Mateo 10
10
Into-non Jesus I Sawal Na Chegwen Disipolos To
(Mark 3:13-19; 6:7-13; Luke 6:12-16; 9:1-6)
1Nonta sa-kin akow, tiya-gway Jesus ira ma disipolos ton sawal na chegwa et esa-sa-nop ira. In-i-kan toy karebengan chen menagchag na dimonyos tan mengkal na ekila-kilasin sahit tan diga-digat na angel. 2Sejay i ngaran iren ma apostolis a sawal na chegwa. Sema kahejangan, si-kathos Simon a ngiyaranan to pay na Peter, tan si Andrew a ahi to, si James ni John a san-ahin anak iren Zebedee, 3si Philip tan si Bartholomew, si Thomas, si Matthew a sema toon para singil na binis, si James a anak Alphaeus, tan si Thaddaeus, 4si Simon a iyanngaran na Zealot tep naintakchel toy ili tho, tan si Judas Iscariot a enraidor Jesus.
5Into-non Jesus ira ma sawal na chegwen disipolos a binidin to ira i “Enog i chidan iwa siyo-siyodad na Gentiles. Enog pay i kowan chiwa siyo-siyodad na i-Samaria, 6no diket kowan kayod echom tayon poli-polin Israel a singen iya-tiw iren kalniro. 7Emiin a dogad a konan jo, ikaskasaba yo i chanchani diy pantorayan Afo Chiyos. 8Pemapteng joy mansekit, panpawil joy etiy, piged joy mansekit a paladoy kolid cha, tan chagchag joy dimonyos. Iyay-i-kan maliy karebengan jon nagwariy bayad to, isonga enog ngoy inpabayad i tolong jo. 9Enog i tahin na banay a pilak tan angken silsiljo. 10Enog pay i tahin na akbot cha konan jo. Enog ngoy tahin na baron pansa-dathan jo, sapathos, tan kosnod. Tep sema naiyan-obda, iyaykarin mengegwat na mesepol to.
11“No onmothok kayod siyodad, pengenap kayo na toon maronong et mekiiyan kayod baliy to ingkathod ibetik jo. 12No onsekep kayod baliy, kowan jo i ‘Sapay koma i-kan Afo Chiyos i talna ired ma naiyan-iyan chiyay.’ 13No gwared ma baliy i toon iyaykarin may-i-kanan na talna, sema talnen inbaga yo, on-onong cha si-kara, nem no nagwared man i toon iyaykari, on-oli did si-kayo ma bindisjon. 14No nat sintilen cha kayo na too et nat iki-ngelan cha i konen jo, pokpohi yoy depok cha seki yo no bebtihan jo ma baliy ono siyodad say si-kathoy bancha i si-kara ngoy menongbat Afo Chiyos kagol na inpasing cha. 15Sejay a konen kod si-kayo, podnon no onmothok aliy akow na pengowis Afo Chiyos na too, sema chosa iren ma i-Sodom tan i-Gomorrah, enka-jas iy say chosa iren ma naiyan-iyan chiwa siyodad.” #10:15 Sema epasamak cha i-Sodom tan i-Gomorrah, naebased Genesis 19:1-29.
Sema Timpo Din Ma Digat
(Mark 13:9-13; Luke 21:12-17)
16Intoloy Jesus a engowan cha disipolos to i “Nemnem jo jay. Kowan ito-no kayon inges toy kalniron onkowan cha kawad-an na emanekot iren aso. Isonga, mesepol a edaing kayon inges toy oleg et nagwariy basol jon inges toy kalapati. 17Pantanchaan kayo tep iawat cha kayod gwariy karebengan cha et becha-bechasen cha kayod synagog. 18Icharom cha kayod sangoanan na gogobirnador tan aari tep naemati kayod si-kak. Et gwariy gwaya yon mengigwanggwanggwang niwa mapteng a chamag cha si-kara tan sema ngo iren Gentiles. 19No iawat cha kayo say bistigalen cha kayo, enog i chanag maypangkep na konen jo tan pesing jon mengowan tep no seman alin timpo, maypaamted si-kayo ma konen jo. 20Tep sema Ispirito Santon naedafod Awejo, si-kathoy kedepoan na konen jo, nat si-kayo.
21“Et no seman ma din timpo, gwara di iriy menraidor na ahi ra say bonoen cha ira. Inges to ngo ired awecha. Traidoren chiy anak cha say bonoen cha ira. Kontraen ngo ira na aanak iriy parintis cha et pebono ra ira. 22Owesen cha kayo na emiin a too tep naemati kayod si-kak. Nem sema memasig a memati ingkathod kekcheng na diga-digat to, maysalakan. 23No pedigathen cha kayod man a siyodad, betik kayod afil. Tep sejay a konen kod si-kayo, podnon eg jo pay nin kekchengen iwa obden in-i-kan kon a-magen jo ired ma emiin a siyodad na Israel iy asan ikowan ko din Anak na Too.
