Mateo 11
11
Sema Salodsod John A Naemonjag Tan Sema Songbat Jesus
(Luke 7:18-35)
1Idi kincheng Jesus a binidin to ira ma sawal na chegwen disipolos to, imekal chiwan et kimowan cha iyay-askang iren siyo-siyodad say mantoro tan mengaskasabed man.
2Nontan a timpo gwara pay laeng si John a Naemonjag cha kalebosan. Idi inki-ngelan toy ima-imag Cristo, into-no thoy echom a disipolos ton 3mengibagen Jesus i “Si-kam iwa inkarin Afo Chiyos a onkowan ali ono gwariy echom a seskeren mi?”
4Insongbat Jesus i “Oli kayo et kowan jod John iwa inki-ngelan jo tan mita yo. 5Kowan jod si-katho i sema iren iyangkekorab, mahasi-neng ira tan sema iren iyangkepilay, mahaahad ira; sema iren paladoy kolid cha, mimapteng ira tan sema iren iyangketoleng, mahaki-ngel ira; sema iren iyangketiy, iyanpawil ira, tan sema mapteng a chamag, naiyaykaskasabed iyangkebitheg. 6Kowan jo pay cha si-katho i magesat i toon nagwariy chegwa-chegwa tho maypangkep cha si-kak.”
7Nonta manbebetik ma ira ma disipolos John a Naemonjag, inchogin Jesus a mengowan cha tothoo maypangkep John. Kigwan to i “Nontan a inkowan jod kad-an John chiwa dogad a nagwariy toon naiyan-iya-iyan, nengoy piyan jon si-nengen? Sema toon manchegwa-chegwen inges toy bila-jon nagwimedgwedgwed cha chahem? Enchi emo. 8Nengoy piyan jon si-nengen? Sema toon naiyanbaro na ekanas? Enchi. Tep sema toon naiyanbaro na ekanas, naiyan-iyan ired baliy na ari. 9Isonga, nengoy piyan jon si-nengen chiwan? Sema profita? Ahow, nem konen kod si-kayo i sema sini-neng jo, ekayang iy say profita. 10Tep si John a Naemonjag, si-katho ma engibanagan cha iyaysolat cha esel Afo Chiyos a kigwan to i:
‘Mengidagwasak na toon
mengisagana na chedanen mo.’ ” #11:10 Malachi 3:1
11Et intoloy men Jesus a engowan i “Sejay a konen kod si-kayo, podnon nagwariy toon iyay-anak chiya dobong a ekayang iy say si John a Naemonjag, nem sema kababaan ngod pantorayan Afo Chiyos, ekayang iy say si John. 12Manipod nonta kapoanan na kaskasaben John ingkathod niman, gwara iriy naengipahat a naengichamag maypangkep na pantorayan Afo Chiyos, tan gwara ira pay i naiyayna-mil et say mayka-chom ired ma pantorayan to. #11:12 Sema sa-kin banag na birsikolon 12, sejay: Gwara iriy naengipahat a naiyankontra na pantorayan Afo Chiyos, tan gwara ira pay i mangkahedsel a naengiparit koma na echom say nat mayka-chom ired man. 13Tep sema iren profita tan sema dinteg Moses, inpadto riy maypangkep na pantorayan Afo Chiyos. Et idi mimothok si John, sema inpadto ra, iyaychogin metongpal. 14Et no piyan jon patien i iyaysolat cha esel Afo Chiyos, si John, si-katho ma Elijah a iyaypadtoy ikowan to di. #11:14 Malachi 4:5 15Si-kayon manki-ki-ngel, nemnem jon pasiyay inki-ngelan jo.”
