यूहन्ना 7

येशू आर ओकर भ्यासब

1तकरबाद येशू गालील जिलाके यात्रा कैल्कै। ऊ यहूदिया प्रदेशमे जैले नैचाहल्कै कहिनेकी यहूदी आदमीसिके अगुवासब ओकर जान मारैके दावमे रहै। 2तखनी यहूदी आदमीसिके झोपडी-वासके पावन लग्हैमे रहै। 3सेल्याके येशूके भ्यासब ओकरा कहैल्कै, “गालील जिला छोडिके यहूदिया प्रदेशमे जा। तोर कैल कामसब ओत्ते तोर चेलासब भी देख्हौं। 4यदि तुहें चाहैछ कि आदमीसब तोर बारेमे जानहौं ते, तोरा खुल्ला रुपसे सभैके समनामे कामसिके करना चाही।” 5कहिनेकी ओकर भ्यासब भी ओकरापर विश्वास नैकर्ते रहै। 6येशू ओकरासिके कहैल्कै, “हमर सही समय नैऐलै छे, मगर तोरसिके लिए ते सभे समय सही छौ। 7यी संसारके आदमीसब तोरासिके घृणा नैकरे सकैछौ, मगर हमरासे घृणा करैछै कहिनेकी हमे एकर बारेमे यी बताबैछियै कि ओकरसिके काम खराब छै। 8तुहेंसब यी पावनमे जो। हमे एखन यी पावनमे नैजैबौ, कहिनेकी हमर लिए ओत्ते जैके सही समय एखन नैऐलै छे।” 9यी बात कहिके येशू गालील जिलामे ही रहलै।

10मगर जब ओकर भ्यासब पावनमे चल गेलै, तब येशू भी खुल्लम-खुल्ला नै, मगर गुप्त रुपसे यरूशलेम सहरमे गेलै। 11पावनमे यहूदी आदमीसिके अगुवासब येशूके खोज्ते रहै। आर ऊसब “येशू कते छै?” कहिके आदमीसिके पुछते रहै। 12भीडके आदमीसिके बीचमे ओकर बारेमे चर्चा हैते रहै। कुछु आदमीसब कहते रहै, “ऊ बढियाँ आदमी छै।” आरहौ कुछु आदमीसब कहते रहै, “नै, यी ते आदमीसिके बहकाबैछै।” 13मगर यहूदी आदमीसिके अगुवासिके डरसे कोय भी खुलिके कुछु नैकहते रहै।

येशूके उपदेश

14यी पावन करीब-करीब आधा खतम भेलके बाद येशू परमेश्वरके मन्दिरके ऐगनमे जैके शिक्षा दिये लाग्लै। 15तब यहूदी आदमीसिके अगुवासब बहुते चकित भ्याके कहैल्कै, “यी आदमी धरमशास्त्रमे कहियो तालिम नैकैल्कै, तैय्योपर एकरा एतनें ज्ञान केरंके भेलै?” 16येशू ओकरासिके जबाब द्याके कहैल्कै, “हमे जे शिक्षा दैछियै, ऊ हमर नैछै, मगर हमरा भेजेवाला परमेश्वरके छै। 17परमेश्वरके इच्छा मुताबिक काम करेवाला आदमीसब यी जानी लेतै कि हमर शिक्षा परमेश्वरके तरफसे आबैछै या हमर आपने अधिकारसे आबैछै। 18जे आदमी आपन अधिकारसे बोलैछै, ऊ आपने लिए सम्मान खोजैछै, मगर जे अपना भेजेवालाके सम्मान खोजैछै, ऊ इमानदार आदमी छै, आर ओकरामे कोनो बैमानी नैहैछै। 19कि मूसा तोरासिके विधि-विधान नैदेल्कौ छे? तैय्योपर तोरासिमेसे एक्को आदमी उटा नियमके पालन नैकरैछैं। तुहेंसब कहिने हमर जान मारैले खोजैछैं?” 20भीडके आदमीसब जबाब देल्कै, “कहाँ कोय तोर जान मारैले खोजैछौ? तोरा ते भूत लाग्ल छौ।” 21येशू कहैल्कै, “हमे एकटा चमत्कारी काम कैलियै, आर तोरासिके सभैके एकरामे आश्चर्य लागैछौ? 22मूसा तोरासिके खतनाके विधि-विधान देल्कौ, ओरं ते वास्तवमे उटा विधि-विधान तोरासिके मूसा नै, बरु ओक्रहौसे पहेलावाला बाप-पुर्खासे मिल्लौ छे। आर ओकरे मुताबिक तुहेंसब यहूदी आदमीसिके विश्रामके दिनमे भी आपन बेटासिके खतना करैछैं। 23जब तुहेंसब मूसाके देल विधि-विधान उलंघन नैहै कहिके यहूदी आदमीसिके विश्राम दिनमे खतना करैछैं ते, हमे यहूदी आदमीसिके विश्रामके दिनमे एकटा आदमीके पुरा ठीक करि देलियै कहिके तुहेंसब हमरासे कथिले गोस्सा करैछैं? 24बाहारसे दिखाई देल बातके आधारमे फैसला नैकर, मगर जे हकीकतमे सही छै, ओकरे आधारमे फैसला कर।”