24“Nagwariy naiyan-achal a ekayang iy say maistoro tho. Tan nagwara ngoy bagaen a ekayang iy say afo tho. 25Isonga, sema man-aachal, mesepol a mepnek no sema da-kaman to, inges toy diya-kaman na maistoro tho. Tan sema ngon bagaen, mepnek koma no inges toy afo tho. Si-kak a mahabaliy, no nakigwan cha i si-kak si Beelzebul a afo na dimonyos, sinto pay i konen chiy ngaaw maypangkep cha si-kayon man-iiyan cha baliy ko. #10:25 Si Beelzebul i sa-kin ngaran Satanas.
Sema Tekothan Koma Na Tothoo
(Luke 12:2-7)
26“Isonga, enog i tahot ired ma too tep emiin a nat iyaybiybiy niman, maybiybiy no sa-ki din akow, tan emiin ngon nat aamtaan niman, maypaamta no sa-ki din akow. 27Sema kigwa-kigwan kod si-kayo bengat, ipaamta yod emiin a too. Sema ngon kigwa-kigwan kod si-kayo nonta agos tayo, ikelkeljaw jod ketoo-too. 28Enog i tiyahotan i toon piyan chen memono na angel jo tep nat mebedin cha pay a bonoen i ispirito yo. Sema tekothan jo kitdi, si Afo Chiyos tep si-kathoy gwariy panakabalin ton menosa na angel tan ispirito pay cha inpiyirno. 29Tep sema chegwen tilin, naiyaydaho na sa-kin sintimos, anya? Nem angken sa-kid si-kara, nat ma-kas chiwa pithek ampet itolok Afo Chiyos. 30Sinto pay kayo! Tep angken bowek jo, amten Afo Chiyos i bilang to. 31Isonga, enog i tahot tep epateg kayo iy say piyen tilin.
Sema Naengowan I Naematid Jesus Tan Sema Naengidibak Jesus
(Luke 12:8-9)
32“Isonga, angken siyen toon naengowan i naematid si-kak cha sangoanan na too, konen ko ngo i iyayka-chom cha si-kak cha sangoanan Awak a gwared dangit. 33Nem angken siyen toon naengidibak i naematid si-kak cha sangoanan na too, idibak ko ngo i ekika-chom cha si-kak cha sangoanan Awak a gwared dangit.”
Mesepol A Si Jesus I Kainportantian Cha Biyag Tayo
(Luke 12:51-53; 14:26-27)
34Et kigwan pay Jesus i “Enog i kigwan i kimowanak alin mengi-kan na talned ja dobong. Tep ekak kimowan alin mengi-kan na talna, no diket kimowanak alin engitahin na ispada 35tep say panbanagan na inkowan ko di, pankokontraan tan pansisi-janan na tothoo. Isonga, no sa-ki din akow, sema san-aama, mankokontra ira, tan sema san-iina, mankokontra pay ira, pati sema ngon san-iinepo. 36Sema mengontra na too, sema ngon pamilja tho.
37“Sema mas ensemek tos aweto ni ineto iy say si-kak, nat iyaykarin maybilang a disipolok. Tan sema mas ensemek toy aanak to iy say si-kak, nat iyaykari ngod si-kak. 38Sema ngon nat menakbat na koros to et mekiolop cha si-kak, nat iyaykari pay a maybilang a disipolok. #10:38 Sema naenakbat na koros to, si-kathoy toon naiyayna-mil na pengonod tod Jesus angken sejay i ketiyan to. 39Tep sema toon menepi na biyag to, ma-tiw cha si-katho, nem sema toon metiy kagol na pamati thod si-kak, may-i-kanan na biyag a nagwariy pengingkaan to.
Sema Kongkonen I-kan Afo Chiyos
(Mark 9:41)
40“Sema mengegwat cha si-kayo, si-kak pay i egwathen to, tan sema mengegwat cha si-kak, egwathen to pay ngo ma engito-nod si-kak. 41Sema menintil na profita tep profita ma too, sema kongkonen egwathen to, inges to ngoy kongkonen ma profita. Tan sema pay a menintil na maronong a too tep mapteng i ogadi tho, sema kongkonen egwathen to, inges toy kongkonen ma maronong a too. 42Sejay a konen kod si-kayo, podnon angken siyen toon mengi-kan cha kababaan a disipolos ko, angken tasa bengat na chanom tep disipolok iwan, sigoradon mekongkonaan.”
Valgt i Øjeblikket:
Mateo 10: KAR
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 2023 Wycliffe Bible Translators, Inc. All rights reserved.
