PIANCILNA 11
11
Babel Tausangpi
1Tua laitakin leitung buppi in kampau khat le kammal tawmno bek nei hi. 2Amaute nisuahna lamah lal uh a, Shinar gam sungah zanglei mun khat mu-in tua lai ah a teeng uh hi. 3Amaute khatlekhat kiangah, “Hong pai un, leiseek seekin limtakin hal ni,” kici uh hi. Amaute in suang dingin leiseek nei uh a, a buan dingin kultal tui nei uh hi. 4Tua ciangin amaute in, “Hong pai un, leitung buppi ah eite i kithehthang gawp loh nadingin ei adingin khuapi khat bawlin, a dawn in vantung a ban ding tausang khat lamin, eiteʼ minthan nading khat bawl ni,” ci uh hi.
5Tua ciangin mihingteʼ lam sa khuapi le tausangpi a en dingin Topa hong pai suk hi. 6Topa in, “En un, amaute minam khat hi uh a, amaute khempeuh in kampau khat nei uh hi. Hih pen amauʼ sep ding a kipatna bek ahi hi. Tu-in sep dinga amauʼ vaihawmte amau adingin hi thei nawn lo ding hi. 7Hong pai un, amau thugen khatlekhat a kitheih loh nadingun eite pai sukin amauʼ kampau va kitukalhsak ni,” a ci hi. 8Tua ahih ciangin Topa in tua lai panin leitung khempeuh ah amaute thehthang a, a khuapi bawl uh a tawp uh hi. 9Tua ahih ciangin a min Babel kici hi. Bang hang hiam cih leh Topa in tua munah leitung khempeuhʼ kampau kitukalhsak hi. Tua lai mun panin Topa in leitung khempeuh ah amaute a thehthang hi.
Shemʼ Suanlekhakte
(1Khang 1:24-27)
10Hihte pen Shemʼ suanlekhakte ahi hi. Shem kum za khat a phak, tuiciin tun khit kum nih ciangin, amah in Arpakshad kici tapa khat nei hi. 11Arpakshad a suah khit ciangin Shem kum za khat nungta lai a, tanu le tapa dang nei lai hi.
12Arpakshad kum sawm thum le kum nga a phak khit ciangin, amah in Shelah kici tapa khat nei hi. 13Shelah a suah khit ciangin Arpakshad kum za li le kum sawm thum nungta lai a, tanu le tapa dang nei lai hi.
14Shelah kum sawm thum a phak khit ciangin Eber kici tapa khat nei hi. 15Eberʼ suah khit ciangin Shelah kum za li le kum sawm thum nungta lai a, tanu le tapa dang nei lai hi.
16Eber kum sawm thum le kum li a phak khit ciangin amah in Peleg kici tapa khat nei hi. 17Peleg a suah khit ciangin Eber kum za li le kum sawm thum nungta lai a, tanu le tapa dang nei lai hi.
18Peleg kum sawm thum a phak khit ciangin amah in Reu kici tapa khat nei hi. 19Reu a suah khit ciangin Peleg kum za nih le kum kua nungta lai a, tanu le tapa dang nei lai hi.
20Reu kum sawm thum le nih a phak khit ciangin amah in Serug kici tapa khat nei hi. 21Serug a suah khit ciangin Reu kum za nih le kum sagih nungta lai a, tanu le tapa dang nei lai hi.
22Serug kum sawm thum a phak khit ciangin amah in Nahor kici tapa khat nei hi. 23Nahor a suah khit ciangin Serug kum za nih nungta lai a, tanu le tapa dang nei lai hi.
24Nahor kum sawm nih le kua a phak khit ciangin amah in Terah kici tapa khat nei hi. 25Terah a suah khit ciangin Nahor kum za le kum sawm le kum kua nungta lai a, tanu le tapa dang nei lai hi.
26Terah kum sawm sagih a phak khit ciangin amah in Abram, Nahor le Haran a nei hi.
Terahʼ Suanlekhakte
27Tu-in Terahʼ suanlekhakte hih bang ahi hi. Terah pen Abram, Nahor le Haranʼ pa hi a, Haran pen Lotʼ pa ahi hi. 28Ama pa Terah a sih ma-in ama suahna gam ahi, Khaldea gam Ur khua ah Haran si hi. 29Abram le Nahor in zi nei uh hi. Abramʼ zi min Sarai hi a, Nahorʼ zi min Milkah hi a, Milkah pen Iskahʼ pa Haranʼ tanu ahi hi. 30Tu-in Sarai ciing a, ta nei lo hi.
31Terah in ama tapa Abram le Haranʼ tapa, ama tupa ahi Lot le a tapa Abramʼ zi ahi a monu Sarai samin, Kanaan gam sungah a pai dingin Khaldea gam Ur khua panin amaute a paikhia khawm uh hi. Ahi zongin amaute Haran a tun uh ciangin tua munah a teeng uh hi. 32Terahʼ khan sung kum za nih le kum nga hi a, Haran ah Terah a si hi.
Valgt i Øjeblikket:
PIANCILNA 11: TBR17
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Tedim Bible © Bible Society of Myanmar, 2017.