Svun Lucas 15
15
Lo'il scuenta jch'ayel chij
(Mt 18.10-14)
1Scotol ti jc'an-loc'-c'usiticuque xchi'uc ti much'utic más chopol c'usitic tspasique, inopoj ech'el ya'iic ti c'usitic chal ti Jesuse. 2Ti jfariseoetique xchi'uc ti much'utic ta xchanubtasvanic ta smantaltac Rioxe, chopol iyilic, ja' yech iyalic chac li'i:
―Li vinic le'e ta xchi'in li much'utic chopol c'usitic tspasique, ta xchi'in ta ve'el noxtoc ―xiic.
3Yech'o un, ti Jesuse iyal jun lo'il chac li'i: 4«¿Mi oy much'u junucal li vo'oxuque ti oy cien xchije, mi ich'ay jcotuque, mi mu lamaluc chicta comel ta stentejtic li noventa y nuevee ti chba sa' tal li jcot ch'ayeme? 5Ti c'alal stae xmuyubaj xa, ta scajan tal ta snequeb, 6ti c'alal xul ta snae, ta stsob scotol li much'utic lec sc'opon sba xchi'uque xchi'uc li slac'nataque, ja' yech chalbe chac li'i: “Co'oluc junuc co'ontic yu'un ijta xa li jchij ti ch'ayem to'ox cu'une.” Chut. 7Chacalbe ava'iic ti ja' no'ox yech toj jun yo'onic tey ta vinajel ti c'alal tsutes yo'on jun jmulavile, ja' mu sta yech xmuyubajic o ta scuenta li noventa y nueve ti lec xa yo'onique, yu'un mu xa persauc ta sutes yo'onic.
Lo'il scuenta taq'uin ti ich'aye
8»Caltic no'ox ya'el ti oy jun ants ti oy lajunsep staq'uine, mi ich'ay jsepuque, ¿mi mu stsan slámpara, ta smes li yut snae yo'to c'u cha'al mi istae? 9Ti c'alal stae, ta stsob li much'utic lec sc'opone xchi'uc li slac'nataque, ja' yech chalbe chac li'i: “Co'oluc junuc co'ontic yu'un ijta xa li jsep jtaq'uin ti ich'aye.” Chut. 10Ja' no'ox yech jun yo'onic li yaj-angeltac ti Rioxe ti c'alal tsutes yo'on jun jmulavile.» ―X'utatic yu'un ti Jesuse.
Lo'il scuenta jun crem ti iyixtalan ti c'usitic i'ac'bat yu'un ti stote
11Ti Jesuse iyal jun lo'il noxtoc: «Oy jun vinic, oy cha'vo' scremotic, 12Ti its'inale ja' yech iyalbe ti stot chac li'i: “Tot, ac'bon xa ta ora li erensia ti c'u yepal chavac'bone.” Xut. Li totile ixch'acbe xcha'va'alic. 13Ti c'alal ilaj xa'ox jayib c'ac'ale, li its'inale istsob scotol ti c'usitic i'ac'bate, ti c'alal laj stsobe, ja'o ibat ta nom, tey ba yixtalan ti c'usitic i'ac'bate, ispas ti c'usi no'ox xal yo'on stuque. 14Ti c'alal ilaj yixtalan scotol li c'usuc yu'une, ja'o i'ech' vi'nal yo' bu bateme, iya'i vi'nal uc. 15Isa'be yabtel jun yajval jteclum, istac ech'el ta yosil, ba yac'be xchabi chitom. 16Li creme xu' xa cha'i ti tslajes li sve'el chitome yu'un muc' x'ac'bat sve'el yu'un li yajvale. 17Ts'acal to ja' yech isnop chac li'i: ¡Ta sna' ti jtote oy ep yaj'abtel, lec chve'ic lec noj xch'utic, pero li vo'one, li' chicham ta vi'nal chca'ie! 18Más lec chicha'sut ech'el ta sna ti jtote, ja' yech chc'ot calbe chac li'i: Tot, ijta xa jmul ta stojol ti Rioxe, xchi'uc ijta xa jmul ta atojol uc; 19mu xa snupin ti crem xavutone; más lec p'ison xa ta avaj'abtel.” Ta xcut c'otel, xi isnop ti creme. 20Ja yech isut ech'el ta sna stote.
»C'alal nom to'ox sc'an xc'ote, li totile nom to'ox iyil li screme, ic'uxubaj ta yo'on, anil xa ba snup ta be, ismey, isbuts'. 21“Li creme ja' yech iyalbe ti stot chac li'i: Tot, ijta xa jmul ta stojol ti Rioxe, xchi'uc ijta xa jmul ta atojol uc; mu xa snupin ti crem xavutone.” Xut. 22Pero ti totile ja yech iyalbe ti smozotac chac li'i: “Ich'ic tal ta ora li lequiquil c'u'ule ac'beic slap; xojbeic yaniyo ta sc'ob, lapbeic xonob. 23Iq'uic tal li jup'em becerroe, milic jti'tic. ¡Jpastic lec q'uin! 24Yu'un caloj ti chamem xa li jcreme, pero lavi isut tale, co'ol xchi'uc icha'cuxi ya'el; yu'un ich'ay to'ox, pero lavie ijta xa.” Xut smozotac li totile. Ja'o xa ilic li q'uine.
25»Li banquilale batem to'ox ta abtel. Ti c'alal isut tale, c'alal tey xa'ox xtal ta sts'el snae, iya'i ti xnic xa q'uine, ti oy j'ac'ote. 26Isvelu jun smozoic, isjac'be c'usi tspasic. 27Li mozoile ja' yech iyal chac li'i: “Yu'un isut xa tal lavits'ine; la tote iyal ti ac'u miluc li jup'em becerroe, ja' ti lec isut tal lavits'ine.” Xut. 28Ti c'alal iya'i li banquilale icap o tajmec, mu xa sc'an x'och ta sna, li stote loc' xch'ul c'opon, iyalbe ti ac'u ochuque. 29Li banquilale xi lic yalbe li stote: “Li vo'ote ana'oj lec sjayibal xa jabil li' chitun avu'une, muc'bu jp'ajoj amantal, pero mi ja'uc jcot chivo muc' bu avac'ojbon jti' ti ta jpas o q'uin xchi'uc ti much'utic lec jc'opon jba jchi'uque. 30Lavi iyul xa li jun acreme ti ay yixtalan ta antsetic lataq'uine, ja' xa mu smilbeluc avu'un ta ora li jup'em becerroe.” Xut li stote. 31»Li totile istac'be li screme: “Crem, li vo'ote li'ot onoxe, scotol li c'usitic oy cu'une ja' avu'un. 32Más lec ti ta jpastic q'uine, junuc co'ontic yu'un lavits'ine icha'cuxi xa ya'el, yu'un chamem xa ti caloje; yu'un ich'ay to'ox, pero lavie ijta xa.”» Xut li screme ―x'utatic yu'un ti Jesuse.
Valgt i Øjeblikket:
Svun Lucas 15: LeqAC
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© Sociedad Biblica de Mexico AC
