllan a o Pembii-Diandɛi co o lɛŋnde hiow naŋɔɔ len nin-nden tɛɛn. Lon mɛɛlula ndɔlan la vanin ni. O sɔlanin vana malaa le.»
Zur Zeit ausgewählt:
Daniɛl 11: BKG
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© Alliance Biblique en Guinée