Mātaio 10

Te au 'āpōsetolo tino nga'uru mā rua

(Māreko 3.13-19; Luka 6.12-16)

1Kua kāpiki atura a Iēsū i te au pipi tino nga'uru mā rua ki aia ē kua tuku atura ki a rātou i te mana ki runga i te au vaerua vi'ivi'i kia tuaru i a rātou ki va'o, ē kia 'akaora i te au tū maki rava rāi ē te au mate rava rāi. 2Tēia 'oki te au ingoa o te au 'āpōsetolo tino nga'uru mā rua ra: Ko Simona te mōmua ko tei karanga'ia ko Pētero ra, ē tōna teina ko Ānēderea; ko Iākōbo a Zebedaio ra, ē tōna teina ko Ioane; 3ko Philipa ē ko Baratolomea; ko Toma ē te tangata ko'i tero ko Mātaio; ko Iākōbo a Ālephaia ē ko Tādaio, 4ko Simona te Kananaio ē ko Iūda Ikariota ra tei tuku pikika'a i aia ra.

Tē tono nei a Iēsū i te au 'āpōsetolo tino nga'uru mā rua ra

(Māreko 6.7-13; Luka 9.1-6)

5Kua tono atura a Iēsū i taua tino nga'uru mā rua ra ma te ako atu i a rātou, nā kō atura, “Auraka e 'aere atu ki tēta'i 'ua atu arāta'a o te au 'ētene ra. 'Eia'a katoa e tomo ki tēta'i 'ua atu 'ōire o tō Sāmāria ra. 6E 'aere rā kōtou ki te au māmoe ngaro o te ngutu'are o Īserā'ela. 7I tō kōtou 'aerenga ra, e tūtū 'aere kōtou e nā kō atu, ‘Tē vaitata mai nei te bāsileia o te ao!’ 8E 'akaora i te au tangata maki, e 'akatū i tei mate, e tāmā i te au lēpera, e tuaru i te au dēmoni. 'E mea 'ō mai'ia tā kōtou, e 'ōronga 'ua atu 'oki kōtou. 9Auraka e 'apai i tēta'i 'ua atu 'auro, 'ārio ē te veo i roto i tō kōtou tātua, 10#1 Kōr 9.14; 1 Timo 5.18auraka katoa 'ei pūtē i tō kōtou tere, auraka katoa e takirua pereue, tāmaka, ē tēta'i tokotoko: e tau 'oki te kai nā te tangata 'anga'anga ra.

11“Ē te 'ōire mama'ata, mē kāre, te 'ōire rikiriki tā kōtou e tomo ra, e kimi mārie i te tangata e tau i reira; 'ei reira kōtou no'o ei, e 'aere atu ei. 12I tō kōtou tomo'anga ki roto i te 'are, e aro'a atu i tō reira. 13Ē tē tau ra taua ngutu'are ra, kia vai rāi tā kōtou 'au ki reira; mē kore rā e tau, kia 'oki 'aka'ou mai ia tā kōtou 'au ki a kōtou. 14#Anga 13.51Ē tei kore e 'āriki mai i a kōtou, ē kāre 'oki e 'akarongo mai i tā kōtou au tuatua i tō kōtou 'akaruke'anga mai i taua 'are ra, mē kāre, i taua 'ōire ra, ka rūrū atu i te one o tō kōtou vaevae. 15#a: Māt 11.24; b: Gen 19.24-28#Luk 10.4-12Koia mou tāku e karanga atu ki a kōtou nei, kia tae ki te rā 'akavā'anga ra, 'e ngari ake tō te 'enua ra tō Sodoma ē tō Gōmora i tō te reira.”

Te au tākinga kino'anga te ka tae mai

(Māreko 13.9-13; Luka 21.12-17)

16 # Luk 10.3 “Inā, tē tono atu nei au i a kōtou mei te au māmoe i rotopū i te au luko ra. Nō reira, kia pakari kōtou mei te au 'ōvī, ē te 'apakore mei te au kūkupa ra. 17#Mār 13.9-11; Luk 12.11,12; 21.12-15Kia matakite rā kōtou i te tangata; ka tuku 'oki rātou i a kōtou ki te Sūnēderi ē e pāpā 'oki i a kōtou i roto i tō rātou au sūnago. 18E takina'ia ai kōtou ki mua i te au tūtara ē te ui ariki nōku nei 'ei kite nō rātou ē nō te au 'ētene. 19Kia tuku rā rātou i a kōtou, auraka e apiapi i te tū, mē kāre i te au mea o tā kōtou ka tuatua, nō te mea, ka 'akakite'ia mai ki a kōtou tā kōtou ka tuatua i taua ora rāi. 20Kāre 'oki ē ko kōtou tei tuatua atu, ko te Vaerua rā o tō kōtou Metua tei tuatua i roto i a kōtou na.

21 # Mār 13.12; Luk 21.16 “E tuku 'oki te tuakana i te teina kia mate, ē te metua tāne i te tamaiti. Ē te tamariki 'oki e tū mai e rave i tō rātou 'ui metua kia mate. 22#a: Māt 24.9; Mār 13.13; Luk 21.17; b: Māt 24.13; Mār 13.13E mākitakita'ia mai kōtou e te tangata rava rāi nō tōku nei ingoa. Ko tei tāpū tikāi e tae 'ua atu ki te 'openga ra, ka ora ia. 23Ē kia tākinga kino rātou i a kōtou i tēta'i 'ōire, e 'oro kē atu ki tēta'i. Koia mou tāku e karanga atu ki a kōtou nei, kāre e kako te au 'ōire o Īserā'ela i a kōtou e tae mai ei te Tamaiti a te Tangata.

