Svun Lucas 13
13
Ja' li' yaloj ti tsc'an ta xquictatic spasel li c'usitic chopole
1Ta sc'ac'alil chac taje oy much'utic ba sq'uelic ti Jesuse, iyalbeic ti c'u x'elan imileic yu'un Pilato jayvo' jgalileaetic ti c'alal ja'o xyaquet chac'beic smoton ti Rioxe.
2Itac'av ti Jesuse: «¿Mi chanopic ti stuquic xa no'ox más toj tsots smulic ti jayvo' jgalileaetic ti x'elan iyich'ic milel chavalique? 3Chacalbe ava'iic ti ma'uc yeche; ti mi mu xa sutes avo'onic ta stojoj Riox li vo'oxuc uque, ja' no'ox yech' chachamic uc. 4¿Mi chanopic ti vaxaclajunvo' (18) ichamic ti c'alal ilom ti q'uelob osil ta Siloée, ti stuquic xa no'ox más chopol stalelic chac c'u cha'al ti much'utic tey nacalic ta Jerusalene? 5Chacalbe ava'iic ti ma'uc yeche; ti mi mu xa sutes avo'onic ta stojoj Riox li vo'oxuc uque, ja' no'ox yech' chachamic uc.» ―X'utatic yu'un ti Jesuse.
Lo'il scuenta te'el ic'ux ti mu sna' satine
6Ti Jesuse iyal jun lo'il chac li'i: «Oy jun vinic sts'unoj jtec' ic'ux ta yut uvatic, ba sq'uel mi oy sat, pero ch'abal bu ista jp'ejuc. 7Ja' yech iyalbe li jchabiej uva chac li'i: “Q'uelavil, li te'el ic'ux li'i yoxibal xa jabil chul jq'uelulan mi oy sat, pero naca ch'abal sat chul jta. Más lec ts'eto loq'uel; ¿c'usi bal o, mi yech no'ox tsmac balamile?” —Xut. 8Li jchabiej balamile ja yech itac'av chac li'i: “Cajval, teyuc to lavi jabile; ta jvoc'bequic li yoque, ta xcac'bequic lec sc'a'al. 9Jq'ueltiquic mi mu satin o; mi mu satine, ja'to xavac' ta ts'etel.”» —Xi li jchabiej'uvae, xi ti Jesuse.
Ja' li' yaloj ti istuq'uibtasbe spat jun ants ti Jesuse ti c'alal ja'o sc'ac'alil ta xcuxique
10Ja'o ta sc'ac'alil ta xcuxic, ti Jesuse ja' o tey yolel ta xchanubtasvan ta jun biq'uit templo. 11Oy tey jun ants, oy xa svaxaclajunebal (18) jabil ip. Ipase ta vujpat yu'un ti pucuje, xvujvon xa chanav, mu xa stac' stuq'uibtas sba. 12Ti c'alal iyil ti Jesuse, iyic'tal, ja' yech iyalbe chac li'i:
―Ants, colemot xa ta scuenta lachamele. ―Xut.
13Ja' o iyac' sc'ob ta sba ti antse, ora ituq'uib li spate, ti antse lic yalbe slequilal syu'elal ti Rioxe. 14Ti much'u tsots yabtel tey ta temploe icap o, ja' ti iscolta jchamel ta sc'ac'alil ta xcuxic ti Jesuse, xi iyalbe ti crixchanoetique:
―Oy vaquib c'ac'al ti xu' chi'abtejotique; ja'o xatalic mi chac'anic et'esbel achamelique, ma'uc o xatalic ta sc'ac'alil ta jcuxtique ―xut ti crixchanoetique.
15Ti Cajvaltique istac'be:
Jlo'lovanejetic, li vo'oxuque, ¿mi muc'bu chajitunic ech'el avacaxic o mi aburroic chba avac'beic yuch' vo' ti c'alal ja'o ta sc'ac'alil ta jcuxtique? 16Yan li ants li'i, ti ja' smom ti Abrahame, svaxaclajunebal xa jabil chucbil yu'un ti pucuje, abol sba tajmec ta chamel, ¿mi mu stac' ya'el ti ta xich' coltael ta sc'ac'alil ta jcuxtique? ―X'utat yu'un ti Jesuse.
17Ti c'alal yech iyal ti Jesuse, iq'uexav scotol li scrontataque; pero scotol li yan crixchanoetique, xmuyubajic xa ti c'alal iyilbeic slequilal syu'elal ti Jesuse.
Ja' lo'il scuenta bec' mustisya
(Mt 13.31-32; Mc 4.30-32)
18Ti Jesuse xi iyal noxtoque: «¿C'usi xco'olaj o li cuentainel yu'un ti Rioxe, c'usi ta jco'oltas o? 19Co'ol xchi'uc bec' mustisya ti ists'un ta yosil jun vinique, C'alal ich'ie muc'ta te' ibat, ital li mutetique, ispas stso'opic ta sc'obc'obtac.» ―X'utatic yu'un ti Jesuse.
