San Mateo 23
23
Jesusi fariseuechani ka juramukua jurhentpirichani arhinharhikuasti
(Mc 12.38-40; Lc 11.37-54; 20.45-47)
1Jesusi arhijpespti ka jurhengorherichantu arhiaspti: 2“Juramukua jurhentpirichaksï ka fariseuechaksï Moisesiri juramukua jimbo jurhentpesïndi. 3Ísï jimbo, ambe engaksïni xáni ima arhistacheaka, kurha je ka marhuata je; k'óru ásï ísï jáma je eskaksï ima na jámka, jimbokaksï ima arhistatspesïnga néna jámani ka imaksï no ísï jámasïndi. 4Ts'unhapekua ambeksï arhistatspesïndi enga úkua jukajka úni, ka k'óruksï ima, ni munchujkurhakua ma manatki. 5Mámaru ambeksï úsïndi xarharakuekani, Diósïri karakatechanksï sánderu kóstarakata jóngorhekuecharhu karanharhikuasïndi, ka jóxurhantaasïndiksï ka jóntsïntaani; 6tsitisïndiksï k'érikuarhu uaxakani t'irekuecharhu ka k'umanchekua tángorhentskuecharhu. 7Ka eskaksï xanhari jimbo sési uandajpanhaaka, ka eskaksï: Tata jurhentpiri, arhiauaka.”
8“Cha ásï uéka je eskaksïni: Jurhentpiri, arhiaka, jimbokajtsï cha márkueska, chári jurhentpiri májkuesti. 9Ka parhakpeni ásï nemani: Tate, arhi je; jimboka májkueska Táte enga auandarhu jaka. 10Ka ásï uéke je eskaksïni: Urhejtsïkuri, arhiaka. Jimboka Krístujkusï chári urhejtsïkurika. 11Ima enga chánksïni jinguni sánderu k'érika, jatsisti máteruechani marhuakuani. 12Jimboka ne enga k'éramakorheaka, ísku nemeni xénhaati, ka ima enga kétsekua uérajka, k'éri xénhaati.”
13“K'óru ¡Áke cha, juramukua jurhentpiricha ka fariseuecha, ískujtsï ísï uandasïnga! Auandarhu anapu irechekuarhujtsï míkatspesïnga, nójtsï inchasïnga ka níjtujtsï jiáretpejki eskaksï máteruecha inchaaka, engaksï inchakuekani jaka. 14¡Áke cha, juramukua jurhentpiricha ka fariseuecha ísku ísï uandaricha! ¡Jimbokajtsï uarhiti tsîndio k'amantskantasïnga, ka nónentantsï ióskutantasïnga uandatsekorheni, inde jimbojtsï cha sánderu kánekua k'amanharhiranhantaaka!”
15“¡Áke cha, juramukua jurhentpiricha ka fariseuecha, ísku ísï uandaricha! Jimbokajtsï iápuru isï jurhengorherini ma jirinhakorheni jámasïnga, ka engaksï xéntajka imechantsï sánderu chpírirhu k'uanijpasïnga.”
16“¡Áke cha, urhepatspiri pátenharhicha! Uandasïngajtsï eska nómbe ma jauaka eka nema tiósïo jimbo aiakorheni jámaaka, k'óru enga nema tiripiti tiósïo anapu jimbo aiakorhejka, aiatspetixatiia. 17¡Chájtsï no míakua jukaska ka nójtujtsï jánhaskasïnga! ¿Andi ambe sánderu jukaparhakueski? ¿Tiripiti, o tiósïo enga tiripitini ujchakuraajka? 18Ka ístujtsï cha uandasïnga: ‘Nómbema jarhasïndi eka nema kéjtsïtatarakua jimbo ambe aiakorheska, k'óru aiatspetixatiia, ne enga kéjtsïtakua jimbo ambe aiakorheska.’ 19¡Inchandimecha ka no kurhandirecha! ¿Andi ambe sánderu jukaparhakueski, parhandikua o kéjtsïtatarakua? ¿Andi ambesï újchakurajki parhandikuani? 20Ima enga kéjtsïtatarakuani jimbo ambe aiakorhejka, imani jimbosï uinhaperani jati, ka iámendu ambe jimbo enga jima kéjtsïtakata jaka. 21Ka ne enga tiósïo jimbo aiakorhejka, imani jimbo aiakorhexati, ka ístu Diósïni jimbo enga jima irekaka; 22ka ima enga auandani jimbo ambe aiakorhejka, Diósïri k'éri uaxantskua jimbo, ka Diósïni jimbo aiakorhexati.”
