Matiye 14

Wəmta na Zaŋ məgəɗ baptem

(Markus 6.14-29 / Luka 3.19-20; 9.7-9)

1Yaŋ pay nani, Herodə məlĩ na Galile apprəm wənna Zezu. 2Anah sit ɗii nan na: Zaŋ məgəɗ baptem naki, dəsil səka wəmta, vi ni asan də sembe naɗɗa sokeneɗi.

3Herodə aɗiyək wənnani dərmanən gən Zaŋ. Aɓurukunko, asganənək a daŋgay Herodə aɗɗa vas na vi wənnat Herodiya guluk na Filip məlmən Herodə vani agəmtək ka guluk nani. 4Amma Zaŋ anahsənəka: Tay law kəgəmtə gən Herodiya ɓa. 5Herodə aŋgəl kawbay Zaŋ kəta, amma geslne adak viyit Yahudiyenɗe, vi tahəŋ ulanən Zaŋ va məs kleŋ.

6Yaŋ təla mə uwa Herodə agapə, wətət Herodiya tədeke təskələk abet ɗiiyen məyet dəpaska. Annekək zə Herodə diiɗa. 7Asuway sətəka ko mi kəssoh pak wanəpsuko. 8Waŋ təssohonək mat mata, yaŋ təssohon Herodə apsu ki Zaŋ məgəɗ baptem adəv hiluwe. 9As dənek zə məlĩ ɓa, amma vi wəsway asuway abet ɗii pakəŋka, aɗiyək wənnani dəpsətəŋ gən an təssohu. 10Aslənək ɗəffa, əda taw ki Zaŋ məgəɗ baptem sə daŋgay. 11Akiyək kiyən van adəv hiluwe apsətək waŋ nakə, təkasətək mata. 12Gewleɗ na Zaŋ azoŋko, agəmənək gəbay nani, andək nənka. Yaŋ adoŋ, anahsənən Zezu an məs dəgəɗə.

Zezu azəm gitik ɗii uzinere sle

(Markus 6.30-44 / Luka 9.10-17 / Zaŋ 6.1-14)

13Adan Zezu apprəm halabara namta na Zaŋ, asilik səkəti nani, ambatək də bəlay, vi kawmbat awra katər gəni. Ɗii apprəmnənka, agulyoŋguk suwalaŋ gəla neti, asbanənək də tilti. 14Adan Zezu agil sədəv bəlay, awlek ɗii diiɗa, awələk saha aketi, ambəl gitik məs gbəgbaɗe suwaleŋti.

15Adan moskoy agəɗə, gewleɗ na Zezu azoŋko zani, apsənən na: Kakaŋka dəfɗi, aŋ bo awra mənani. Ɗəɗaah apsit tive sit ɗiiyeŋ dəmbataŋ kla ma gəla. Məmeɗeŋɗe, dərəhaŋ gən wəlbəh zəga nawzəma. 16Zezu amna: Dəslə dəmbataŋ gən ɓa, munokum kpakə, məpsit zəga nawzəma. 17Amma apsənən na: Zəga taya vam ɓa, say dupeŋɗe sle gəm kilif sula kaaka'ə. 18Zezu anah sit na: Məkki suwaŋka. 19Yaŋ aɗi wənnan sit ɗii dəsoŋ gən aka kevile. Nan agimik dupeŋɗe sle neki gəm kilif sula, aziyək haran a disiŋ, agəɗək soko sən Maŋgəlva. Arɗetike, apsitik gewleɗi dəpsitin gən ɗiiyi. 20Ndəɗaŋ pak azəmaŋka, abaŋka. Gewleɗ akkaletinik, an dəplaŋ, aknəhək kekelɗe klaw kiyit sula. 21Wəŋɗa net ɗiiyen mezeŋgilleket di zimin dupeŋɗe waɗɗaŋ aza uzinere sle mənɗeti gil dit kirin ɓa.

Va Zezu adaw aket iŋkile a pe'e

(Markus 6.45-52 / Zaŋ 6.15-21)

22Dərɓagan ləŋgə, Zezu adewliyək gewleɗ nan dətoŋgoŋ gən adəv bəlay, vi dəmbataŋ gən dabəŋ kiyən dəgarki mabusgum dədaka, pay apsit tive sit ɗiiyi. 23Adan apsit tive, apaŋka aka mosorgo ndən katər gəni vi kawzuliya. Ha giɗe dəfɗa, taya dak katər gəni. 24Bəlay faraɗay diiɗa də ma busgum, gewleɗ almaŋgək dit barkataŋ tahəŋ wəɓletini. 25Daga təki dəɓəl wədaŋ tagay ɓa, Zezu ambatək azet gewleɗ nani, tay dawa ket iŋkile. 26Adan gewleɗ awlanəni, geslne ermeke, aɓɗaŋ na: Tuyayi, anzlaŋgək vamvəlla vi geslne. 27Zezu apel sitik go'ləŋge, amna: Məsok makrokum əntə, kədaw geslne'eŋ ɓa. 28Piyer apelsənəka, amna: Aw Ɗəfdaya, an əstə na, anah su ndaw gən azok dəket iŋkile tamə. 29Zezu apsən na: Ade.

Piyer agilik sədəv bəlay, ateŋgək wədaw aket iŋkile vi kawgap aza Zezu. 30Amma adan awla barkataŋ, geslne armaka, atəŋgək wətəppa, a ngəzlək vamvəlla: Aw Ɗəfdaya akoh guwa. 31Zezu atələk van go'ləŋgə, armaka, apsən na: Awlan kana, wətaf nok tay diiɗa ɓa, vi mi kuɗum na kuzuŋ di?

32Adan aguloŋ sulegit pak adəv bəlay, barkataŋ aɓətaŋka. 33Yaŋ gewleɗ meɓɓet nadəv bəlay agdukunuk takpret aba Zezu, aɓɗaŋ na: Gesiŋgi kpakə Wətən Maŋgəlva* kənani.

Zezu ambəl gitik məs gbəgbaɗe a Genezaret

(Markus 6.53-56)

34Səza agaraŋ ki pe'e, agapaŋka aka dələv na Genezaret. 35Ɗii naka dələv nan asənənək Zezu, akanənək halabara nan ko aŋga pak aka dələv neti, akisininik məs gbəgbaɗe. 36Akkamanənka dəpeti gən dərəŋ gənən gən ko maŋgava lukut nan dayday, en məs dərəŋ gənən pak ambəlaŋka.

Zur Zeit ausgewählt:

Matiye 14: GDRNT85

Markierung

Kopieren