कि येशू ही ख्रीष्ट छै?

25तब यरूशलेम सहरके कुछु आदमीसब कहे लाग्लै, “यी आदमी ते उहे छै, जकरा यहूदी आदमीसिके अगुवासब जान मारैके कोशिश करैछै। 26मगर देख! येशू ते एतनें खुल्लम-खुल्ला बोलैछै, आर तैय्योपर यहूदी अगुवासब एकरा कोय कुछु नैकहैछै! कहीं एरं ते नैछै कि आपनसिके अगुवासब भी यी बात मानी लेल्कै कि ऊ ख्रीष्ट छै? 27एकरा ते हमेसब जानैछियै यी आदमी कतेसे ऐलै छे, मगर जब ख्रीष्ट प्रकट हैतै ते, कक्रहौ यी पता नैचल्तै कि ऊ कतेसे ऐलै छे।” 28तखनी येशू परमेश्वरके मन्दिरमे शिक्षा देते रहै। ऊ जोरसे कहैल्कै, “तुहेंसब हमरा चिन्हैछैं, आर हमे कतेसे ऐलियै छे, उहो जानैछैं। मगर हमे आपने इच्छासे नै ऐलियै छे। जे हमरा भेजल्कै छे ऊ सत्यवादी छै। तुहेंसब ओकरा नैचिन्हैछैं। 29मगर हमे ओकरा चिन्हैछियै, कहिनेकी हमे ओकरे तरफसे ऐलियै छे, आर उहे हमरा भेजल्कै छे।” 30यी बात सुनिके यहूदी अगुवासब ओकरा पक्डैके कोशिश करे लाग्लै, मगर कोय ओकरा गिरफ्तार नैकैल्कै, कहिनेकी ओकर मरैके सही समय एखन नैऐलै रहे। 31उटा आदमीसिके भीडमे भेल बहुते आदमीसब येशूपर विश्वास कैल्कै। आर ऊसब कहैल्कै, “जब ख्रीष्ट ऐतै ते, कि ऊ यी आदमीसे भी बेसी चमत्कार कर्तै से?”

32फरिसी समूहके आदमीसब जब भीडके आदमीसिके येशूके बारेमे यी तरहके चर्चा कर्ते सुनल्कै, तब प्रमुख पुजारी आर फरिसी समूहके आदमीसब मिलिके येशूके पक्डैले परमेश्वरके मन्दिरके पहरदारसिके भेजल्कै। 33तब येशू कहैल्कै, “आब हमे कुछु बेरतक तोरसिके संगमे रहबौ, तकरबाद हमे हमरा भेजेवालाके लगत वापस चल जैबौ। 34तब तुहेंसब हमरा खोज्भैं, मगर हमरा नैपैभैं, आर हमे जते हैबै, ओत्ते तुहेंसब नैआबे सक्भैं।” 35यी बात सुनिके यहूदी आदमीसिके अगुवासब एक दोसरसे कहे लाग्लै, “यी आदमी कते जैले चाहैछै जते हमेसब ओकरा कहियो नै भेटे सक्बै? शायद यी ऊसब यहूदी आदमीसिके लगत जैतै जे यूनानी सहरसिमे परदेशी बनिके रहैछै। कि यी ओक्रहैसिके जैके आपन शिक्षा दियैले चाहैछै? 36एकर कहेल बातके मतलब कि छै? तुहेंसब हमरा खोज्भैं, मगर नैपैभैं आर हमे जते हैबै ओत्ते तुहेंसब नैआबे सक्भैं।”

