Daniɛl 10
10
Vundule yàándɔlen: langbanɔ pum a kola keesoo lekɔɔ
1O vɔsi yàándɔɔ nin o masale Siris, masaa Pɛrse len bɛngu, mí sɔɛi pum dimulun Daniɛl, o nda ke diolan aa Bɛlsasar-o. Sɔɛi ken va sɔɛi toɲɛi a sɔɛi cɔw bɛnduei ni. Mí Daniɛl bii sɔɛi kalɛi bila. Mó sina ndi pɛɛngu o vundulen nin.
2«O telen kon, ya Daniɛl, mí tosa lɔ́ɔ́lan tan yáá o mɔnɛi nin. 3I ve ɲɛdiaa hɛnan ya-o dio le, i ve n visi dio le, i ve mamɔi kolɔɔ le, i ve vɛlɛ macuɛi suunɔn te, háá mí lɔ́ɔ́la yáálan la cuu. 4O paale bidiin a lehiɔɔlundɔlen coo o paangii tasei nin, i va isisi o pee bɛndoo Tikre kɔngɔ, 5mí heelu hɔlla le tofaa, mí ca langbanɔɔ pum a kola keesoo lekɔɔ. Yaule va ndu o caŋ-nden le va le toosialen a sianin diandan. 6Kɔɔle ndɔlen le va maa pow krisolite, hɔlaa ndɔa va maa piɔɔ-volia, hɔlta ndɔlan maa yinnde biyaa. Congúla ndɔlan a pelun ndɔn va n'diandaa maa daɲan kpɔlɔkaa, diom ndɔɔ maa diom sɛ́lɛ́ bɛndu. 7Ya Daniɛl kínɛí va vundule len cɔu ni, vanaa va ya ikɛi-ya ve len cɔ le. Kɛ mí siòònde bii nda taw, má ɲaanun le kɔlan vininndo. 8Mí lo ya pilɛ kpé, mí va vundule bɛndule len tofaa, mí kpaaya nuu cuu, mí hɔlaa nia mangalan, mí fula mayoomu. 9Mí tuɛi langbanɔ kon sɔɛi. Mɛɛ ya tuei ndu sɔɛi, mí del o kuumbuan o kɔl coo maa vana vovɛi. 10O kon, mí ba vanacieo pilan ya, mó cua ya, mí baŋ vulan a balan lɛŋ, mí va ɲiiyaa. 11Mó dimul-la aa: ‹Daniɛl, nɔm vana Hala kaola hoo taw-vo, bii sɔɔn ya co nɔm dimullo-on bila. Cɔn ma sim, kani o nɔm ndo nda vem ya ni.› Mɛɛ o dimi diomnda lan, mí can a ɲiiyaa. 12Mó dimul-la aa: ‹Siòòŋii bíì nɔm te, Daniɛl, kani kabi paale tasele n yiyan le sɔɔn co yɔŋnɔnndo-on sinaa a le tuisinndo tootoo Hala o hɔl-ten, mí Hala tuɛi nɔm diom. Lelan ya hin o nɔm ndo ni. 13Mɛlɛkanɔ kandà lɛŋnde Pɛrse len-ndo simul-la o palɛi bidiin a lepilɛ bɛngu, kɛ mí Misɛl, o co simlacinɔ pilɛ o mɛlɛkaa tɛɛn-ndo, hun mala ya. Mí lo lon masaa Pɛrse ikɛi. 14I hin nihau le nɔm ɲɛ hun yɔŋnunin yungu nɔmndo o siɔdii lacio nin-ndo dimullo, kani vundulen le co vɛlɛ le telen kon.›
15O va ya sɔɔn mun dimullo, mí tundu hɔlla lɛŋ, mí mei kpili, i nɔla sɔɛi le. 16O kon mí ɲɛ yoomaa va maa vanaciee-o pilan cɔcɔn nun, mí kumbi sondoo le sɔɛi, mí dimul vana va ya isisi laci-o aa: ‹Maalii nuu, i ɲiiya, siòònde bii ya taw le vundule ya ce len-nden. I fula mayoomu few-few. 17Vɛ̀ɛ̀ ya vana baalaa nɔla yɛnin suukanndo a Maalii nuu? Nduyɛ, i nɔ lɛhau kpaaya le, i fula mayoomu po!› 18O kon, mí ɲɛ yoomaa va maa vanaciee-o pilan ya vɛlɛ. Mó luei ya yoomuan. 19Mó dimul-la aa: ‹Siòòŋii bii nɔm te, nɔm po Hala kaola taw-vo. Vannun a kɔlɲulu. Kindikindin mà sɔla yoomuan.›
Tuma o va sɔɛi-yo, mí kandu yoomuan sɔlaa, mí dimul ndu aa: ‹Soo, Maalii nuu! Kani a luei ya yoomuan.› 20O kon, mó ɲuna ya aa: ‹A sina le kɔlɔ ya hin o nɔm ndo o? I co muungu le mɛlɛkanɔ co lɛŋnde Pɛrse len kandaa-o cɔlɔba. I cii pɛ a ndu, mɛlɛkanɔ co lɛŋnde Yavan-nden kandaa-o co vɛlɛ hunɔɔ. 21Kɛ i co nɔm ɲɛ sɛvan o Sɛbɛ Toɲaa nin-ndo dimul. Vana-vana mala ya o sɔɔn mun nin te, fɔ Misɛl, simlacinɔ niaa.›»
Zur Zeit ausgewählt:
Daniɛl 10: BKG
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© Alliance Biblique en Guinée