16Et intoloy Jesus a engowan i “Sema too niman, nengoy kay-arigan cha? Inges to ira ma aanak a ketinokkong cha plasen kainamayon nagwariy kepnekan cha. Tep nakigwan na echom cha kaamayo ra i 17‘Naiyanmosiko kawi para cha si-kayo, nem eg jo piyan a mansada. Naiyankansiyon kawi na kansiyon na para cha aremag para cha si-kayo, nem eg jo piyan a onngogngog.’ 18Inges jo ira man a aanak a nagwariy kepnekan cha. Tep kimowan alis John a Naemonjag a naiyan-ayonar a eg naenginom na adak, et nakigwan jo i ‘Iya-janan na dimonyos.’ 19Si-kak ngon Anak na Too, kimowanak alin naekidihobak a naekiinomak cha si-kayo, et nakigwan jo i ‘Si-neng jo ma too. Mahibel tan mabotheng, kajem na toon para singil na binis tan mabesol a too!’ Nem angken setan i konen jo, sema daing Afo Chiyos, mesi-neng cha naimag iren ma engawat.”
Sema Iren Eg Cha Piya n A Manbabawi
(Luke 10:13-15)
20Et inseg-ang men Jesus ira ma naiyan-iyan cha siyo-siyodad a engamagan to na gwa-gwa-chen milagro tho tep eg ira iyanbabawi na basol cha. 21Kigwan to i “Kakaasi kayon i-Chorazin tan si-kayon i-Bethsaida! Tep chakel i milagron imag kod siyo-siyodad jo, nem eg kayo iyanbabawi na basol jo. Nem no cha Tyre tan Sidon i engamagan ko koma iren ta milagro, sema iren tood man nonta bayag da, iyanbaro koma ira na saho, tan miyegsian chiy toktok cha na chep-ol a kasi-nengan to i iyanbabawi ira. #11:21 Sema tothoon naiyan-iyan cha siyodad na Tyre tan Sidon, Gentiles iren eg cha naiyonod i bili-bilin Afo Chiyos. 22Isonga, konen kod si-kayo i sema chosa iren ma i-Tyre tan sema iren i-Sidon, enka-jas iy say chosa yo no akow ali na pengowis Afo Chiyos na tothoo. 23Si-kayo pay a i-Capernaum, kin jo emo i ikayang to kayon Afo Chiyos cha dangit a mechejaw? Sigoradon ito-no tho kayod inpiyirno. Tep chakel i milagron imag kod siyodad jo, nem eg kayo iyanbabawi na basol jo. No cha Sodom i engamagan ko iren ta milagro, sema tothoon naiyan-iyan chiwan, iyanbabawi koma ira, tan igwan pay koma ma siyodad cha ingkathod niman. 24Isonga, konen kod si-kayo i sema chosa iren ma i-Sodom, enka-jas iy say chosa yo no akow ali na pengowis Afo Chiyos na tothoo.”
Si Jesus I Naengitalned Nemnem Tayo
(Luke 10:21-22)
25Nontan a timpo, iyankararag si Jesus i “Awa, si-kam a Afod dangit tan cha dobong, mansalamathak cha si-kam tep sema toon engipaamtaan mo na podno, nat sema iren iyangkedaing tan iyanpan-achal, no diket sema iren iyangkekombaben singen nga-nga. 26Ahow, Awa, imag mo man tep seman i piyan mon ma-mag.”
27Et kigwan Jesus ired tothoo i “Si Awak, inpiyal ton emiin cha si-kak. Nagwariy mahaamtaak, malaksid si Awak, tan nagwara ngoy mahaamten Awak, malaksid si-kak a Anak to tan sema iren tothoon piyan kon ipaamtaan.
28“Si-kayon emiin a iyabdiy tan ebel-athan, gomali jod si-kak say pan-inana tahejo. 29Onod joy bili-bilin ko, tan pan-achal kayod si-kak tep aanosak tan ekombabaak, et maypatalniy nemnem jo. 30Tep sema pakon ipa-tok kod si-kayo, kosto-kosto, tan sema kalken ipasakbat ko pay cha si-kayo, enka-jas.”
Valgt i Øjeblikket:
Mateo 11: KAR
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 2023 Wycliffe Bible Translators, Inc. All rights reserved.
