San Mateo 24
24
Jesusi uandantasti eska tiósïo xerenhantaaka
(Mc 13.1-2; Lc 21.5-6)
1Jesusi tiósïo uéntaspti ka enga níntani jápkia, jurhengorheri jémbechaksï andarheraspti, ka tiósïo anapu k'érati k'umanchekuechanksï exeraaspti. 2Ka Jesusi arhiaspti: “¿Exexakijtsï iámendu íni ambe? Sési jimboksïni arhixaka eska ixu nóma tsakapu tsïntsïkata pakaraaka.”
Na enga jánhaskorheaka enga parhakpeni k'amakurhini jámaakia
(Mc 13.3-23; Lc 21.7-24; 17.22-24)
3Enga Jesusi Olibusï juátarhu uaxakatini jápka, jurhengorheri jémbechaksï andarheraspti enga ima jandioterku jápkia ka arhisptiksï: “Arhijtsïni, ¿Na jatini úkorhea i ambe, ka ambe xarharaa jiájkani engari junguaka ka enga parhakpeni k'amakurhiaka?”
4Ka Jesusi arhiantaaspti: “Jinguntku ja je, ásïksïni nema tandojche, 5jimbokaksï uánekua jucheti jakangurhikua jimbo uandapuaka: ‘Jísïni Krístueka’ ka uánekuaksï tandosï úandauati. 6Kurhauakajtsï eska uarhiperata ambe jarhaska ka eska uarhiperanhaaka, k'óru ásï jáma je chéni, jimboka k'uanisïnga eska ísï úkorheaka, ka nótki parhakpeni k'amakurhikuesti. 7Iretechaksï uarhiperaati ka ístu juramukuecha, ka k'arhimakua ambe nitamanchanhaati ka uápuru isï jencheati. 8K'óru uénakuajkuesti enga kómu nitamakorhenhaaka.”
9“Jiájkantsï cha k'ataperakuarhu pánhaaka ka juramuticha jinguntsï pánhani, ka jíndeni jimbojtsï kuikirhenhaaka ka kurhunhenhantsï. 10Uánekuajtsï imani jurhiatekua nóteru mintsikaati ka tandojchperaatiksï ka kurhunhperanksï. 11Uánekuaksï diósïri uandari eratakorhericha juuati ka uánekuaksï tandosï úauati. 12Ka jukari nósesi jánhaskorheati enga jimbo nóteru xénhchperanhaaka. 13K'óru ima engarini k'amarhuni jamberi mintsikaaka, p'ímutannhantaati. 14Ka ma parhakpeni arhijtsïkperanhaati i irechekueri jimbanhe aiangperakua, ka iámendu iretechaksï kurhauati ka jiájkaniuatia enga iámendu ambe k'amakurhiaka.”
15“Ísï jimbo, na engajtsï jatini exeaka tiósïo pimbinhandu, diósï kua nósesi jásï ma péranhani, enga Diósïri uandari Danieli uandaka: ‘Ima enga arhintajka, kurhangue,’ 16ka ima engaksï Judea isï jámani jauaka, juátecharhuksï niue sïpakorheni. 17Ima enga taiajtsïtakatarhu jauaka, ásï jáme kétsentani ambe petakorheni. 18Ka ima enga tarhetarhu jámani jauaka, ásï k'uanhatsente chereparhakuani p'itsïkorhentani. 19K'óru ¡Áke ima uarhiticha engaksï charhakuni erokorheni jauaka, ka ima uarhiticha engaksï ima jurhiatekuechani sapichani etsukua íntsaani jauaka!” 20“Kómarhijpekorhe je eskajtsï no sábadu sïpakorheni jámani jauaka, o jiájkani enga iéstani jarhajka. 21Jimboka kánekua nósesi nitamanchakorhenhaaka enga nómeni xánhaskorhepka jiájkani uératini enga parhakpenika ka iásï jamberi, ka nóteru méni xánhaskorheati. 22Engaksï ima jurhiatekuecha no sántku ióxeranhapiringa, nónema úpirindi uarhikuani uéjkuni: K'óru erakukatechani jimbo námuntku jurhiatekueuatiksï.”
23“Ekaksïni nema jiájkani arhiaka: Exe Krístu ixu jarhasti, o eraa aniani jarhasti, ásï jakajkuku je, 24jimbokaksï juuaka Krístu eratakorhericha ka diósïri uandari eratakorhericha, ka k'érati míndechanksï úauati, ka k'éri exekua ambe jimboksï tandosï újpeati, ka engaksï úska, erakukatechanksï jamberi tandosï úantauati. 25Arhispkaksïnia: 26Ísï jimbo ekaksïni nema arhiska: ‘Exe jima jarhasti enga nónema irekaka,’ óksïni arhini eska ani irekaska, ásï uéra je ka ásï jáma je jakajkuni. 27Jimboka ísï eska piritakua na iápuru isï eranchekorhejka, xánhaskorheati enga Acheti Uájpa junguaka. 28Nani uéjki enga uarhiri jántajka, k'uákichaksï jima tángorheati.”
