Svun Lucas 14
14
Ja' li' yaloj ti iyet'esbe situbel jun vinic ti Jesuse
1Ti c'alal ja o sc'ac'alil ta xcuxique, i'iq'ue ech'el ta ve'el yu'un jun totil fariseo ti Jesuse, li yan xchi'iltac ta fariseoale tey chpa'ivanic. 2Ja'o tey va'al jun vinic ta stuq'uil ti Jesuse, liquem situbel. 3Ti Jesuse isjac'be ti much'utic ta xchanubtasvanic ta smantaltac Rioxe xchi'uc li jfariseoetique:
—¿Mi xu' chich' et'esbel xchamel ta sc'ac'alil ta jcuxtic ti much'u ipe, o mi mu xu'? ―Xi. 4Mi jun muc' xtac'avic. Ti Jesuse iyet'esbe xchamel li vinique, ja'o iyalbe ti ac'u batuque. 5Ti Jesuse ja' yech iyalbe ti jfariseoetic chac li'i:
—¿Mi oy junuc li vo'oxuque, mi screm o mi svacax ti chp'aj ta pozo ta sc'ac'alil ta jcuxtique ti mu xba sloq'ues ta orae? ―X'utatic yu'un ti Jesuse.
6Mu xa sna' c'uxi chtac'avic ta jmoj.
Ja' li' yaloj ti c'u x'elan ti much'utic ic'bilic ta nupunele
7Ti Jesuse, c'alal iyil c'u x'elan tst'uj lec xchotlebic ti much'utic i'iq'ueic ta ve'ele, ja' yech lic yal o jun lo'il chac li'i:
8Ti c'alal oy much'u chayiq'uic ta nupunele, mu me xba chotlanic ta bail, naca me oy much'utic ic'bilic tal ti más ich'bilic ta muc' chac c'u cha'al li vo'oxuque. 9Ti c'alal tey xa'ox chotoloxuque ja'o ta xtal ti much'u layiq'uique xchi'uc ti much'u más ich'bilic ta muq'ue, chtal yalboxuc chac li'i: “Loc'an li'toe yu'un li' ta xchoti li jun li'i.” Chayutic. Ja'o xaq'uexavic xa loq'uel, chba chotlanic ta slajeb chotlebal. 10Ti c'usi tsc'an chapasic mi oy la iq'ueic ta ve'ele, chotlanic ta slajeb chotlebal, ja'uc to ti mi ital ti much'u layiq'uic ta ve'ele, mi ja' yech layalbeic chac li'i: “Li vo'ote la' chotlan li' ta baile.” Mi xayutique, ja' yech ichbil ta muc' chac'ot yu'unic scotol ti much'utic tey ic'bilic uque. 11Yu'un ti much'u chac' sba ta ich'el ta muc' stuque, ta xich' aq'uel ta q'uexlal; yan ti much'u biq'uit chac' sbae, ta xich' aq'uel ta ich'el ta muc'. ―X'utatic yu'un ti Jesuse.
12Ti Jesuse, ja' yech iyalbe ti much'u i'ic'van ta ve'ele:
―Ti c'alal cha'ic'van ta ve'ele, ma'uc no'ox me xavic' li much'utic lec xac'opon aba achi'uque, ma'uc no'ox me xavic' labanquile lavits'ine, xchi'uc lanamtalchi'ile, xchi'uc lalac'natac ti jc'ulejetique; yu'un chayiq'uic ta ve'el uc, mi layiq'uique tojbil xa chcom yu'unic ti aviq'uic ta ve'ele. 13Ti c'alal cha'ic'van ta ve'ele, tsc'an chavic' noxtoc li much'utic me'one, xchi'uc li tuncoetique, xchi'uc li coxoetique, xchi'uc li ma'satetique; 14Ti mi yech chapase, toj jun avo'on. Yu'un li stuquique mu xpac yu'unic, pero li vo'ote chavich' amoton ti c'alal sta sc'ac'alil ch-cha'cuxiic ti much'utic lec yo'onique. ―X'utat yu'un ti Jesuse.
Lo'il scuenta jun vinic ti iyic' ta ve'el ep crixchanoetique
(Mt 22.1-10)
15Ti c'alal iya'iic ti c'usi iyal ti Jesuse, oy jun ti much'u tey chotol ta mexae, xi iyalbe ti Jesuse:
―¡Toj Jun yo'on ti much'u ta xve' yo' bu tspas mantal ti Rioxe! ―Xi.