23“¡Áke cha, juramukua jurhentpiricha ka fariseuecha ísku ísï uandaricha! Engajtsï kuatsitesïni ka putsutini ka kulanduni arhutajka tiósïo íntspeni. Ka juramukuarhu anapu ambeni, imani enga sánderu jukaparhakueka mirikurhisïngajtsï úni: Sési p'ikuarhenhetpentani ka p'amojpeni ka Diósïni mintsikani. Íni ambesï k'uanijti úni ka máteru ambejtu no jurajkuaparini. 24¡Pátenharhichantsï urhekupaasïnga, sïpimuntsï t'úatantasïnga ka kameiuntsï kunajkani!”
25“¡Áke cha, juramukua jurhentpiricha ka fariseuecha ísku ísï uandaricha! Jimbokajtsï tsúntsuni ka urhanichani ambe kutsuparhakuantasïnga, ka chájtsï uininhetixaka sïpatspekua ambe, ka ambe enga no jurhimbekueka. 26¡Fariseo pátenharhi, tsúntsuni ka urhanini jinirisï jupanhantaaka ka iámu sési jáxentaati!”
27“¡Áke cha, juramukua jurhentpiricha ka fariseuecha ískujtsï ísï uandasïnga! Jimbokajtsï uarhiri jántskua urapitini járhaska, engaksï tájtsïkuni sési xarharani jarhajka, ka inchatsetini úni tereri ka karhasï ambe jarhani. 28Xárhaskajtsï: Kaxumbitintsï xarharasïnga, ka k'órujtsï chkuándirakua ka ikiata ambe uininhetixaka.”
29“¡Áke cha, juramukua jurhentpiricha ísku ísï uandaricha! Jimbokajtsï eratakua úkuantasïnga Diósïri uandarichani jima engaksï jatsinhantka, ka kaxumbiticheri eratakuechantsï kasïperantaasïnga, 30ka uandasïngajtsï: ‘Ekachi imani jurhiatekua irekapiringa engaksï juchari tátepka, nóchi jarhojpepiringa uándikuani Diósïri uandarichani.’ 31Íni jimbojtsï uandakorhentaxaka eskajtsï ima uájpeska engaksï Diósïri uandarichani uándikuaka. 32¡Cháchka k'amarhuta jeia, ambe engaksï chári tátecha uénaka!
33¡Akuitsecha, akuitseni járhaticha! ¿Andi chpírintsï néna sïpakorhekua?”
34“Jíksïni axacheauaka Diósïri uandarichani ka mímixetichani ka juramukua jurhentpirichani, ka chájtsï máru uándikuauaka, ójtsï krúsirhu cháparhataani, ka máteruechantsï chári k'umanchekua tángorhentskuecharhu k'uikirheauaka, ka máteruechantsï iretecharhu isï andanguani káuaka ataani. 35Ísï jimbo, chánksïni niáchentaati erakukatecheri iurhiri enga iurheka, Abeli kaxumbitiri uénani ka Sakariasi Berekiasi uájperi, engajtsï tiósïo ekuarhu ka jima enga kéjtsïtakua jaka uándikuka. 36Sési jimboksïni arhisïnga eska i ambe iásï anapuechaksï maiampetaranhantaaka.”
Jesusi Jerusaleni jimbo ueraxati
(Lc 13.34-35)
37“¡Jerusaleni, Jerusaleni engari Diósïri uandarichani uándikuajka ka tsakapkueraandi imechani engari axamenhajka! Namoni xanhari uékaspki chéti uátsïchani márkuerantaani, eska tsíkata na márkuerantaaka kereskuarhu pipichu sapinharhichani, k'óruri no uékaska 38Chénio pínandentaati. 39Arhixakaksïni ekajtsïni iásï uératini jíndeni nóteru exeaka ekajtsï jamberi uandaaka: ‘Újchakurakatesti ima enga Achani jimbo jurhani jaka.’”
Valgt i Øjeblikket:
San Mateo 23: DKPJ
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Biblia en P´urhépecha, Michoacán, México © Sociedad Bíblica de México, A.C.