Acheti Uájpa k'uanhatsentaati
(Mc 13.24-37; Lc 17.26-30,34-35; 21.25-33)
29“Ka engaksï na nitamaakia ima jurhiatekuecha enga xáni nósesi jánhaskorheaka:
‘Tata jurhiata pájpakaxeati,
ka nana kutsï nóteru merenharhiati,
ka jóskuechaksï uekorhentaati,
ka auandarhu anapu uinhapekuechaksï xamatanhaati.’
30Jiájkani Acheti Uájperi mínda auandarhu xarhancheati, ka iámendu iretechaksï parhakpeni anapuecha p'amondakorheati, engaksï Acheti uájpani exeaka xúmurhu ísï kánekua uinhapekua ka t'íntskua jinguni junguani jarhani. 31Ima axauati imeri ánjelichani eskaksï uinhamu p'uninhaaka kústani, ka ánjelichaksï ma parhakpeni iámendu erakukatechani tánantauati.”
32“Jígusïni exe je ka jurhengorhe je, enga tsikixkurhintatini jarhajka, jánhaskasïngajtsï eska emenda janonguani jarhasïngia. 33Májkueni, engajtsï cha iámendu íni ambe exeaka, mítetini ja je eska Acheti Uájpa janonguaxakaia. 34Sési jimboksïni arhixaka eskaksï iásï anapuecha irekani jauakateru enga i ambe úkorheaka. 35Auanda ka echeri úatiksï k'amakurhini, k'óru jucheti uandakuechaksï nómeni k'amakurhiati.”
36“K'óru nónema mítesti ambe jurhia ka na jandu, níksï auandarhu anapu ánjelicha míte, jucheti Tátejkusï míteti.”
37“Jiájkani enga Acheti uájpa junguaka, xánhaskorhesti eska imani jurhiatekuechani enga Noépka. 38Jimboka jiájkani enga nótki iurhentpempka, t'irenhaxapka ka kauinhani jarhani ka tembuchanhani ka tembuchatperanhani janhani, enga jamberi Noe k'éri icharhutarhu jatapka. 39Ka nóksï jánhaskaspti eka jamberi iurhentpepka ka iámu uarhimenhaspti. Xánhaskorheati enga Acheti uájpa k'uanhatsentaaka. 40Engaksï tsimani juátarhu jámani jauaka: Ma p'íkunhaati ka máteru jurajkunhani. 41Tsimani uarhitichaksï urhuni jauati, ma p'íkunhaati ka máteru jima jurajkunhani.”
42“Jinguntku ja je jimbokajtsï no míteska chári Táte na jándu junguaa. 43Ka íni ambe mítetini ja je, eka tata ma enga k'umanchekuani jatsikorheka mítepiringa ambe jándusï inchantspiri niáraa, jinguntku japirindi ka no jurajkupirindi inchani. 44Ísï jimbo chájtu jingutku ja je, jimboka Acheti Uájpa ima jándu junguaka engajtsï cha méntku no erontani jauaka.”
Jántspiri mintsinharhikua ka jántspiri enga no mintsinharhikueka
(Lc 12.41-48)
45“¿Nákiski ima jántspiri mintsinharhikua ka míakua jukari, enga imeri ánchetpiri arhijka eska imecho anapuechani exeani jauaka ka eska t'irerauaka na enga jándu t'irekuejka? 46Tsípe ima jántspiri enga ánchetpiri jémba niántaaka, ka jántspirini xéntani úni jarhani ambe enga úraka. 47Sési jimboksïni arhixaka eska ima tata enga k'umanchekuani jatsikorheka, iámu imeri jatsikorhekuani imani patsaraaka. 48K'óru eka jántspiri no ambakeaka ka jandiojku jatini uandakorheni, ixu ióndaati janonguanhani, 49ka uénani máteru jántspirichani ataani káani ka jukari t'ireni ka kauichechani jinguni kauini. 50Ima jurhiatekua enga ima méntku no sáni eranhaskani jaka niánhantaati, 51ka nósesi kámaati, ka no kurhandirechani jinguni kundaati; jimasï ueraati ka sînichani kirisïmeantaani.”
Valgt i Øjeblikket:
San Mateo 24: DKPJ
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Biblia en P´urhépecha, Michoacán, México © Sociedad Bíblica de México, A.C.