जिन्दा पानी

37पावनके अन्तिम दिन जकरा सभैसे खास दिन मान्ल जैते रहै, उहे दिन येशू खडा भ्याके जोरसे कहैल्कै, “यदि कोय प्यास्ल छैं ते ऊ हमरलगत या आर पी। 38जेरं कि धरमशास्त्रमे लिख्ल छै कि जे आदमी हमरापर विश्वास करैछै, ओकर ह्रदयसे जलके झरना जे जीवन दैछै फूटीके बहे लाग्तै।” 39जब ऊ “पानी जे जीवन दैछै” कहैल्कै ते, ऊ पवित्र आत्माके बारेमे बोल्ते रहै, जे पवित्र आत्मा ओकरापर विश्वास करेवाला आदमीसब पाबेवाला रहै। तखनीतक कोय भी आदमी पवित्र आत्मा नैपैल्कै रहे, कहिनेकी परमेश्वर एखनतक येशूके महिमाके प्रकट नैकैल्कै रहे। 40यी बात सुनिके कुछु आदमीसब कहे लाग्लै, “सच्चेमे इहे आदमी परमेश्वरके वक्ता छै, जकर आबैके इन्तजार हमेसब करैछियै।” 41कुछु आदमीसब कहते रहै, “यी ख्रीष्ट छै।” मगर कुछु आदमीसब कहते रहै, “कि ख्रीष्ट गालील जिलासे ऐतै? 42धरमशास्त्रमे यी लिख्ल छै कि, ख्रीष्ट दाऊद राजाके वंशमेसे दाऊद राजाके बेथलेहेम गाँवसे ऐतै।” 43एरंके येशूके बारेमे आदमीसिके बीचमे मतभेद भेलै। 44ओकरसिमेसे कतनें झन ओकरा पक्डैके कोशिश करे लाग्लै, मगर कोय ओकरा गिरफ्तार नैकैल्कै।

यहूदी आदमीसिके अगुवासिके अविश्वास

45तब परमेश्वरके मन्दिरके पहरदारसब येशूके गिरफ्तार नैकरिके प्रमुख पुजारीसब आर फरिसी समूहके आदमीसिके लगत वापस ऐलै। ऊसब मन्दिरके पहरदारसिके पुछल्कै, “तुहेंसब येशूके कहिने गिरफ्तार करिके नैआन्लहैं?” 46मन्दिरके पहरदारसब जबाब देल्कै, “ओकर बात सुनिके हमेसब चकित भ्या गेलियै। हमेसब यी आदमीके जेरं बोल्ल बात कहियो नैसुन्लियै रहे।” 47फरिसी समूहके आदमीसब कहैल्कै, “तहुँसब ओकर बातसे बहकि गेल्हैं कि केरं? 48कि हमरसिके अगुवासब आर फरिसी समूहके आदमीसिमेसे कोय येशूके विश्वास कैल्कै छे? 49भीडमे भेल आदमीसब मूसाके विधि-विधान नैजानैछै, एकरासिपर परमेश्वरके सराप पडल छै।” 50ओत्ते भेल फरिसी समूहके आदमीसिमेसे येशूसे राती भेट करैले ज्यावाला निकोदेमस कहैल्कै, 51“कि आपनसिके विधि-विधानके मुताबिक दोष लगैल आदमीके बात नैसुनिके आर ओकर कैल कामके पता नैलग्याके ओकरा दोषी बनाबे मिलैछै से?” 52मगर ऊसब निकोदेमसके जबाब देल्कै, “कि तहुँ गालील जिलाके छैं कि केरं? धरमशास्त्र बढियाँसे पढ आर तोरा मालुम हैतौ कि गालील जिलासे कोनो परमेश्वरके वक्ता नैऐतै।” 53तब सभे आदमी आपन-आपन घरमहर गेलै।

Valgt i Øjeblikket:

यूहन्ना 7: KYVNT

Markering

Del

Kopiér