Matiye 16

Farisiyenɗe* dit Sadusiyenɗe assohoŋgək sokene

(Markus 8.11-13 / Luka 12.54-56)

1Farisiyenɗe dit Sadusiyenɗe azoŋko za Zezu kaw rakani. Assohonənək dəgəɗsiti gən sokene vi də sənən gən kpak na Maŋgəlva də sləna. 2Zezu azlan sitik na: An pay atəpka, disiŋ tay preŋ, munokum tatə nahaŋ na: Pumpum təki wasan tutuwə. 3Dəmpumo bo an disiŋ kirɓiɓ kirɓiɓi, slay buwən ettirke, munokum tatə nəhaŋ na: Buwən wazi dəpaŋka. Kəsənək uɗakan təki də ula disiŋ, amma mbari kaw ɓapən uɗakanən zigeɗ en dədaɗɗaŋ kakaŋ ɓa di. 4Ɗiiyen kakaŋkiŋki mbraytiŋ, muluvuluvuɗeŋ tahəŋ wəkayaŋ sokeneɗi amma arəhaŋ na ɓa, say sokene na məs kleŋ Zonas. Yaŋ apeti, ambatə.

Wuɗo net Farisiyenɗe* dit Sadusiyenɗe

(Markus 8.14-21)

5Paysən gewleɗ adagaraŋ ki pe'e, asgətaŋgək dawgəmən dupeŋɗe. 6Zezu anah sit na: Məzi zukum aza wuɗo net Farisiyenɗe dit Sadusiyenɗe. 7Gewleɗ atəŋgaŋgək əpel awalaŋ ziti aɓɗaŋ na: Adawpel vas na vi məgəm dupeŋɗe avam ɓayi. 8Zezu asənək va adawpeleŋ. Assohotike: Vi mi kədawpeleŋ wənna dupeŋɗe tahəŋ ɓa di? Nokum kpak wətaf nokum gəssi. 9Kəpprəmənən tagay ɓa sa? Dəde akokum wənnet dupeŋɗe sle məs nuɗeket sit ɗii uzinere sle də wəŋɗa net dembirgit aknah kekelɗeŋ ɓa sa? 10Dəde akokum wənnet dupeŋɗe buhul məs nuɗeket sit ɗii uzinere poɗo, də wəŋɗa net dembirgit aknah kekelɗe ɓa sa? 11Vi mi kapprəmanən ɓadi wənnet dupeŋɗe nəpel sukum sa? Məzi zukum aza wuɗo net Farisiyenɗe dit Sadusiyenɗe.

12Adan gewleɗ apprəmənən na dəpel sit wənna wuɗo net dupeŋɗe ɓa, amma dəziyən gən zit aza wərba zəga net Farisiyenɗe dit Sadusiyenɗe.

Piyer agəɗ saydawa na Zezuwi Messiya*

(Markus 8.27-30 / Luka 9.18-21)

13Yaŋ Zezu ambat a Kaysariya dələv na Filipi. Adaki assohet gewleɗ nani. Mi ɗii adawnahaŋ aka Wətən Ɗəf* di? 14Azlansənən na: Ɗii meɓɓeti tahəŋ wənahaŋ na əstə Zaŋ wəgəɗ baptem. Ɗii meɓɓet bo tahəŋ wənahaŋ na əstə Eliyas ɗii meɓɓet bo, tahəŋ wənahaŋ na Zeremiya walla məs kleŋ maɓɓani. 15Yaŋ Zezu assoheti: Ya nokum tam nawa nan kədawnahaŋ di? 16Simoŋ Piyer azlansənəka: Əstə Messiya Wətən Maŋgəlva* madarani 17Zezu apsəna: Zəzay azoko, Simoŋ wətən Zaŋ ɗəf ana gəɓa zə ɗəf dərban suk goŋgaŋ ɓa, amma Affu na disiŋ dərban suko. 18Əntatə nah suko: Əstə Piyer, va wənah na milɓe. Aka milɓe nani nədaw ɗii kretiyenɗe nawa. Əmta waday kiyən ɓa kpakə. 19Wanəpsuk lakile na kol ma gəla na məlĩ na Maŋgəlva. An məs kəsler akan a duniya, kawsleri akan a disiŋ nge'e, an məs kəsler akan a duniya ɓa kawsleri akan a disiŋ ɓa'a.

20Yaŋ Zezu anah sit gewleɗ nan na, kədawnahaŋ na ndəni Messiya ɓa.

Zezu arbanək əmta nan də wəsilya nani

(Markus 8.31—9.1 / Luka 9.22-27)

21Yaŋ daga pay nani Zezu atəŋ wəpel sit gewleɗ nan məza məɗamma ɓa, amna: Aslək ndaw gən a Zerusalem, ɗii na dələv dit milyeŋge məs dəlveŋge məsənaŋ zəga na ma henziŋ wazəm guwən saha daka, wabaywəni, amma pay ma hoko'o wanəsil səki əmta. 22Piyer akdahanək katər gəni, apelsənka, amna: Kay nawa dənah di, Ɗəfdaya, Maŋgəlva wataka. Zev wən nas agəɗ na zok kpak ɓa. 23Amma Zezu akpaŋganək harani, apsən Piyer na: Dok səzawa, əstə Satan əstatə kayan nəsbər gən adəv mambray vi wəɗum nok tay vana Maŋgəlva ɓa, amma venet ɗiiyi. 24Yaŋ Zezu anah sit gewleɗ nan na: Ɗəffan dəŋgəl wəsbawa say dəppan wəɗumsən kini, dəslan gən məzliwrihe nani dəsbaw gəni. 25Vi ko naway dəŋgəl wəkoh gən zeŋgilleni, wazani. Amma ɗəffan dəzan zeŋgillen viwa warəha. 26An ɗəf arəhək zəga na duniya pak amma azanək zeŋgilleni, madaw tərsən di? Tay ɓa sam. Ko zəga tay ɗəf nan adapsən na man zeŋgillen ɓa. 27Wətən Ɗəf* wade dəgakdak na Affəni, dit maslayɗe nani, wafaɗsən ko nawa pak va wəza nan adaɗɗa. 28Gesiŋ nədawnah sukum, ɗii meɓɓet suwalaŋkum amtaŋ na ɓa, say an awlanənək wəzo na Wətən Ɗəffa də məlĩ nani.

Zur Zeit ausgewählt:

Matiye 16: GDRNT85

Markierung

Kopieren