16Itac'av ti Jesuse:
―Oy jun vinic iyac' ve'el, ep much'utic iyic' ta ve'el. 17Ti c'alal ista yora chve'ique, istac ech'el smozo, ba yic' tal ti much'utic yic'anoj ta ve'ele: “Batanic xa la, yu'un chapal xa li ve'lile. —Xi c'otel 18Pero scotolic iyalic ti mu c'u xutique, lic snopic ti c'uxi tspoj sbaique. Li jun ta ba'yie ja' yech iyal chac li'i: “Muc' bu xocolon yu'un ja'to ijman cosil, yech'o un persa chba jq'uel. Abulajan, albo ya'i ac'u yac'on ta pertonal.” Xi. 19Li yane ja yech iyal chac li'i: “Muc' bu xocolon yu'un ja'to ijman vo'ob par jvoc'-osil vacax, yech'o un chba jq'uel c'u x'elan ch-abtejic. Abulajan, albo ya'i ac'u yac'on ta pertonal.” Xi uc. 20Li otro june ja' yech iyal chac li' uque: “Mu c'u xcut yu'un ja'to linupun.” Xi. 21Isut li mozoile, ja' yech c'ot yalbe li yajvale ti c'u x'elan itac'bate. Li yajvale icap o tajmec, xi iyalbe li smozoe: “Batan ta anil ta ch'ivit xchi'uc ta cayetic, ja' ic'o tal li much'utic me'one, xchi'uc li tuncoetique, xchi'uc li coxoetique, xchi'uc li ma'satetique.” Xut ech'el li smozoe. 22Ti c'alal iyul tal xchi'uc crixchanoetic li mozoile, xi iyalbe li yajvale: “Cajval, ijch'un li c'usi avalbone, pero oy to xocol li chotlebale.” Xi. 23Li ajvalile xi iyalbe noxtoc li smozoe: “Batan xa ta muc'ta beetic xchi'uc ta biq'uit beetic, ic'o tal ta persa ti much'utic chatae yo' xnoj o li jnae. Xut. 24Chacalbe ava'iic, ti mi junuc ti much'utic ba'yi icalbe ti chtal ve'icuque, ti cha'iic c'usi smuil li jve'ele.” Xi li yajval ve'lile ―x'utatic yu'un ti Jesuse.
Ja' li' yaloj ti oy ep svocolal mi ta jnap'letatic ti Cristoe
(Mt 10.37-38)
25Ep tajmec crixchanoetic xchi'uc ech'el ti Jesuse. Isq'uel spat, xi iyalbee: 26«Ti much'u chtal xchi'inone, mi mu masuc sc'anojone, mi ja' más sc'anoj li stot sme'e, li yajnile, li xch'amaltaque, li sbanquiltaque, li yits'intaque, li svixtaque, li yixleltaque, xchi'uc li scuxlejal stuque, mu xu' ch-och ta cajchanc'op. 27Yan ti much'u mu sc'an scuch ech'el scruzal stuque, ti mu sc'an xi snapletaone, mu xu' ch-och ta cajchanc'op. 28Mi oy much'u junucal li vo'oxuque ti tsc'an tsmeltsan junuc q'uelob osile, ¿Mi mu ba'yiuc ch-chotan sba ta snopel c'u yepal chlaj yu'un xchi'uc mi xloc' o li staq'uine, yo' ti mu quecheluc xcom o li yabtele? 29Ti mi mu snop lec ba'yuque, mi ch-chotanbe ba'yi li stanal yoque, ti mi ts'acal to mu xva'i yu'une, ta xlabanat yu'un scotol ti much'utic ta xilique, 30ja' yech chlic yalic chac li'i: “Li vinic le'e yech no'ox ti isliques li yabtele, yu'un muc' xva'i yu'un.” Xi sc'oplal. 31Ja' no'ox yech ti c'alal chbat ta milbail jun rey chi'uc otro jun reye, ¿mi mu ba'yiuc onox ta snop mi xcuch yu'un ta lajunmil soltaro ti mi oy veinte mil yajsoltaro li scrontae? 32Mi iyil ti mu xcuch yu'une, ti c'alal nom to'ox xtal li otro jun reye, ta stac ech'el yajmantal chba yalbe ti ac'u lajuc yo'on li scrontae. 33Ja' no'ox yech mi oy much'u junucal li vo'oxuque, ti mu xu' yu'un ti tscomtsan scotol li c'usuc yu'une, mu xu' ch-och ta cajchanc'op.
Lo'il scuenta ats'am
(Mt 5.13; Mc 9.50)
34»Li ats'ame lec; pero mi ich'ay xchi'ile, ¿C'u xa xi ta xcha' chi'ub noxtoc? 35Mi ja'uc ta c'a'al balamil mu xa xtun o. Solel xa chich' taniel. Ti much'utic oy xchiquinique ac'u snopbeic smelol.» X'utatic yu'un ti Jesuse.
Valgt i Øjeblikket:
Svun Lucas 14: LeqAC
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© Sociedad Biblica de Mexico AC