24 # a: Luk 6.40; b: Ioa 13.16; 15.20 “Kāre te pipi i ma'ata atu i tōna pū'āpi'i, ē kāre 'oki te tāvini i ma'ata atu i tōna pū. 25#Māt 9.34; 12.24; Mār 3.22; Luk 11.15Kua rava 'ua te pipi kia riro mai aia mei tōna pū'āpi'i rāi, ē te tāvini mei tōna pū rāi. Mei te mea ē, i tapa'ia te ingoa o te pū ngutu'are ra ko Bēlezebūba, ka tanga atu ei 'oki tōna ngutu'are tangata.”

Ko 'ai kia mataku'ia

(Luka 12.2-7)

26 # Mār 4.22; Luk 8.17 “Auraka rā kōtou e mataku i te tangata. Nō te mea, kāre 'e mea i tāpoki'ia e toe i te 'akakite'ia mai, mē kāre ra, 'e mea i tāngaro'ia e toe i te kitea'ia mai. 27Tāku e karanga atu ki a kōtou i te pōiri nei, tā kōtou ia e tuatua i te mārama; ē tei kō'umu'umu'ia i roto i tō kōtou taringa, tā kōtou ia e kāpiki 'ua atu ki runga a'o i te 'are. 28Auraka e mataku i tei tā mai i te kōpapa nei, kāre te vaerua e mate i a rātou. E mataku rā kōtou i aia te ka rauka kia tāmate tākiri i te kōpapa ē te vaerua katoa i te pō. 29Kāre āina ē takirua manu rikiriki i 'oko'ia ki tēta'i tene? Ē kāre tēta'i o rātou ra e topa ki raro i te 'enua ma te kore e tika i tō kōtou Metua. 30Ē kua 'ope 'oki te rauru o tō kōtou ūpoko na i te tatau'ia. 31Auraka māri kōtou e mataku; 'e ma'ata atu tō kōtou meitaki i tō te au manu rikiriki 'e mānganui.”

Te 'a'aki'anga i te Mesia ki mua i te aroaro o te tangata

(Luka 12.8-9)

32“Ē tēianei ko tēta'i 'ua atu tei 'a'aki i āku ki mua i te aroaro o te tangata nei, e 'a'aki katoa au i aia ki mua i te aroaro o taku Metua i te ao ra. 33#2 Timo 2.12Kāreka tēta'i 'ua atu tei 'u'una i āku ki mua i te aroaro o te tangata nei, e 'u'una katoa au i aia ki mua i te aroaro o taku Metua i te ao ra.”

Kāre te 'au, 'e tamaki rā

(Luka 12.51-53; 14.26-27)

34“Auraka e manako ē i 'aere mai au e 'apai mai i te 'au ki te 'enua nei. Kāre au i 'aere mai e 'apai mai i te 'au, 'e tamaki rā. 35#Mik 7.6I 'aere mai nei 'oki au kia 'uritua tēta'i tangata ki tōna metua tāne, ē tēta'i tamā'ine ki tōna metua va'ine, ē tēta'i 'unōnga va'ine ki tōna metua 'ōngai va'ine, 36ē kia riro te ngutu'are tangata o tēta'i 'ei au 'enemi nōna.

37“Ko tei 'inangaro ma'ata atu i tōna metua tāne, mē kāre, i tōna metua va'ine i āku ra, kāre aia e tau i āku. Ko tei 'inangaro ma'ata atu i tāna tamaiti, mē kāre, i tāna tamā'ine i āku ra, kāre ia e tau i āku. 38#Māt 16.24; Mār 8.34; Luk 9.23Ē tēta'i 'ua atu tei kore e rave i tōna sātauro ē ka āru mai ei i āku, kāre aia e tau i āku. 39#Māt 16.25; Mār 8.35; Luk 9.24; 17.33; Ioa 12.25Tei tāpū i tōna ora, ka ngere ia i te reira, ē tei tuku 'ua i tōna ora nōku nei, ka rauka te ora i aia.”

Te au tūtaki'anga

(Māreko 9.41)

40 # a: Luk 10.16; Ioa 13.20; b: Mār 9.37; Luk 9.48 “Ko tei 'ō'ō mai i a kōtou, kua 'ō'ō mai ia i āku, ē tei 'ō'ō mai i āku, kua 'ō'ō mai ia i tei tono mai i āku nei. 41Ko tei 'ō'ō mai i tēta'i peroveta nō te mea, 'e peroveta aia, e rauka i aia tā te peroveta ra tūtaki. Ē tei 'ō'ō mai i te tangata tuatua tika nō te mea, 'e tangata tuatua tika aia, e rauka i aia tā te tangata tuatua tika ra tūtaki. 42Ē ko tei 'ōronga 'ua mai i tēta'i kapu vai anu nā tēta'i o tēianei au tangata rikiriki nō te mea, 'e pipi aia nāku, koia mou tāku e karanga atu ki a kōtou na, kāre aia e ngere i tāna tūtaki.”

Zur Zeit ausgewählt:

Mātaio 10: CIMRNT

Markierung

Kopieren