Lo'il scuenta svuquesobil xch'ut pan
(Mt 13.33)
20Ti Jesuse xi iyal noxtoque: «¿C'usi ta jco'oltas o li cuentainel yu'un ti Rioxe? 21Ja' co'ol c'u cha'al li svuquesobil xch'ut pan ti tscap ta oxp'is arina li jun antse ti chvuc o xch'ut yu'un scotole.» ―X'utatic yu'un ti Jesuse.
Ja' li' yaloj ti ja' más chucul li sbelel vinajele
(Mt 7.13-14,21-23)
22Ti c'alal yolel chanavic ech'el ta sbelel Jerusalén ti Jesuse, ichanubtasvan ech'el ta jteclumetic xchi'uc ta parajeletic ti bu i'ech ech'ele. 23Oy much'u isjac':
―Cajval, ¿mi jayvo' no'ox ya'el ti much'utic ta xcolique? ―Xi.
Itac'av ti Jesuse:
24Aq'uic persa ti cha'ochic li ta c'ox ti'nae; chacalbe ava'iic ti ep much'utic tsc'an ch-ochique, pero mu x'ochic. 25Ti mi iva'i tal li yajval nae, mi ismac li sti' snae, vo'oxuc ti teyoxuc ta panae, chatijic li ti' nae, ja' yech chavalic chac li'i: “Cajval, Cajval, jamboticotic lanae”, chavutic. Pero li yajval nae xi cha stac'beique: “Mu jna' much'uoxuc li vo'oxuque.” Chayutic. 26Yech'o un li vo'oxuque ja' yech chlic avalic chac li'i: “Lajchi'inticotic ta ve'el ta uch'vo', achanubtasoticotic ta cayeetic ta jlumalticotic.” Chavutic. 27Pero ja' yech chayalbeic chac li'i: “Lacalbeic xa ti mu jna' much'uoxuque. ¡Loc'anic ech'el ta jtojol jpasmuliletic!” Chayutic. 28Ja'o cha'oq'uic, xc'uxuxet aveic ti c'alal chavilic ti Abraame, xchi'uc ti Isaaque, xchi'uc ti Jacove, xchi'uc scotol ti yaj'alc'optac Riox ti ta más vo'nee, yu'un la albatic xa ti mu xa ochic li vo'oxuque. 29Ja' o chavilic ep jyanlum crixchanoetic liquemic tal ta loq'ueb c'ac'al xchi'uc ta maleb c'ac'al, ta norte xchi'uc ta sur, ti tey ta xchotiic ta ve'el yo' bu tspas mantal ti Rioxe. 30Yech'o un, oy jlom ti much'utic ta patil to lavie, ja' babe ch-c'otic; ti much'utic babeic to lavie, ja ta patil ch-comic —x'utatic yu'un ti Jesuse.
Ja' li' yaloj ti iyat o yo'on ti Jesuse ti muc xch'unic ti much'utic tey ta Jerusalene
(Mt 23.37-39)
31Ja'o tey ic'otic jayvo' jfariseo xi iyalbeic ti Jesuse:
―Loc'an ech'el li'toe yu'un li Erodese yo'onuc smilot ―xutic.
32Itac'av ti Jesuse:
―Batanic ba albeic li vet taje: “Q'uelavil, lavie xchi'uc ti oc'obe ta to jloq'ues pucujetic, xchi'uc ta to xquet'esbe xchamelic ti much'utic ipique, cha'ej to chlaj cu'un li c'usi ta jpase.” 33Persa to chixanav ech'el lavie, xchi'uc ti oc'obe, xchi'uc ti cha'eje, yu'un muc'bu lec ti mi ma'uc ta Jerusalen ta xcham li jun j'alc'ope.
34»¡Jerusalén, Jerusalén, vo'ot ti chamil li yaj'alc'optac Rioxe, xchi'uc ti chavac'beic ton ti much'utic lequic cha stacbeic tal ti Rioxe! ¡Ep ta velta ta jc'an ox ta jts'ob li avoltaque, chac c'ucha'al ta stsob yol ta yolon xic' li me'ch'eque, pero li vo'oxuque muc' xac'anic tsobel! 35Toj abol aba chacomic yu'un chavich'ic comtsanel; chacalbe ava'iic ti mu xa bu chavilicon oe, ja'to ti c'alal xavalic chac li'i: “¡Toj lec tajmec ti much'u itaque tal ta sbi ti Cajvaltique!”» Mi xachiique, ja'to chavilicon noxtoc ―x'utatic yu'un ti Jesuse.
Valgt i Øjeblikket:
Svun Lucas 13: LeqAC
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© Sociedad Biblica de Mexico AC
